Sukta 32

32.1

Kriminashanam, 1-6 kanvah, adityah, anushtup, 1 tripadbhuriggayatri, 6 chatushpannichridushnik

उ॒द्यन्ना॑दि॒त्यः क्रिमी॑न् हन्तु नि॒म्रोच॑न् हन्तु र॒श्मिभिः॑ ।
ये अ॒न्तः क्रिम॑यो॒ गवि॑ ॥१॥

Udyannadityah krimin hantu nimrochan hantu rashmibhih
Ye antah krimayo gavi

32.2

वि॒श्वरू॑पं चतुर॒क्षं क्रिमिं॑ सा॒रङ्ग॒मर्जु॑नम्।
शृ॒णाम्य॑स्य पृ॒ष्टीरपि॑ वृश्चामि॒ यच्छिरः॑ ॥२॥

Vishvarupam chaturaksham krimim sarangamarjunam
Shrinamyasya prishtirapi vrishchami yachchhirah

32.3

अ॒त्रि॒वद् वः॑ क्रिमयो हन्मि कण्व॒वज्ज॑मदग्नि॒वत्।
अ॒गस्त्य॑स्य॒ ब्रह्म॑णा॒ सं पि॑नष्म्य॒हं क्रिमी॑न् ॥३॥

Atrivad vah krimayo hanmi kanvavajjamadagnivat
Agastyasya brahmana sam pinashmyaham krimin

32.4

ह॒तो राजा॒ क्रिमी॑णामु॒तैषां॑ स्थ॒पति॑र्ह॒तः ।
ह॒तो ह॒तमा॑ता॒ क्रिमि॑र्ह॒तभ्रा॑ता ह॒तस्व॑सा ॥४॥

Hato raja kriminamutaisham sthapatirhatah
Hato hatamata krimirhatabhrata hatasvasa

32.5

ह॒तासो॑ अस्य वे॒शसो॑ ह॒तासः॒ परि॑वेशसः ।
अथो॒ ये क्षु॑ल्ल॒का इ॑व॒ सर्वे॒ ते क्रिम॑यो ह॒ताः ॥५॥

Hataso asya veshaso hatasah pariveshasah
Atho ye kshullaka iva sarve te krimayo hatah

32.6

प्र ते॑ शृणामि॒ शृङ्गे॒ याभ्यां॑ वितुदा॒यसि॑ ।
भि॒नाद्मि॑ ते कु॒षुम्भं॒ यस्ते॑ विष॒धानः॑ ॥६॥

Pra te shrinami shringe yabhyam vitudayasi
Bhinadmi te kushumbham yaste vishadhanah