Sukta 1

1.1

Brahmaudanam, 1-37 brahma, odanah, trishtup, 1 anushtubgarbha, bhurikpanktih, 2 brihatigarbha virat, 3 chatushpada shakvaragarbha jagati, 4, 15-16 bhurik, 5 brihatigarbha virat, 6 ushnik, 8 virad gayatri, 9 shakvaratijagatagarbha jagati, 10 virat purotijagati virad jagati, 11 jagati, 17, 21, 24-26, 29 (bhurik), 37 virad jagati, 18 atijagatagarbha paratijagata viradatijagati, 20 atijagatagarbha para shakvara chatushpada bhurigjagati, 27 atijagatagarbha jagati, 31 bhurik, 35 chatushpada kakummatyushnik, 36 purovirad (vyaghradishvavagantavya)

अग्ने॒ जाय॒स्वादि॑तिर्नाथि॒तेयं ब्र॑ह्मौद॒नं प॑चति पु॒त्रका॑मा ।
स॒प्त॒ऋ॒षयो॑ भूत॒कृत॒स्ते त्वा॑ मन्थन्तु प्र॒जया॑ स॒हे॑ह ॥१॥

Agne jayasvaditirnathiteyam brahmaudanam pachati putrakama
Saptarishayo bhutakritaste tva manthantu prajaya saheha

1.2

कृ॒णु॒त धू॒मं वृ॑षणः सखा॒योऽद्रो॑घाविता॒ वाच॒मच्छ॑ ।
अ॒यम॒ग्निः पृ॑तना॒षाट् सु॒वीरो॑ येन॑ दे॒वा अस॑हन्त॒ दस्यू॑न् ॥२॥

Krinuta dhumam vrishanah sakhayodroghavita vachamachchha
Ayamagnih pritanashat suviro yena deva asahanta dasyun

1.3

अग्नेऽज॑निष्ठा मह॒ते वी॒र्याऽय ब्रह्मौद॒नाय॒ पक्त॑वे जातवेदः ।
स॒प्त॒ऋ॒षयो॑ भूत॒कृत॒स्ते त्वा॑जीजनन्न॒स्यै र॒यिं सर्व॑वीरं॒ नि य॑च्छ ॥३॥

Agnejanishtha mahate viryaya brahmaudanaya paktave jatavedah
Saptarishayo bhutakritaste tvajijanannasyai rayim sarvaviram ni yachchha

1.4

समि॑द्धो अग्ने स॒मिधा॒ समि॑ध्यस्व वि॒द्वान् दे॒वान् य॒ज्ञियाँ॒ एह व॑क्षः ।
तेभ्यो॑ ह॒विः श्र॒पयं॑ जातवेद उत्त॒मं नाक॒मधि॑ रोहये॒मम् ॥४॥

Samiddho agne samidha samidhyasva vidvan devan yagyiyam eha vakshah
Tebhyo havih shrapayam jataveda uttamam nakamadhi rohayemam

1.5

त्रे॒धा भा॒गो निहि॑तो॒ यः पु॒रा वो॑ दे॒वानां॑ पितॄ॒णां मर्त्या॑नाम्।
अंशा॑न् जानीध्वं॒ वि भ॑जामि॒ तान् वो॒ यो दे॒वानां॒ स इ॒मां पा॑रयाति ॥५॥

Tredha bhago nihito yah pura vo devanam pitrinam martyanam
Anshan janidhvam vi bhajami tan vo yo devanam sa imam parayati

1.6

अग्ने॒ सह॑स्वानभि॒भूर॒भीद॑सि॒ नीचो॒ न्युऽब्ज द्विष॒तः स॒पत्ना॑न्।
इ॒यं मात्रा॑ मी॒यमा॑ना मि॒ता च॑ सजा॒तांस्ते॑ बलि॒हृतः॑ कृणोतु ॥६॥

Agne sahasvanabhibhurabhidasi nicho nyubja dvishatah sapatnan
Iyam matra miyamana mita cha sajatanste balihritah krinotu

1.7

सा॒कं स॑जा॒तैः पय॑सा स॒हैध्युदु॑ब्जैनां मह॒ते वी॒र्याऽय ।
ऊ॒र्ध्वो नाक॒स्याधि॑ रोह वि॒ष्टपं॑ स्व॒र्गो लो॒क इति॒ यं वद॑न्ति ॥७॥

Sakam sajataih payasa sahaidhyudubjainam mahate viryaya
Urdhvo nakasyadhi roha vishtapam svargo loka iti yam vadanti

1.8

इ॒यं म॒ही प्रति॑ गृह्णातु॒ चर्म॑ पृथि॒वी दे॒वी सु॑मन॒स्यमा॑ना ।
अथ॑ गच्छेम सुकृ॒तस्य॑ लो॒कम् ॥८॥

Iyam mahi prati grihnatu charma prithivi devi sumanasyamana
Atha gachchhema sukritasya lokam

1.9

ए॒तौ ग्रावा॑णौ स॒युजा॑ युङ्ग्धि॒ चर्म॑णि॒ निर्भि॑न्ध्यं॒शून् यज॑मानाय सा॒धु।
अ॒व॒घ्न॒ती नि ज॑हि॒ य इ॒मां पृ॑त॒न्यव॑ ऊ॒र्ध्वं प्र॒जामु॒द्भर॒न्त्युदू॑ह ॥९॥

Etau gravanau sayuja yungdhi charmani nirbhindhyanshun yajamanaya sadhu
Avaghnati ni jahi ya imam pritanyava urdhvam prajamudbharantyuduha

1.10

गृ॒हा॒ण ग्रावा॑णौ स॒कृतौ॑ वीर॒ हस्त॒ आ ते॑ दे॒वा य॒ज्ञिया॑ य॒ज्ञम॑गुः ।
त्रयो॒ वरा॑ यत॒मांस्त्वं वृ॑णी॒षे तास्ते॒ समृ॑द्धीरि॒ह रा॑धयामि ॥१०॥

Grihana gravanau sakritau vira hasta a te deva yagyiya yagyamaguh
Trayo vara yatamanstvam vrinishe taste samriddhiriha radhayami

1.11

इ॒यं ते॑ धी॒तिरि॒दमु॑ ते ज॒नित्रं॑ गृ॒ह्णातु॒ त्वामदि॑तिः॒ शूर॑पुत्रा ।
परा॑ पुनीहि॒ य इ॒मां पृ॑त॒न्यवो॒ऽस्यै र॒यिं सर्व॑वीरं॒ नि य॑च्छ ॥११॥

Iyam te dhitiridamu te janitram grihnatu tvamaditih shuraputra
Para punihi ya imam pritanyavosyai rayim sarvaviram ni yachchha

1.12

उ॒प॒श्व॒से द्रु॒वये॑ सीदता यू॒यं वि वि॑च्यध्वं यज्ञियास॒स्तुषैः॑ ।
श्रि॒या स॑मा॒नानति॒ सर्वा॑न्त्स्यामाधस्प॒दं द्वि॑ष॒तस्पा॑दयामि ॥१२॥

Upashvase druvaye sidata yuyam vi vichyadhvam yagyiyasastushaih
Shriya samananati sarvantsyamadhaspadam dvishataspadayami

1.13

परे॑हि नारि॒ पुन॑रेहि॑ क्षि॒प्रम॒पां त्वा॑ गो॒ष्ठोऽध्य॑रुक्ष॒द् भरा॑य ।
तासां॑ गृह्णीताद् यत॒मा य॒ज्ञिया॒ अस॑न् वि॒भाज्य॑ धी॒रीत॑रा जहीतात् ॥१३॥

Parehi nari punarehi kshipramapam tva goshthodhyarukshad bharaya
Tasam grihnitad yatama yagyiya asan vibhajya dhiritara jahitat

1.14

एमा अ॑गुर्यो॒षितः॒ शुम्भ॑माना॒ उत्ति॑ष्ठ नारि त॒वसं॑ रभस्व ।
सु॒पत्नी॒ पत्या॑ प्र॒जया॑ प्र॒जाव॒त्या त्वा॑गन् यज्ञः प्रति॑ कु॒म्भं गृ॑भाय ॥१४॥

Ema aguryoshitah shumbhamana uttishtha nari tavasam rabhasva
Supatni patya prajaya prajavatya tvagan yagyah prati kumbham gribhaya

1.15

ऊ॒र्जो भा॒गो निहि॑तो॒ यः पु॒रा व॒ ऋषि॑प्रशिष्टा॒प आ भ॑रै॒ताः ।
अ॒यं य॒जो गा॑तु॒विन्ना॑थ॒वित् प्र॑जा॒विदु॒ग्रः प॑शु॒विद् वी॑र॒विद् वो॑ अस्तु ॥१५॥

Urjo bhago nihito yah pura va rishiprashishtapa a bharaitah
Ayam yajo gatuvinnathavit prajavidugrah pashuvid viravid vo astu

1.16

अग्ने॑ च॒रुर्य॒ज्ञिय॒स्त्वाध्य॑रुक्ष॒च्छुचि॒स्तपि॑ष्ठ॒स्तप॑सा तपैनम्।
आ॒र्षे॒या दै॒वा अ॑भिसं॒गत्य॒ भा॒गमि॒मं तपि॑ष्ठा ऋ॒तुभि॑स्तपन्तु ॥१६॥

Agne charuryagyiyastvadhyarukshachchhuchistapishthastapasa tapainam
Arsheya daiva abhisangatya bhagamimam tapishtha ritubhistapantu

1.17

शु॒द्धाः पू॒ता यो॒षितो॑ य॒ज्ञिया॑ इ॒मा आप॑श्च॒रुमव॑ सर्पन्तु शु॒भ्राः ।
अदुः॑ प्र॒जां ब॑हु॒लान् प॒शून् नः॑ प॒क्तौद॒नस्य॑ सु॒कृता॑मेतु लो॒कम् ॥१७॥

Shuddhah puta yoshito yagyiya ima apashcharumava sarpantu shubhrah
Aduh prajam bahulan pashun nah paktaudanasya sukritametu lokam

1.18

ब्रह्म॑णा शु॒द्धा उ॒त पू॒ता घृ॒तेन॑ सोम॑स्यां॒शव॑स्तण्डु॒ला य॒ज्ञिया॑ इ॒मे।
अ॒पः प्र वि॑शत॒ प्रति॑ गृह्णातु वश्च॒रुरि॒मं प॒क्त्वा सु॒कृता॑मेत लो॒कम् ॥१८॥

Brahmana shuddha uta puta ghritena somasyanshavastandula yagyiya ime
Apah pra vishata prati grihnatu vashcharurimam paktva sukritameta lokam

1.19

उ॒रुः प्र॑थस्व मह॒ता म॑हि॒म्ना स॒हस्र॑पृष्ठः सुकृ॒तस्य॑ लो॒के।
पि॒ता॒म॒हाः पि॒तरः॑ प्र॒जोप॒जाहं प॒क्ता प॑ञ्चद॒शस्ते॑ अस्मि ॥१९॥

Uruh prathasva mahata mahimna sahasraprishthah sukritasya loke
Pitamahah pitarah prajopajaham pakta panchadashaste asmi

1.20

स॒हस्र॑पृष्ठः श॒तधा॑रो॒ अक्षि॑तो ब्रह्मौद॒नो दे॑व॒यानः॑ स्व॒र्गः ।
अ॒मूंस्त॒ आ द॑धामि प्र॒जया॑ रेषयैनान् बलिहा॒राय॑ मृडता॒न्मह्य॑मे॒व ॥२०॥

Sahasraprishthah shatadharo akshito brahmaudano devayanah svargah
Amunsta a dadhami prajaya reshayainan baliharaya mridatanmahyameva

1.21

उ॒देहि॒ वेदिं॑ प्र॒जया॑ वर्धयैनां नु॒दस्व॒ रक्षः॑ प्रत॒रं धे॑ह्येनाम्।
श्रि॒या स॑मा॒नानति॒ सर्वा॑न्त्स्यामाधस्प॒दं द्वि॑ष॒तस्पा॑दयामि ॥२१॥

Udehi vedim prajaya vardhayainam nudasva rakshah prataram dhehyenam
Shriya samananati sarvantsyamadhaspadam dvishataspadayami

1.22

अ॒भ्याव॑र्तस्व प॒शुभिः॑ स॒हैनां॑ प्र॒त्यङे॑नां दे॒वता॑भिः स॒हैधि॑ ।
मा त्वा॒ प्राप॑च्छ॒पथो॒ माभि॑चा॒रः स्वे क्षेत्रे॑ अनमी॒वा वि रा॑ज ॥२२॥

Abhyavartasva pashubhih sahainam pratyangenam devatabhih sahaidhi
Ma tva prapachchhapatho mabhicharah sve kshetre anamiva vi raja

1.23

ऋ॒तेन॑ त॒ष्टा मन॑सा हि॒तैषा ब्र॑ह्मौद॒नस्य॒ विहि॑ता॒ वेदि॒रग्रे॑ ।
अं॒स॒द्रीं शु॒द्धामुप॑ धेहि नारि॒ तत्रौ॑द॒नं सा॑दय दै॒वाना॑म् ॥२३॥

Ritena tashta manasa hitaisha brahmaudanasya vihita vediragre
Ansadrim shuddhamupa dhehi nari tatraudanam sadaya daivanam

1.24

अदि॑ते॒र्हस्तां॒ स्रुच॑मे॒तां द्वि॒तीयां॑ सप्तऋ॒षयो॑ भूत॒कृतो॒ यामकृ॑ण्वन्।
सा गात्रा॑णि वि॒दुष्यो॑द॒नस्य॒ दर्वि॒र्वेद्या॒मध्ये॑नं चिनोतु ॥२४॥

Aditerhastam sruchametam dvitiyam saptarishayo bhutakrito yamakrinvan
Sa gatrani vidushyodanasya darvirvedyamadhyenam chinotu

1.25

शृ॒तं त्वा॑ ह॒व्यमुप॑ सीदन्तु दै॒वा निः॒सृप्या॒ग्नेः पुन॑रेना॒न् प्र सी॑द ।
सोमे॑न पू॒तो ज॒ठरे॑ सीद ब्र॒ह्म॑णामार्षे॒यास्ते॒ मा रि॑षन् प्राशि॒तारः॑ ॥२५॥

Shritam tva havyamupa sidantu daiva nihsripyagneh punarenan pra sida
Somena puto jathare sida brahmanamarsheyaste ma rishan prashitarah

1.26

सोम॑ राजन्त्सं॒ज्ञान॒मा व॑पैभ्यः॒ सुब्रा॑ह्मणा यत॒मे त्वो॑प॒सीदा॑न्।
ऋषी॑नार्षे॒यांस्तप॒सोऽधि॑ जा॒तान् ब्र॑ह्मौद॒ने सु॒हवा॑ जोहवीमि ॥२६॥

Soma rajantsangyanama vapaibhyah subrahmana yatame tvopasidan
Rishinarsheyanstapasodhi jatan brahmaudane suhava johavimi

1.27

शु॒द्धाः पू॒ता यो॒षितो॑ य॒ज्ञिया॑ इ॒मा ब्र॒ह्मणां॒ हस्ते॑षु प्रपृ॒थक् सा॑दयामि ।
यत् का॑म इ॒दम॑भिषि॒ञ्चामि॑ वो॒ऽहमिन्द्रो॑ म॒रुत्वा॒न्त्स द॑दादि॒दं मे॑ ॥२७॥

Shuddhah puta yoshito yagyiya ima brahmanam hasteshu praprithak sadayami
Yat kama idamabhishinchami vohamindro marutvantsa dadadidam me

1.28

इ॒दं मे॒ ज्योति॑र॒मृतं॒ हिर॑ण्यं प॒क्वं क्षेत्रा॑त् काम॒दुघा॑ म ए॒षा।
इ॒दं ध॒नं नि द॑धे ब्राह्म॒णेषु॑ कृ॒ण्वे पन्थां॑ पि॒तृषु॒ यः स्व॒र्गः ॥२८॥

Idam me jyotiramritam hiranyam pakvam kshetrat kamadugha ma esha
Idam dhanam ni dadhe brahmaneshu krinve pantham pitrishu yah svargah

1.29

अ॒ग्नौ तुषा॒ना व॑प जा॒तवे॑दसि प॒रः क॒म्बूकाँ॒ अप॑ मृड्ढि दू॒रम्।
ए॒तं शु॑श्रुम गृहरा॒जस्य॑ भा॒गमथो॑ विद्म॒ निरृ॑तेर्भाग॒धेय॑म् ॥२९॥

Agnau tushana vapa jatavedasi parah kambukam apa mriddhi duram
Etam shushruma griharajasya bhagamatho vidma nirriterbhagadheyam

1.30

श्राम्य॑तः॒ पच॑तो विद्धि सुन्व॒तः पन्थां॑ स्व॒र्गमधि॑ रोहयैनम्।
येन॒ रोहा॒त् पर॑मा॒पद्य॒ यद् वय॑ उत्त॒मं नाकं॑ पर॒मं व्योऽम ॥३०॥

Shramyatah pachato viddhi sunvatah pantham svargamadhi rohayainam
Yena rohat paramapadya yad vaya uttamam nakam paramam vyoma

1.31

ब॒भ्रेर॑ध्वर्यो॒ मुख॑मे॒तद् वि मृ॒ड्ढ्याज्या॑य लो॒कं कृ॑णुहि प्रवि॒द्वान्।
घृ॒तेन॒ गात्रानु॒ सर्वा॒ वि मृ॑ड्ढि कृ॒ण्वे पन्थां॑ पि॒तृषु॒ यः स्व॒र्गः ॥३१॥

Babhreradhvaryo mukhametad vi mriddhyajyaya lokam krinuhi pravidvan
Ghritena gatranu sarva vi mriddhi krinve pantham pitrishu yah svargah

1.32

बभ्रे॒ रक्षः॑ स॒मद॒मा व॑पै॒भ्योऽब्रा॑ह्मणा यत॒मे त्वो॑प॒सीदा॑न्।
पु॒री॒षिणः॒ प्रथ॑मानाः पु॒रस्ता॑दार्षे॒यास्ते॒ मा रि॑षन् प्राशि॒तारः॑ ॥३२॥

Babhre rakshah samadama vapaibhyobrahmana yatame tvopasidan
Purishinah prathamanah purastadarsheyaste ma rishan prashitarah

1.33

आ॒र्षे॒येषु॒ नि द॑ध ओदन त्वा॒ नाना॑र्षेयाणा॒मप्य॒स्त्यत्र॑ ।
अ॒ग्निर्मे॑ गो॒प्ता म॒रुत॑श्च॒ सर्वे॒ विश्वे॑ दे॒वा अ॒भि र॑क्षन्तु प॒क्वम् ॥३३॥

Arsheyeshu ni dadha odana tva nanarsheyanamapyastyatra
Agnirme gopta marutashcha sarve vishve deva abhi rakshantu pakvam

1.34

य॒ज्ञं दुहा॑नं॒ सद॒मित् प्रपी॑नं॒ पुमां॑सं धे॒नुं सद॑नं रयी॒णाम्।
प्र॒जा॒मृ॒त॒त्वमु॒त दी॒र्घमायू॑ रा॒यश्च॒ पोषै॒रुप॑ त्वा सदेम ॥३४॥

Yagyam duhanam sadamit prapinam pumansam dhenum sadanam rayinam
Prajamritatvamuta dirghamayu rayashcha poshairupa tva sadema

1.35

वृ॒ष॒भोऽसि स्व॒र्ग ऋषी॑नार्षे॒यान् ग॑च्छ ।
सु॒कृतां॑ लो॒के सी॑द॒ तत्र॑ नौ संस्कृ॒तम् ॥३५॥

Vrishabhosi svarga rishinarsheyan gachchha
Sukritam loke sida tatra nau sanskritam

1.36

स॒माचि॑नुष्वानुस॒म्प्रया॑ह्यग्ने प॒थः क॑ल्पय देव॒याना॑न्।
ए॒तैः सु॑कृ॒तैरनु॑ गच्छेम य॒ज्ञं नाके॒ तिष्ठ॑न्त॒मधि॑ स॒प्तर॑श्मौ ॥३६॥

Samachinushvanusamprayahyagne pathah kalpaya devayanan
Etaih sukritairanu gachchhema yagyam nake tishthantamadhi saptarashmau

1.37

येन॑ दे॒वा ज्योति॑षा॒ द्यामु॒दाय॑न् ब्रह्मौद॒नं प॒क्त्वा सु॑कृ॒तस्य॑ लो॒कम्।
तेन॑ गेष्म सुकृ॒तस्य॑ लो॒कं स्वऽरा॒रोह॑न्तो अ॒भि नाक॑मुत्त॒मम् ॥३७॥

Yena deva jyotisha dyamudayan brahmaudanam paktva sukritasya lokam
Tena geshma sukritasya lokam svararohanto abhi nakamuttamam