Sukta 34

34.1

Pashavah, 1-5 atharva, 1 pashupatih, 2 devah, 3 agnih vishvakarma, 4 vayuh prajapatih, 5 ashih, trishtup

य ईशे॑ पशु॒पतिः॑ पशू॒नां चतु॑ष्पदामु॒त यो द्वि॒पदा॑म्।
निष्क्री॑तः॒ स य॒ज्ञियं॑ भा॒गमे॑तु रा॒यस्पोषा॒ यज॑मानं सचन्ताम् ॥१॥

Ya ishe pashupatih pashunam chatushpadamuta yo dvipadam
Nishkritah sa yagyiyam bhagametu rayasposha yajamanam sachantam

34.2

प्र॒मु॒ञ्चन्तो॒ भुव॑नस्य॒ रेतो॑ गा॒तुं ध॑त्त॒ यज॑मानाय देवाः ।
उ॒पाकृ॑तं शशमा॒नं यदस्था॑त् प्रि॒यं दे॒वाना॒मप्ये॑तु॒ पाथः॑ ॥२॥

Pramunchanto bhuvanasya reto gatum dhatta yajamanaya devah
Upakritam shashamanam yadasthat priyam devanamapyetu pathah

34.3

ये ब॒ध्यमा॑न॒मनु॒ दीध्या॑ना अ॒न्वैक्ष॑न्त॒ मन॑सा॒ चक्षु॑षा च ।
अ॒ग्निष्टानग्रे॒ प्र मु॑मोक्तु दे॒वो वि॒श्वक॑र्मा प्र॒जया॑ संररा॒णः ॥३॥

Ye badhyamanamanu didhyana anvaikshanta manasa chakshusha cha
Agnishtanagre pra mumoktu devo vishvakarma prajaya sanraranah

34.4

ये ग्रा॒म्याः प॒शवो॑ वि॒श्वरू॑पा विरू॑पाः सन्तो॑ बहु॒धैक॑रूपाः ।
वा॒युष्टानग्रे॒ प्र मु॑मोक्तु दे॒वः प्र॒जाप॑तिः प्र॒जया॑ संररा॒णः ॥४॥

Ye gramyah pashavo vishvarupa virupah santo bahudhaikarupah
Vayushtanagre pra mumoktu devah prajapatih prajaya sanraranah

34.5

प्र॒जा॒नन्तः॒ प्रति॑ गृह्णन्तु॒ पूर्वे॑ प्रा॒णमङ्गे॑भ्यः॒ पर्या॒चर॑न्तम्।
दिवं॑ गच्छ॒ प्रति॑ तिष्ठा॒ शरी॑रैः स्व॒र्गं या॑हि प॒थिभि॑र्देव॒यानैः॑ ॥५॥

Prajanantah prati grihnantu purve pranamangebhyah paryacharantam
Divam gachchha prati tishtha shariraih svargam yahi pathibhirdevayanaih