Utshovসূক্ত 89
89.1
অস্তেব সু প্রতরং লায়মস্যন্ ভূষন্নিব প্র ভরা স্তোমমস্মৈ ।
বাচা বিপ্রাস্তরত বাচমর্যো নি রাময় জরিতঃ সোম ইন্দ্রম্ ॥১॥
89.2
দোহেন গামুপ শিক্ষা সখায়ং প্র বোধয় জরিতর্জারমিন্দ্রম্।
কোশং ন পূর্ণং বসুনা ন্যৃষ্টমা চ্যাবয় মঘদেয়ায় শূরম্ ॥২॥
89.3
কিমঙ্গ ত্বা মঘবন্ ভোজমাহুঃ শিশীহি মা শিশয়ং ত্বা শৃণোমি ।
অপ্নস্বতী মম ধীরস্তু শক্র বসুবিদং ভগমিন্দ্রা ভরা নঃ ॥৩॥
89.4
ত্বাং জনা মমসত্যেষ্বিন্দ্র সংতস্থানা বি হ্বয়ন্তে সমীকে।
অত্রা যুজং কৃণুতে যো হবিষ্মান্নাসুন্বতা সখ্যং বষ্টি শূরঃ ॥৪॥
89.5
ধনং ন স্পন্দ্রং বহুলং যো অস্মৈ তীব্রান্ত্সোমাং আসুনোতি প্রয়স্বান্।
তস্মৈ শত্রূন্ত্সুতুকান্ প্রাতরহ্নো নি স্বষ্ট্রান্ যুবতি হন্তি বৃত্রম্ ॥৫॥
89.6
যস্মিন্ বয়ং দধিমা শংসমিন্দ্রে যঃ শিশ্রায় মঘবা কামমস্মে।
আরাচ্চিৎ সন্ ভয়তামস্য শত্রুর্ন্যঽস্মৈ দ্যুম্না জন্যা নমন্তাম্ ॥৬॥
89.7
আরাচ্ছত্রুমপ বাধস্ব দূরমুগ্রো যঃ শম্বঃ পুরুহূত তেন ।
অস্মে ধেহি যবমদ্ গোমদিন্দ্র কৃধী ধিয়ং জরিত্রে বাজরত্নাম্ ॥৭॥
89.8
প্র যমন্তর্বৃষসবাসো অগ্মন্ তীব্রাঃ সোমা বহুলান্তাস ইন্দ্রম্।
নাহ দামানং মঘবা নি যংসন্ নি সুন্বতে বহতি ভূরি বামম্ ॥৮॥
89.9
উত প্রহামতিদীবা জয়তি কৃতমিব শ্বঘ্নী বি চিনোতি কালে।
যো দেবকামো ন ধনং রুণদ্ধি সমিৎ তং রায়ঃ সৃজতি স্বধাভিঃ ॥৯॥
89.10
গোভিষ্টরেমামতিং দুরেবাং যবেন বা ক্ষুধং পুরুহূত বিশ্বে ।
বয়ং রাজসু প্রথমা ধনান্যরিষ্টাসো বৃজনীভির্জয়েম ॥১০॥
89.11
বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরীয়ঃ কৃণোতু ॥১১॥