Sukta 1

1.1

Paramam dhama 1-5 venah, brahma, atma, trishtup, 3 jagati

वे॒नस्तत् प॑श्यत् पर॒मं गुहा॒ यद् यत्र॒ विश्वं॒ भव॒त्येक॑रूपम्।
इ॒दं पृश्नि॑रदुह॒ज्जाय॑मानाः स्व॒र्विदो॑ अ॒भ्यऽनूषत॒ व्राः ॥१॥

Venastat pashyat paramam guha yad yatra vishvam bhavatyekarupam
Idam prishniraduhajjayamanah svarvido abhyanushata vrah

प्र तद् वो॑चेद॒मृत॑स्य वि॒द्वान् ग॑न्ध॒र्वो धाम॑ पर॒मं गुहा॒ यत्।
त्रीणि॑ प॒दानि॒ निहि॑ता॒ गुहा॑स्य॒ यस्तानि॒ वेद॒ स पि॒तुष्पि॒तास॑त् ॥२॥

Pra tad vochedamritasya vidvan gandharvo dhama paramam guha yat
Trini padani nihita guhasya yastani veda sa pitushpitasat

स नः॑ पि॒ता ज॑नि॒ता स उ॒त बन्धु॒र्धामा॑नि वेद॒ भुव॑नानि॒ विश्वा॑ ।
यो दे॒वानां॑ नाम॒ध एक॑ ए॒व तं सं॑प्र॒श्नं भुव॑ना यन्ति॒ सर्वा॑ ॥३॥

Sa nah pita janita sa uta bandhurdhamani veda bhuvanani vishva
Yo devanam namadha eka eva tam samprashnam bhuvana yanti sarva

परि॒ द्यावा॑पृथि॒वी स॒द्य आ॑य॒मुपा॑तिष्ठे प्रथम॒जामृ॒तस्य॑ ।
वाच॑मिव व॒क्तरि॑ भुवने॒ष्ठा धा॒स्युरे॒ष न॒न्वे॒३षो अ॒ग्निः ॥४॥

Pari dyavaprithivi sadya ayamupatishthe prathamajamritasya
Vachamiva vaktari bhuvaneshtha dhasyuresha nanve3sho agnih

परि॒ विश्वा॒ भुव॑नान्यायमृ॒तस्य॒ तन्तुं॒ वित॑तं दृ॒शे कम्।
यत्र॑ दे॒वा अ॒मृत॑मानशा॒नाः स॑मा॒ने योना॒वध्यैर॑यन्त ॥५॥

Pari vishva bhuvananyayamritasya tantum vitatam drishe kam
Yatra deva amritamanashanah samane yonavadhyairayanta