সূক্ত 34

34.1

যো জাত এব প্রথমো মনস্বান্ দেবো দেবান্ ক্রতুনা পর্যভূষৎ।
যস্য শুষ্মাদ্ রোদসী অভ্যসেতাং নৃম্ণস্য মহ্না স জনাস ইন্দ্রঃ ॥১॥

যঃ পৃথিবীং ব্যথমানামদৃংহদ্ যঃ পর্বতান্ প্রকুপিতাঁ অরম্ণাৎ।
যো অন্তরিক্ষং বিমমে বরীয়ো যো দ্যামস্তভ্নাৎ স জনাস ইন্দ্রঃ ॥২॥

যো হত্বা হিমরিণাৎ সপ্ত সিন্ধূন্ যো গা উদাজদপধা বলস্য ।
যো অশ্মনোরন্তরগ্নিং জজান সংবৃক্ সমত্সু স জনাস ইন্দ্রঃ ॥৩॥

যেনেমা বিশ্বা চ্যবনা কৃতানি যো দাসং বর্ণমধরং গুহাকঃ ।
শ্বঘ্নীব যো জিগীবাং লক্ষমাদদর্যঃ পুষ্টানি স জনাস ইন্দ্রঃ ॥৪॥

যং স্মা পৃচ্ছন্তি কুহ সেতি ঘোরমুতেমাহুর্নৈষো অস্তীত্যেনম্।
সো অর্যঃ পুষ্টীর্বিজ ইবা মিনাতি শ্রদস্মৈ ধত্ত স জনাস ইন্দ্রঃ ॥৫॥

যো রধ্রস্য চোদিতা যঃ কৃশস্য যো ব্রহ্মণো নাধমানস্য কীরেঃ ।
যুক্তগ্রাব্ণো যোঽবিতা সুশিপ্রঃ সুতসোমস্য স জনাস ইন্দ্রঃ ॥৬॥

যস্যাশ্বাসঃ প্রদিশি যস্য গাবো যস্য গ্রামা যস্য বিশ্বে রথাসঃ ।
যঃ সূর্যং য উষসং জজান যো অপাং নেতা স জনাস ইন্দ্রঃ ॥৭॥

যং ক্রন্দসী সংয়তী বিহ্বয়েতে পরেঽবরে উভয়া অমিত্রাঃ ।
সমানং চিদ্ রথমাতস্থিবাংসা নানা হবেতে স জনাস ইন্দ্রঃ ॥৮॥

যস্মান্ন ঋতে বিজয়ন্তে জনাসো যং যুধ্যমানা অবসে হবন্তে ।
যো বিশ্বস্য প্রতিমানং বভূব যো অচ্যুতচ্যুৎ স জনাস ইন্দ্রঃ ॥৯॥

যঃ শশ্বতো মহ্যেনো দধানানমন্যমানাংছর্বা জঘান ।
যঃ শর্ধতে নানুদদাতি শৃধ্যাং যো দস্যোর্হন্তা স জনাস ইন্দ্রঃ ॥১০॥

যঃ শম্বরং পর্বতেষু ক্ষিয়ন্তং চত্বারিংশ্যাং শরদ্যন্ববিন্দৎ।
ওজায়মানং যো অহিং জঘান দানুং শয়ানং স জনাস ইন্দ্রঃ ॥১১॥

যঃ শম্বরং পর্যতরৎ কসীভির্যোঽচারুকাস্নাপিবৎ সুতস্য ।
অন্তর্গিরৌ যজমানং বহুং জনং যস্মিন্নামূর্ছৎ স জনাস ইন্দ্রঃ ॥১২॥

যঃ সপ্তরশ্মির্বৃষভস্তুবিষ্মানবাসৃজৎ সর্তবে সপ্ত সিন্ধূন্।
যো রৌহিণমস্ফুরদ্ বজ্রবাহুর্দ্যামারোহন্তং স জনাস ইন্দ্রঃ ॥১৩॥

দ্যাবা চিদস্মৈ পৃথিবী নমেতে শুষ্মাচ্চিদস্য পর্বতা ভয়ন্তে ।
যঃ সোমপা নিচিতো বজ্রবাহুর্যো বজ্রহস্তঃ স জনাস ইন্দ্রঃ ॥১৪॥

যঃ সুন্বন্তমবতি যঃ পচন্তং যঃ শংসন্তং যঃ শশমানমূতী।
যস্য ব্রহ্ম বর্ধনং যস্য সোমো যস্যেদং রাধঃ স জনাস ইন্দ্রঃ ॥১৫॥

জাতো ব্যখ্যৎ পিত্রোরুপস্থে ভুবো ন বেদ জনিতুঃ পরস্য ।
স্তবিষ্যমাণো নো যো অস্মদ্ ব্রতা দেবানাং স জনাস ইন্দ্রঃ ॥১৬॥

যঃ সোমকামো হর্যশ্বঃ সূরির্যস্মাদ্ রেজন্তে ভুবনানি বিশ্বা ।
যো জঘান শম্বরং যশ্চ শুষ্ণং য একবীরঃ স জনাস ইন্দ্রঃ ॥১৭॥

যঃ সুন্বতে পচতে দুধ্র আ চিদ্ বাজং দর্দর্ষি স কিলাসি সত্যঃ ।
বয়ং ত ইন্দ্র বিশ্বহ প্রিয়াসঃ সুবীরাসো বিদথমা বদেম ॥১৮॥