Sukta 11

11.1

Shantih, 1-6 vasishthah, bahudaivatyam, trishtup

शं नः॑ स॒त्यस्य॒ पत॑यो भवन्तु॒ शं नो॒ अर्व॑न्तः॒ शमु॑ सन्तु॒ गावः॑ ।
शं न॑ ऋ॒भवः॑ सु॒कृतः॑ सु॒हस्ताः॒ शं नो॑ भवतु पि॒तरो॒ हवे॑षु ॥१॥

Sham nah satyasya patayo bhavantu sham no arvantah shamu santu gavah
Sham na ribhavah sukritah suhastah sham no bhavatu pitaro haveshu

शं नो॑ दे॒वा वि॒श्वदे॑वा भवन्तु॒ शं सर॑स्वती स॒ह धी॒भिर॑स्तु ।
शम॑भि॒षाचः॒ शमु॑ राति॒षाचः॒ शं नो॑ दि॒व्याः पार्थि॑वाः॒ शं नो॒ अप्याः॑ ॥२॥

Sham no deva vishvadeva bhavantu sham sarasvati saha dhibhirastu
Shamabhishachah shamu ratishachah sham no divyah parthivah sham no apyah

शं नो॑ अ॒ज एक॑पाद् दे॒वो अ॑स्तु॒ शमहि॑र्बु॒ध्न्यः॑१ शं स॑मु॒द्रः ।
शं नो॑ अ॒पां नपा॑त् पे॒रुर॑स्तु॒ शं नः॒ पृश्नि॑र्भवतु दे॒वगो॑पा ॥३॥

Sham no aja ekapad devo astu shamahirbudhnyah1 sham samudrah
Sham no apam napat perurastu sham nah prishnirbhavatu devagopa

आ॒दि॒त्या रु॒द्रा वस॑वो जुषन्तामि॒दं ब्रह्म॑ क्रि॒यमा॑णं॒ नवी॑यः ।
शृ॒ण्वन्तु॑ नो दि॒व्याः पार्थि॑वासो॒ गोजा॑ता उ॒त ये य॒ज्ञिया॑सः ॥४॥

Aditya rudra vasavo jushantamidam brahma kriyamanam naviyah
Shrinvantu no divyah parthivaso gojata uta ye yagyiyasah

ये दे॒वाना॑मृ॒त्विजो॑ य॒ज्ञिया॑सो॒ मनो॒र्यज॑त्रा अ॒मृता॑ ऋत॒ज्ञाः ।
ते नो॑ रासन्तामुरुगा॒यम॒द्य यू॒यं पा॑त स्व॒स्तिभिः॒ सदा॑ नः ॥५॥

Ye devanamritvijo yagyiyaso manoryajatra amrita ritagyah
Te no rasantamurugayamadya yuyam pata svastibhih sada nah

तद॑स्तु मित्रावरुणा॒ तद॑ग्ने॒ शं योर॒स्मभ्य॑मि॒दम॑स्तु श॒स्तम्।
अ॒शी॒महि॑ गा॒धमु॒त प्र॑ति॒ष्ठां नमो॑ दि॒वे बृ॑ह॒ते साद॑नाय ॥६॥

Tadastu mitravaruna tadagne sham yorasmabhyamidamastu shastam
Ashimahi gadhamuta pratishtham namo dive brihate sadanaya