Sukta 44

44.1

Bhaishajyam, 1-10 bhriguh, anjanam, 8-9 varunah, anushtup, 4 chatushpada shankumatyushnik, 5 nichridvishama tripada gayatri

आयु॑षोऽसि प्र॒तर॑णं॒ विप्रं॑ भेष॒जमु॑च्यसे ।
तदा॑ञ्जन॒ त्वं शं॑ताते॒ शमापो॒ अभ॑यं कृतम् ॥१॥

Ayushosi prataranam vipram bheshajamuchyase
Tadanjana tvam shantate shamapo abhayam kritam

यो ह॑रि॒मा जा॒यान्यो॑ऽङ्गभे॒दो वि॒सल्प॑कः ।
सर्वं॑ ते॒ यक्ष्म॒मङ्गे॑भ्यो ब॒हिर्नि॑र्ह॒न्त्वाञ्ज॑नम् ॥२॥

Yo harima jayanyongabhedo visalpakah
Sarvam te yakshmamangebhyo bahirnirhantvanjanam

आञ्ज॑नं पृथि॒व्यां जा॒तं भ॒द्रं पु॑रुष॒जीव॑नम्।
कृ॒णोत्वप्र॑मायुकं॒ रथ॑जूति॒मना॑गसम् ॥३॥

Anjanam prithivyam jatam bhadram purushajivanam
Krinotvapramayukam rathajutimanagasam

प्राण॑ प्रा॒णं त्रा॑य॒स्वासो॒ अस॑वे मृड ।
निरृ॑ते॒ निरृ॑त्या नः॒ पाशे॑भ्यो मुञ्च ॥४॥

Prana pranam trayasvaso asave mrida
Nirrite nirritya nah pashebhyo muncha

सिन्धो॒र्गर्भो॑ऽसि वि॒द्युतां॒ पुष्प॑म्।
वातः॑ प्रा॒णः सूर्य॒श्चक्षु॑र्दि॒वस्पयः॑ ॥५॥

Sindhorgarbhosi vidyutam pushpam
Vatah pranah suryashchakshurdivaspayah

देवा॑ञ्जन॒ त्रैक॑कुदं॒ परि॑ मा पाहि वि॒श्वतः॑ ।
न त्वा॑ तर॒न्त्योष॑धयो॒ बाह्याः॑ पर्व॒तीया॑ उ॒त ॥६॥

Devanjana traikakudam pari ma pahi vishvatah
Na tva tarantyoshadhayo bahyah parvatiya uta

वी॒३दं मध्य॒मवा॑सृपद् रक्षो॒हामी॑व॒चात॑नः ।
अमी॑वाः॒ सर्वा॑श्चा॒तय॑न् ना॒शय॑दभि॒भा इ॒तः ॥७॥

Vi3dam madhyamavasripad rakshohamivachatanah
Amivah sarvashchatayan nashayadabhibha itah

ब॒ह्वि॒३दं रा॑जन् वरु॒णानृ॑तमाह॒ पूरु॑षः ।
तस्मा॑त् सहस्रवीर्य मु॒ञ्च नः॒ पर्यंह॑सः ॥८॥

Bahvi3dam rajan varunanritamaha purushah
Tasmat sahasravirya muncha nah paryanhasah

यदापो॑ अ॒घ्न्या इति॒ वरु॒णेति॒ यदू॑चि॒म।
तस्मा॑त् सहस्रवीर्य मु॒ञ्च नः॒ पर्यंह॑सः ॥९॥

Yadapo aghnya iti varuneti yaduchima
Tasmat sahasravirya muncha nah paryanhasah

मि॒त्रश्च॑ त्वा॒ वरु॑णश्चानु॒प्रेय॑तुराञ्जन ।
तौ त्वा॑नु॒गत्य॑ दू॒रं भो॒गाय॒ पुन॒रोह॑तुः ॥१०॥

Mitrashcha tva varunashchanupreyaturanjana
Tau tvanugatya duram bhogaya punarohatuh