সূক্ত 63

63.1

৩০নিধ্রুবিঃ কাশ্যপঃ । পবমানঃ সোমঃ । গায়ত্রী ।

আ পবস্ব সহস্রিণং রয়িং সোম সুবীর্যম্ । অস্মে শ্রবাংসি ধারয় ॥১॥

63.2

ইষমূর্জং চ পিন্বস ইন্দ্রায় মত্সরিন্তমঃ । চমূষ্বা নি ষীদসি ॥২॥

63.3

সুত ইন্দ্রায় বিষ্ণবে সোমঃ কলশে অক্ষরৎ । মধুমাঁ অস্তু বায়বে ॥৩॥

63.4

এতে অসৃগ্রমাশবোঽতি হ্বরাংসি বভ্রবঃ । সোমা ঋতস্য ধারয়া ॥৪॥

63.5

ইন্দ্রং বর্ধন্তো অপ্তুরঃ কৃণ্বন্তো বিশ্বমার্যম্ । অপঘ্নন্তো অরাব্ণঃ ॥৫॥

63.6

সুতা অনু স্বমা রজোঽভ্যর্ষন্তি বভ্রবঃ । ইন্দ্রং গচ্ছন্ত ইন্দবঃ ॥৬॥

63.7

অয়া পবস্ব ধারয়া যয়া সূর্যমরোচয়ঃ । হিন্বানো মানুষীরপঃ ॥৭॥

63.8

অয়ুক্ত সূর এতশং পবমানো মনাবধি । অন্তরিক্ষেণ যাতবে ॥৮॥

63.9

উত ত্যা হরিতো দশ সূরো অয়ুক্ত যাতবে । ইন্দুরিন্দ্র ইতি ব্রুবন্ ॥৯॥

63.10

পরীতো বায়বে সুতং গির ইন্দ্রায় মত্সরম্ । অব্যো বারেষু সিঞ্চত ॥১০॥

63.11

পবমান বিদা রয়িমস্মভ্যং সোম দুষ্টরম্ । যো দূণাশো বনুষ্যতা ॥১১॥

63.12

অভ্যর্ষ সহস্রিণং রয়িং গোমন্তমশ্বিনম্ । অভি বাজমুত শ্রবঃ ॥১২॥

63.13

সোমো দেবো ন সূর্যোঽদ্রিভিঃ পবতে সুতঃ । দধানঃ কলশে রসম্ ॥১৩॥

63.14

এতে ধামান্যার্যা শুক্রা ঋতস্য ধারয়া । বাজং গোমন্তমক্ষরন্ ॥১৪॥

63.15

সুতা ইন্দ্রায় বজ্রিণে সোমাসো দধ্যাশিরঃ । পবিত্রমত্যক্ষরন্ ॥১৫॥

63.16

প্র সোম মধুমত্তমো রায়ে অর্ষ পবিত্র আ । মদো যো দেববীতমঃ ॥১৬॥

63.17

তমী মৃজন্ত্যায়বো হরিং নদীষু বাজিনম্ । ইন্দুমিন্দ্রায় মত্সরম্ ॥১৭॥

63.18

আ পবস্ব হিরণ্যবদশ্বাবত্সোম বীরবৎ । বাজং গোমন্তমা ভর ॥১৮॥

63.19

পরি বাজে ন বাজয়ুমব্যো বারেষু সিঞ্চত । ইন্দ্রায় মধুমত্তমম্ ॥১৯॥

63.20

কবিং মৃজন্তি মর্জ্যং ধীভির্বিপ্রা অবস্যবঃ । বৃষা কনিক্রদর্ষতি ॥২০॥

63.21

বৃষণং ধীভিরপ্তুরং সোমমৃতস্য ধারয়া । মতী বিপ্রাঃ সমস্বরন্ ॥২১॥

63.22

পবস্ব দেবায়ুষগিন্দ্রং গচ্ছতু তে মদঃ । বায়ুমা রোহ ধর্মণা ॥২২॥

63.23

পবমান নি তোশসে রয়িং সোম শ্রবায্যম্ । প্রিয়ঃ সমুদ্রমা বিশ ॥২৩॥

63.24

অপঘ্নন্পবসে মৃধঃ ক্রতুবিত্সোম মত্সরঃ । নুদস্বাদেবয়ুং জনম্ ॥২৪॥

63.25

পবমানা অসৃক্ষত সোমাঃ শুক্রাস ইন্দবঃ । অভি বিশ্বানি কাব্যা ॥২৫॥

63.26

পবমানাস আশবঃ শুভ্রা অসৃগ্রমিন্দবঃ । ঘ্নন্তো বিশ্বা অপ দ্বিষঃ ॥২৬॥

63.27

পবমানা দিবস্পর্যন্তরিক্ষাদসৃক্ষত । পৃথিব্যা অধি সানবি ॥২৭॥

63.28

পুনানঃ সোম ধারয়েন্দো বিশ্বা অপ স্রিধঃ । জহি রক্ষাংসি সুক্রতো ॥২৮॥

63.29

অপঘ্নন্ত্সোম রক্ষসোঽভ্যর্ষ কনিক্রদৎ । দ্যুমন্তং শুষ্মমুত্তমম্ ॥২৯॥

63.30

অস্মে বসূনি ধারয় সোম দিব্যানি পার্থিবা । ইন্দো বিশ্বানি বার্যা ॥৩০॥