সূক্ত 37

37.1

যস্তিগ্মশৃঙ্গো বৃষভো ন ভীমঃ একঃ কৃষ্টীশ্চ্যবয়তি প্র বিশ্বাঃ ।
যঃ শশ্বতো অদাশুষো গয়স্য প্রয়ন্তাসি সুষ্বিতরায় বেদঃ ॥১॥

ত্বং হ ত্যদিন্দ্র কুত্সমাবঃ শুশ্রূষমাণস্তন্বা সমর্যে।
দাসং যচ্ছুষ্ণং কুয়বং ন্যঽস্মা অরন্ধয় আর্জুনেয়ায় শিক্ষন্ ॥২॥

ত্বং ধৃষ্ণো ধৃষতা বীতহব্যং প্রাবো বিশ্বাভিরূতিভিঃ সুদাসম্।
প্র পৌরুকুত্সিং ত্রসদস্যুমাবঃ ক্ষেত্রসাতা বৃত্রহত্যেষু পূরুম্ ॥৩॥

ত্বং নৃভির্নৃমণো দেববীতৌ ভূরীণি বৃত্রা হর্যশ্ব হংসি ।
ত্বং নি দস্যুং চুমুরিং ধুনিং চাস্বাপয়ো দভীতয়ে সুহন্তু ॥৪॥

তব চ্যৌত্নানি বজ্রহস্ত তানি নব যৎ পুরো নবতিং চ সদ্যঃ ।
নিবেশনে শততমাবিবেষীরহং চ বৃত্রং নমুচিমুতাহন্ ॥৫॥

সনা তা ত ইন্দ্র ভোজনানি রাতহব্যায় দাশুষে সুদাসে ।
বৃষ্ণে তে হরী বৃষণা যুনজ্মি ব্যন্তু ব্রহ্মাণি পুরুশাক বাজম্ ॥৬॥

মা তে অস্যাং সহসাবন্ পরিষ্টাবঘায় ভূম হরিবঃ পরাদৌ।
ত্রায়স্ব নোঽবৃকেভির্বরূথৈস্তব প্রিয়াসঃ সূরিষু স্যাম ॥৭॥

প্রিয়াস ইৎ তে মঘবন্নভিষ্টৌ নরো মদেম শরণে সখায়ঃ ।
নি তুর্বশং নি যাদ্বং শিশীহ্যতিথিগ্বায় শংস্যং করিষ্যন্ ॥৮॥

সদ্যশ্চিন্নু তে মঘবন্নভিষ্টৌ নরঃ শংসন্ত্যুক্থশাস উক্থা।
যে তে হবেভির্বি পণীংরদাশন্নস্মান্ বৃণীষ্ব যুজ্যায় তস্মৈ ॥৯॥

এতে স্তোমা নরাং নৃতম তুভ্যমস্মদ্র্যঽঞ্চো দদতো মঘানি ।
তেষামিন্দ্র বৃত্রহত্যে শিবো ভূঃ সখা চ শূরোঽবিতা চ নৃণাম্ ॥১০॥

নূ ইন্দ্র শূর স্তবমান ঊতী ব্রহ্মজূতস্তন্বা বাবৃধস্ব ।
উপ নো বাজান্ মিমীহ্যুপ স্তীন্ যূয়ং পাত স্বস্তিভিঃ সদা নঃ ॥১১॥