Sukta 4

4.1

Dirghayuhpraptih, 1-6 atharva, (chandramah, ) jangidah, anushtup, 1 virat prastarapanktih

दी॒र्घा॒यु॒त्वाय॑ बृह॒ते रणा॒यारि॑ष्यन्तो॒ दक्ष॑माणाः॒ सदै॒व।
म॒णिं वि॑ष्कन्ध॒दूष॑णं जङ्गि॒डं बि॑भृमो व॒यम् ॥१॥

Dirghayutvaya brihate ranayarishyanto dakshamanah sadaiva
Manim vishkandhadushanam jangidam bibhrimo vayam

4.2

जङ्गि॒डो ज॒म्भाद् वि॑श॒राद् विष्क॑न्धादभि॒शोच॑नात्।
म॒णिः स॒हस्र॑वीर्यः॒ परि॑ णः पातु वि॒श्वतः॑ ॥२॥

Jangido jambhad visharad vishkandhadabhishochanat
Manih sahasraviryah pari nah patu vishvatah

4.3

अ॒यं विष्क॑न्धं सहते॒ऽयं बा॑धते अ॒त्त्रिणः॑ ।
अ॒यं नो॑ वि॒श्वभे॑षजो जङ्गि॒डः पा॒त्वंह॑सः ॥३॥

Ayam vishkandham sahateyam badhate attrinah
Ayam no vishvabheshajo jangidah patvanhasah

4.4

दे॒वैर्द॒त्तेन॑ म॒णिना॑ जङ्गि॒डेन॑ मयो॒भुवा॑ ।
विष्क॑न्धं॒ सर्वा॒ रक्षां॑सि व्याया॒मे स॑हामहे ॥४॥

Devairdattena manina jangidena mayobhuva
Vishkandham sarva rakshansi vyayame sahamahe

4.5

श॒णश्च॑ मा जङ्गि॒डश्च॒ विष्क॑न्धाद॒भि र॑क्षताम्।
अर॑ण्याद॒न्य आभृ॑तः कृ॒ष्या अ॒न्यो रसे॑भ्यः ॥५॥

Shanashcha ma jangidashcha vishkandhadabhi rakshatam
Aranyadanya abhritah krishya anyo rasebhyah

4.6

कृ॒त्या॒दूषि॑र॒यं म॒णिरथो॑ अराति॒दूषिः॑ ।
अथो॒ सह॑स्वान् जङ्गि॒डः प्र ण॒ आयुं॑षि तारिषत् ॥६॥

Krityadushirayam maniratho aratidushih
Atho sahasvan jangidah pra na ayunshi tarishat