Sukta 92

92.1

5 maitravarunirvasishthah, vayuh, 2, 4 indravayu, trishtup

आ वा॑यो भूष शुचिपा॒ उप॑ नः स॒हस्रं॑ ते नि॒युतो॑ विश्ववार ।
उपो॑ ते॒ अन्धो॒ मद्य॑मयामि॒ यस्य॑ देव दधि॒षे पू॑र्व॒पेय॑म् ॥१॥

A vayo bhusha shuchipa upa nah sahasram te niyuto vishvavara
Upo te andho madyamayami yasya deva dadhishe purvapeyam

प्र सोता॑ जी॒रो अ॑ध्व॒रेष्व॑स्था॒त्सोम॒मिन्द्रा॑य वा॒यवे॒ पिब॑ध्यै ।
प्र यद्वां॒ मध्वो॑ अग्रि॒यं भर॑न्त्यध्व॒र्यवो॑ देव॒यन्त॒ः शची॑भिः ॥२॥

Pra sota jiro adhvareshvasthatsomamindraya vayave pibadhyai
Pra yadvam madhvo agriyam bharantyadhvaryavo devayantah shachibhih

प्र याभि॒र्यासि॑ दा॒श्वांस॒मच्छा॑ नि॒युद्भि॑र्वायवि॒ष्टये॑ दुरो॒णे ।
नि नो॑ र॒यिं सु॒भोज॑सं युवस्व॒ नि वी॒रं गव्य॒मश्व्यं॑ च॒ राध॑ः ॥३॥

Pra yabhiryasi dashvansamachchha niyudbhirvayavishtaye durone
Ni no rayim subhojasam yuvasva ni viram gavyamashvyam cha radhah

ये वा॒यव॑ इन्द्र॒माद॑नास॒ आदे॑वासो नि॒तोश॑नासो अ॒र्यः ।
घ्नन्तो॑ वृ॒त्राणि॑ सू॒रिभि॑ः ष्याम सास॒ह्वांसो॑ यु॒धा नृभि॑र॒मित्रा॑न् ॥४॥

Ye vayava indramadanasa adevaso nitoshanaso aryah
Ghnanto vritrani suribhih shyama sasahvanso yudha nribhiramitran

आ नो॑ नि॒युद्भि॑ः श॒तिनी॑भिरध्व॒रं स॑ह॒स्रिणी॑भि॒रुप॑ याहि य॒ज्ञम् । वा
यो॑ अ॒स्मिन्त्सव॑ने मादयस्व यू॒यं पा॑त स्व॒स्तिभि॒ः सदा॑ नः ॥५॥

A no niyudbhih shatinibhiradhvaram sahasrinibhirupa yahi yagyam, va
Yo asmintsavane madayasva yuyam pata svastibhih sada nah