Sukta 34

34.1

Madhuvidya, 1-5 atharva, madhuvanaspatih, anushtup

इ॒यं वी॒रुन्मधु॑जाता॒ मधु॑ना त्वा खनामसि ।
मधो॒रधि॒ प्रजा॑तासि॒ सा नो॒ मधु॑मतस्कृधि ॥१॥

Iyam virunmadhujata madhuna tva khanamasi
Madhoradhi prajatasi sa no madhumataskridhi

जि॒ह्वाया॒ अग्रे॒ मधु॑ मे जिह्वामू॒ले म॒धूल॑कम्।
ममेदह॒ क्रता॒वसो॒ मम॑ चि॒त्तमु॒पाय॑सि ॥२॥

Jihvaya agre madhu me jihvamule madhulakam
Mamedaha kratavaso mama chittamupayasi

मधु॑मन्मे नि॒क्रम॑णं॒ मधु॑मन्मे प॒राय॑णम्।
वा॒चा व॑दामि॒ मधु॑मद् भू॒यासं॒ मधु॑संदृशः ॥३॥

Madhumanme nikramanam madhumanme parayanam
Vacha vadami madhumad bhuyasam madhusandrishah

मधो॑रस्मि॒ मधु॑तरो म॒दुघा॒न्मधु॑मत्तरः ।
मामित् किल॒ त्वं वनाः॒ शाखां॒ मधु॑मतीमिव ॥४॥

Madhorasmi madhutaro madughanmadhumattarah
Mamit kila tvam vanah shakham madhumatimiva

परि॑ त्वा परित॒त्नुने॒क्षुणा॑गा॒मवि॑द्विषे ।
यथा॒ मां का॒मिन्यसो॒ यथा॒ मन्नाप॑गा॒ असः॑ ॥५॥

Pari tva paritatnunekshunagamavidvishe
Yatha mam kaminyaso yatha mannapaga asah