সূক্ত 5

5.1

১১ কাশ্যপোঽসিতো দেবলো বা । পবমানঃ সোমঃ । গায়ত্রী ।

সমিদ্ধো বিশ্বতস্পতিঃ পবমানো বি রাজতি । প্রীণন্বৃষা কনিক্রদৎ ॥১॥

5.2

তনূনপাত্পবমানঃ শৃঙ্গে শিশানো অর্ষতি । অন্তরিক্ষেণ রারজৎ ॥২॥

5.3

ঈলেন্যঃ পবমানো রয়ির্বি রাজতি দ্যুমান্ । মধোর্ধারাভিরোজসা ॥৩॥

5.4

বর্হিঃ প্রাচীনমোজসা পবমানঃ স্তৃণন্হরিঃ । দেবেষু দেব ঈয়তে ॥৪॥

5.5

উদাতৈর্জিহতে বৃহদ্দ্বারো দেবীর্হিরণ্যয়ীঃ । পবমানেন সুষ্টুতাঃ ॥৫॥

5.6

সুশিল্পে বৃহতী মহী পবমানো বৃষণ্যতি । নক্তোষাসা ন দর্শতে ॥৬॥

5.7

উভা দেবা নৃচক্ষসা হোতারা দৈব্যা হুবে । পবমান ইন্দ্রো বৃষা ॥৭॥

5.8

ভারতী পবমানস্য সরস্বতীলা মহী । ইমং নো যজ্ঞমা গমন্তিস্রো দেবীঃ সুপেশসঃ ॥৮॥

5.9

ত্বষ্টারমগ্রজাং গোপাং পুরোয়াবানমা হুবে । ইন্দুরিন্দ্রো বৃষা হরিঃ পবমানঃ প্রজাপতিঃ ॥৯॥

5.10

বনস্পতিং পবমান মধ্বা সমঙ্গ্ধি ধারয়া । সহস্রবল্শং হরিতং ভ্রাজমানং হিরণ্যয়ম্ ॥১০॥

5.11

বিশ্বে দেবাঃ স্বাহাকৃতিং পবমানস্যা গত । বায়ুর্বৃহস্পতিঃ সূর্যোঽগ্নিরিন্দ্রঃ সজোষসঃ ॥১১॥