Sukta 24

24.1

Rashtram, 1-8 atharva, brahmanaspatih, bahudaivatyam, anushtup, 4-6, 8 trishtup, 7 tripadarshi gayatri

येन॑ दे॒वं स॑वि॒तारं॒ परि॑ दे॒वा अधा॑रयन्।
तेने॒मं ब्र॑ह्मणस्पते॒ परि॑ रा॒ष्ट्राय॑ धत्तन ॥१॥

Yena devam savitaram pari deva adharayan
Tenemam brahmanaspate pari rashtraya dhattana

परी॒ममिन्द्र॒मायु॑षे म॒हे क्ष॒त्राय॑ धत्तन ।
यथै॑नं ज॒रसे॑ न॒यां ज्योक् क्ष॒त्रेऽधि॑ जागरत् ॥२॥

Parimamindramayushe mahe kshatraya dhattana
Yathainam jarase nayam jyok kshatredhi jagarat

परी॒मं सोम॒मायु॑षे म॒हे श्रोत्रा॑य धत्तन ।
यथै॑नं ज॒रसे॒ नयां ज्योक् क्ष॒त्रेऽधि॑ जागरत् ॥३॥

Parimam somamayushe mahe shrotraya dhattana
Yathainam jarase nayam jyok kshatredhi jagarat

परि॑ धत्त ध॒त्त नो॒ वर्च॑से॒मं ज॒रामृ॑त्युं कृणुत दी॒र्घमायुः॑ ।
बृह॒स्पतिः॒ प्राय॑च्छ॒द् वास॑ ए॒तत् सोमा॑य॒ राज्ञे॒ परि॑धात॒वा उ॑ ॥४॥

Pari dhatta dhatta no varchasemam jaramrityum krinuta dirghamayuh
Brihaspatih prayachchhad vasa etat somaya ragye paridhatava u

ज॒रां सु ग॑च्छ॒ परि॑ धत्स्व॒ वासो॒ भवा॑ गृष्टी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒ची रा॒यश्च॒ पोष॑मुप॒संव्य॑यस्व ॥५॥

Jaram su gachchha pari dhatsva vaso bhava grishtinamabhishastipa u
Shatam cha jiva sharadah puruchi rayashcha poshamupasanvyayasva

परी॒दं वासो॑ अधिथाः स्व॒स्तयेऽभू॑र्वापी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒चीर्वसू॑नि॒ चारु॒र्वि भ॑जासि॒ जीव॑न् ॥६॥

Paridam vaso adhithah svastayebhurvapinamabhishastipa u
Shatam cha jiva sharadah puruchirvasuni charurvi bhajasi jivan

योगे॑योगे त॒वस्त॑रं वाजे॑वाजे हवामहे ।
सखा॑य॒ इन्द्र॑मू॒तये॑ ॥७॥

Yogeyoge tavastaram vajevaje havamahe
Sakhaya indramutaye

हिर॑ण्यवर्णो अ॒जरः॑ सु॒वीरो॑ ज॒रामृ॑त्युः प्र॒जया॒ सं वि॑शस्व ।
तद॒ग्निरा॑ह॒ तदु॒ सोम॑ आह॒ बृह॒स्पतिः॑ सवि॒ता तदिन्द्रः॑ ॥८॥

Hiranyavarno ajarah suviro jaramrityuh prajaya sam vishasva
Tadagniraha tadu soma aha brihaspatih savita tadindrah