Sukta 55

55.1

Rayasposhapraptih, 1-6 bhriguh, agnih, trishtup, 2 astarapanktih, 5 tryavasana panchapada purastajjyotishmati

रात्रिं॑रात्रि॒मप्र॑यातं॒ भर॒न्तोऽश्वा॑येव॒ तिष्ठ॑ते घा॒सम॒स्मै।
रा॒यस्पोषे॑ण॒ समि॒षा मद॑न्तो॒ मा ते॑ अग्ने॒ प्रति॑वेशा रिषाम ॥१॥

Ratrinratrimaprayatam bharantoshvayeva tishthate ghasamasmai
Rayasposhena samisha madanto ma te agne prativesha rishama

55.2

या ते॒ वसो॒र्वात॒ इषुः॒ सा त॑ ए॒षा तया॑ नो मृड ।
रा॒यस्पोषे॑ण॒ समि॒षा मद॑न्तो॒ मा ते॑ अग्ने॒ प्रति॑वेशा रिषाम ॥२॥

Ya te vasorvata ishuh sa ta esha taya no mrida
Rayasposhena samisha madanto ma te agne prativesha rishama

55.3

सा॒यंसा॑यं गृ॒हप॑तिर्नो अ॒ग्निः प्रा॒तःप्रा॑तः सौमन॒सस्य॑ दा॒ता।
वसो॑र्वसोर्वसु॒दान॑ एधि व॒यं त्वेन्धा॑नास्त॒न्वं पुषेम ॥३॥

Sayansayam grihapatirno agnih pratahpratah saumanasasya data
Vasorvasorvasudana edhi vayam tvendhanastanvam pushema

55.4

प्रा॒तःप्रा॑तर्गृ॒हप॑तिर्नो अ॒ग्निः सा॒यंसा॑यं सौमन॒सस्य॑ दा॒ता।
वसो॑र्वसोर्वसु॒दान॑ ए॒धीन्धा॑नास्त्वा श॒तंहि॑मा ऋधेम ॥४॥

Pratahpratargrihapatirno agnih sayansayam saumanasasya data
Vasorvasorvasudana edhindhanastva shatanhima ridhema

55.5

अप॑श्चा द॒ग्धान्न॑स्य भूयासम्।
अ॒न्ना॒दायान्न॑पतये रु॒द्राय॒ नमो॑ अ॒ग्नये॑ ।
स॒भ्यः स॒भां मे॑ पाहि॒ ये च॑ स॒भ्याः स॑भा॒सदः॑ ॥५॥

Apashcha dagdhannasya bhuyasam
Annadayannapataye rudraya namo agnaye
Sabhyah sabham me pahi ye cha sabhyah sabhasadah

55.6

त्वामि॑न्द्रा पुरुहूत॒ विश्व॒मायु॒र्व्यश्नवन्।
अह॑रहर्ब॒लिमित् ते॒ हर॒न्तोऽश्वा॑येव॒ तिष्ठ॑ते घा॒सम॑ग्ने ॥६॥

Tvamindra puruhuta vishvamayurvyashnavan
Aharaharbalimit te harantoshvayeva tishthate ghasamagne