সূক্ত 82

82.1

৭ বিশ্বকর্মা ভৌবনঃ। বিশ্বকর্মা। ত্রিষ্টুপ্ ।

চক্ষুষঃ পিতা মনসা হি ধীরো ঘৃতমেনে অজনন্নন্নমানে ।
যদেদন্তা অদদৃহন্ত পূর্ব আদিদ্দ্যাবাপৃথিবী অপ্রথেতাম্ ॥১॥

82.2

বিশ্বকর্মা বিমনা আদ্বিহায়া ধাতা বিধাতা পরমোত সংদৃক্ ।
তেষামিষ্টানি সমিষা মদন্তি যত্রা সপ্তঋষীন্পর একমাহুঃ ॥২॥

82.3

যো নঃ পিতা জনিতা যো বিধাতা ধামানি বেদ ভুবনানি বিশ্বা ।
যো দেবানাং নামধা এক এব তং সম্প্রশ্নং ভুবনা যন্ত্যন্যা ॥৩॥

82.4

ত আয়জন্ত দ্রবিণং সমস্মা ঋষয়ঃ পূর্বে জরিতারো ন ভূনা ।
অসূর্তে সূর্তে রজসি নিষত্তে যে ভূতানি সমকৃণ্বন্নিমানি ॥৪॥

82.5

পরো দিবা পর এনা পৃথিব্যা পরো দেবেভিরসুরৈর্যদস্তি ।
কং স্বিদ্গর্ভং প্রথমং দধ্র আপো যত্র দেবাঃ সমপশ্যন্ত বিশ্বে ॥৫॥

82.6

তমিদ্গর্ভং প্রথমং দধ্র আপো যত্র দেবাঃ সমগচ্ছন্ত বিশ্বে ।
অজস্য নাভাবধ্যেকমর্পিতং যস্মিন্বিশ্বানি ভুবনানি তস্থুঃ ॥৬॥

82.7

ন তং বিদাথ য ইমা জজানাঽন্যদ্যুষ্মাকমন্তরং বভূব ।
নীহারেণ প্রাবৃতা জল্প্যা চাঽসুতৃপ উক্থশাসশ্চরন্তি ॥৭॥