Sukta 4

4.1

Sarpavishadurikaranam, 1-26 garutman, takshakah, anushtup, 1 pathyapanktih, 2 tripada yavamadhya gayatri, 3-4 pathyabrihati, 8 ushniggarbha para trishtup, 12 bhuriggayatri, 16 tripada pratishthagayatri, 21 kakummati, 23 trishtup, 26 tryavasana shat-pada brihatigarbha kakummati bhurik trishtup

इन्द्र॑स्य प्रथ॒मो रथो॑ दे॒वाना॒मप॑रो॒ रथो॒ वरु॑णस्य तृ॒तीय॒ इत्।
अही॑नामप॒मा रथ॑ स्था॒णुमा॑र॒दथा॑र्षत् ॥१॥

Indrasya prathamo ratho devanamaparo ratho varunasya tritiya it
Ahinamapama ratha sthanumaradatharshat

4.2

द॒र्भः शो॒चिस्त॒रूण॑क॒मश्व॑स्य॒ वारः॑ परु॒षस्य॒ वारः॑ । रथ॑स्य॒ बन्धु॑रम् ॥२॥

Darbhah shochistarunakamashvasya varah parushasya varah, rathasya bandhuram

4.3

अव॑ श्वेत प॒दा ज॑हि॒ पूर्वे॑ण॒ चा प॑रेण च । उ॒द॒प्लु॒तमि॑व॒ दार्वही॑नामर॒सं वि॒षं वारु॒ग्रम् ॥३॥

Ava shveta pada jahi purvena cha parena cha, udaplutamiva darvahinamarasam visham varugram

4.4

अ॒रं॒घु॒षो नि॒मज्यो॒न्मज्य॒ पुन॑रब्रवीत्। उ॒द॒प्लु॒तमि॑व॒ दार्वही॑नामर॒सं वि॒षं वारु॒ग्रम् ॥४॥

Aranghusho nimajyonmajya punarabravit, udaplutamiva darvahinamarasam visham varugram

4.5

पै॒द्वो ह॑न्ति कस॒र्णीलं॑ पै॒द्वः श्वि॒त्रमु॒तासि॒तम्। पै॒द्वो र॑थ॒र्व्याः शिरः॒ सं बि॑भेद पृदा॒क्वाः ॥५॥

Paidvo hanti kasarnilam paidvah shvitramutasitam, paidvo ratharvyah shirah sam bibheda pridakvah

4.6

पैद्व॒ प्रेहि॑ प्रथ॒मोऽनु॑ त्वा व॒यमेम॑सि । अही॒न् व्यऽस्यतात् प॒थो येन॑ स्मा व॒यमे॒मसि॑ ॥६॥

Paidva prehi prathamonu tva vayamemasi, ahin vyasyatat patho yena sma vayamemasi

4.7

इ॒दं पै॒द्वो अ॑जायते॒दम॑स्य प॒राय॑णम्। इ॒मान्यर्व॑तः प॒दाहि॒घ्न्यो वा॒जिनी॑वतः ॥७॥

Idam paidvo ajayatedamasya parayanam, imanyarvatah padahighnyo vajinivatah

4.8

संय॑तं॒ न वि ष्प॑र॒द् व्यात्तं॒ न सं य॑मत्।
अ॒स्मिन् क्षेत्रे॒ द्वावही॒ स्त्री च॒ पुमां॑श्च॒ तावु॒भाव॑र॒सा ॥८॥

Sanyatam na vi shparad vyattam na sam yamat
Asmin kshetre dvavahi stri cha pumanshcha tavubhavarasa

4.9

अ॒र॒सास॑ इ॒हाह॑यो॒ ये अन्ति॒ ये च॑ दूर॒के। घ॒नेन॑ हन्मि॒ वृश्चि॑क॒महिं॑ द॒ण्डेनाग॑तम् ॥९॥

Arasasa ihahayo ye anti ye cha durake, ghanena hanmi vrishchikamahim dandenagatam

4.10

अ॒घा॒श्वस्ये॒दं भे॑ष॒जमु॒भयो॑ स्व॒जस्य॑ च । इन्द्रो॒ मेऽहि॑मघा॒यन्त॒महिं॑ पै॒द्वो अ॑रन्धयत् ॥१०॥

Aghashvasyedam bheshajamubhayo svajasya cha, indro mehimaghayantamahim paidvo arandhayat

4.11

पै॒द्वस्य॑ मन्महे व॒यं स्थि॒रस्य॑ स्थि॒रधा॑म्नः। इ॒मे प॒श्चा पृदा॑कवः प्र॒दीध्य॑त आसते ॥११॥

Paidvasya manmahe vayam sthirasya sthiradhamnah, ime pashcha pridakavah pradidhyata asate

4.12

न॒ष्टास॑वो न॒ष्टवि॑षा ह॒ता इन्द्रे॑ण व॒ज्रिणा॑ । ज॒घानेन्द्रो॑ जघ्नि॒मा व॒यम् ॥१२॥

Nashtasavo nashtavisha hata indrena vajrina, jaghanendro jaghnima vayam

4.13

ह॒तास्तिर॑श्चिराजयो॒ निपि॑ष्टासः॒ पृदा॑कवः । दर्विं॒ करि॑क्रतं श्वि॒त्रं द॒र्भेष्व॑सि॒तं ज॑हि ॥१३॥

Hatastirashchirajayo nipishtasah pridakavah, darvim karikratam shvitram darbheshvasitam jahi

4.14

कै॒रा॒ति॒का कु॑मारि॒का स॒का ख॑नति भेष॒जम्। हि॒र॒ण्ययी॑भि॒रभ्रि॑भिर्गिरी॒णामुप॒ सानु॑षु ॥१४॥

Kairatika kumarika saka khanati bheshajam, hiranyayibhirabhribhirgirinamupa sanushu

4.15

आयम॑ग॒न् युवा॑ भि॒षक् पृ॑श्नि॒हाप॑राजितः । स वै स्व॒जस्य॒ जम्भ॑न उ॒भयो॒र्वृश्चि॑कस्य च ॥१५॥

Ayamagan yuva bhishak prishnihaparajitah, sa vai svajasya jambhana ubhayorvrishchikasya cha

4.16

इन्द्रो॒ मेऽहि॑मरन्धयन्मि॒त्रश्च॒ वरु॑णश्च । वा॒ता॒प॒र्ज॒न्यो॒३भा ॥१६॥

Indro mehimarandhayanmitrashcha varunashcha, vataparjanyo3bha

4.17

इन्द्रो॒ मेऽहि॑मरन्धय॒त् पृदा॑कुं च पृदा॒क्वम्। स्व॒जं तिर॑श्चिराजिं कस॒र्णीलं॒ दशो॑नसिम् ॥१७॥

Indro mehimarandhayat pridakum cha pridakvam, svajam tirashchirajim kasarnilam dashonasim

4.18

इन्द्रो॑ जघान प्रथ॒मं ज॑नि॒तार॑महे॒ तव॑ । तेषा॑मु तृ॒ह्यमा॑णानां॒ कः स्वि॒त् तेषा॑मस॒द् रसः॑ ॥१८॥

Indro jaghana prathamam janitaramahe tava, teshamu trihyamananam kah svit teshamasad rasah

4.19

सं हि शी॒र्षाण्यग्र॑भं पौञ्जि॒ष्ठ इ॑व॒ कर्व॑रम्। सिन्धो॒र्मध्यं॑ प॒रेत्य॒ व्यऽनिज॒महे॑र्वि॒षम् ॥१९॥

Sam hi shirshanyagrabham paunjishtha iva karvaram, sindhormadhyam paretya vyanijamahervisham

4.20

अही॑नां॒ सर्वे॑षां वि॒षं परा॑ वहन्तु॒ सिन्ध॑वः । ह॒तास्तिर॑श्चिराजयो॒ निपि॑ष्टासः पृदा॑कवः ॥२०॥

Ahinam sarvesham visham para vahantu sindhavah, hatastirashchirajayo nipishtasah pridakavah

4.21

ओष॑धीनाम॒हं वृ॑ण उ॒र्वरी॑रिव साधु॒या। नया॒म्यर्व॑तीरि॒वाहे॑ नि॒रैतु॑ ते वि॒षम् ॥२१॥

Oshadhinamaham vrina urvaririva sadhuya, nayamyarvatirivahe niraitu te visham

4.22

यद॒ग्नौ सूर्ये॑ वि॒षं पृ॑थि॒व्यामोष॑धीषु॒ यत्। का॒न्दा॒वि॒षं क॒नक्न॑कं नि॒रैत्वैतु॑ ते वि॒षम् ॥२२॥

Yadagnau surye visham prithivyamoshadhishu yat, kandavisham kanaknakam niraitvaitu te visham

4.23

ये अ॑ग्नि॒जा ओ॑षधि॒जा अही॑नां॒ ये अ॑प्सु॒जा वि॒द्युत॑ आबभू॒वुः ।
येषां॑ जा॒तानि॑ बहु॒धा म॒हान्ति॒ तेभ्यः॑ स॒र्पेभ्यो॒ नम॑सा विधेम ॥२३॥

Ye agnija oshadhija ahinam ye apsuja vidyuta ababhuvuh
Yesham jatani bahudha mahanti tebhyah sarpebhyo namasa vidhema

4.24

तौदी॒ नामा॑सि क॒न्याऽघृ॒ताची॒ नाम॒ वा अ॑सि । अ॒ध॒स्प॒देन॑ ते प॒दमा द॑दे विष॒दूष॑णम् ॥२४॥

Taudi namasi kanyaghritachi nama va asi, adhaspadena te padama dade vishadushanam

4.25

अङ्गा॑दङ्गा॒त् प्र च्या॑वय॒ हृद॑यं परि॑ वर्जय । अधा॑ वि॒षस्य॒ यत् तेजो॑ऽवा॒चीनं॒ तदे॑तु ते ॥२५॥

Angadangat pra chyavaya hridayam pari varjaya, adha vishasya yat tejovachinam tadetu te

4.26

आ॒रे अ॑भूद् विषम॑रौद् वि॒षे वि॒षम॑प्रा॒गपि॑ ।अ॒ग्निर्वि॒षमहे॒र्निर॑धा॒त् सोमो॒ निर॑णयीत्।
दं॒ष्टार॒मन्व॑गाद् विषमहि॑रमृत ॥२६॥

Are abhud vishamaraud vishe vishamapragapi, agnirvishamaherniradhat somo niranayit
Danshtaramanvagad vishamahiramrita