সূক্ত 116

116.1

মধুমদন্নম্। ১-৩ জাটিকায়নঃ। বিবস্বান্। জগতী, ২ ত্রিষ্টুপ্।

যদ্ যামং চক্রুর্নিখনন্তো অগ্রে কার্ষীবণা অন্নবিদো ন বিদ্যয়া ।
বৈবস্বতে রাজনি তজ্জুহোম্যথ যজ্ঞিয়ং মধুমদস্তু নোঽন্নম্ ॥১॥

116.2

বৈবস্বতঃ কৃণবদ্ ভাগধেয়ং মধুভাগো মধুনা সং সৃজাতি ।
মাতুর্যদেন ইষিতং ন আগন্ যদ্ বা পিতাপরাদ্ধো জিহীডে ॥২॥

116.3

যদীদং মাতুর্যদি পিতুর্নঃ পরি ভ্রাতুঃ পুত্রাচ্চেতস এন আগন্।
যাবন্তো অস্মান্ পিতরঃ সচন্তে তেষাং সর্বেষাং শিবো অস্তু মন্যুঃ ॥৩॥