Sukta 85

85.1

8 bhaumotrih, varuna, trishtup

प्र स॒म्राजे॑ बृ॒हद॑र्चा गभी॒रं ब्रह्म॑ प्रि॒यं वरु॑णाय श्रु॒ताय॑ ।
वि यो ज॒घान॑ शमि॒तेव॒ चर्मो॑प॒स्तिरे॑ पृथि॒वीं सूर्या॑य ॥१॥

Pra samraje brihadarcha gabhiram brahma priyam varunaya shrutaya
Vi yo jaghana shamiteva charmopastire prithivim suryaya

वने॑षु॒ व्य१न्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु ।
हृ॒त्सु क्रतुं॒ वरु॑णो अ॒प्स्व१ग्निं दि॒वि सूर्य॑मदधा॒त् सोम॒मद्रौ॑ ॥२॥

Vaneshu vya1ntariksham tatana vajamarvatsu paya usriyasu
Hritsu kratum varuno apsva1gnim divi suryamadadhat somamadrau

नी॒चीन॑बारं॒ वरु॑ण॒ः कव॑न्धं॒ प्र स॑सर्ज॒ रोद॑सी अ॒न्तरि॑क्षम् ।
तेन॒ विश्व॑स्य॒ भुव॑नस्य॒ राजा॒ यवं॒ न वृ॒ष्टिर्व्यु॑नत्ति॒ भूम॑ ॥३॥

Nichinabaram varunah kavandham pra sasarja rodasi antariksham
Tena vishvasya bhuvanasya raja yavam na vrishtirvyunatti bhuma

उ॒नत्ति॒ भूमिं॑ पृथि॒वीमु॒त द्यां य॒दा दु॒ग्धं वरु॑णो॒ वष्ट्यादित् ।
सम॒भ्रेण॑ वसत॒ पर्व॑तासस्तविषी॒यन्त॑ः श्रथयन्त वी॒राः ॥४॥

Unatti bhumim prithivimuta dyam yada dugdham varuno vashtyadit
Samabhrena vasata parvatasastavishiyantah shrathayanta virah

इ॒मामू॒ ष्वा॑सु॒रस्य॑ श्रु॒तस्य॑ म॒हीं मा॒यां वरु॑णस्य॒ प्र वो॑चम् ।
माने॑नेव तस्थि॒वाँ अ॒न्तरि॑क्षे॒ वि यो म॒मे पृ॑थि॒वीं सूर्ये॑ण ॥५॥

Imamu shvasurasya shrutasya mahim mayam varunasya pra vocham
Maneneva tasthivam antarikshe vi yo mame prithivim suryena

इ॒मामू॒ नु क॒वित॑मस्य मा॒यां म॒हीं दे॒वस्य॒ नकि॒रा द॑धर्ष ।
एकं॒ यदु॒द्ना न पृ॒णन्त्येनी॑रासि॒ञ्चन्ती॑र॒वन॑यः समु॒द्रम् ॥६॥

Imamu nu kavitamasya mayam mahim devasya nakira dadharsha
Ekam yadudna na prinantyenirasinchantiravanayah samudram

अ॒र्य॒म्यं॑ वरुण मि॒त्र्यं॑ वा॒ सखा॑यं वा॒ सद॒मिद् भ्रात॑रं वा ।
वे॒शं वा॒ नित्यं॑ वरु॒णार॑णं वा॒ यत् सी॒माग॑श्चकृ॒मा शि॒श्रथ॒स्तत् ॥७॥

Aryamyam varuna mitryam va sakhayam va sadamid bhrataram va
Vesham va nityam varunaranam va yat simagashchakrima shishrathastat

कि॒त॒वासो॒ यद् रि॑रि॒पुर्न दी॒वि यद् वा॑ घा स॒त्यमु॒त यन्न वि॒द्म ।
सर्वा॒ ता वि ष्य॑ शिथि॒रेव॑ दे॒वाऽधा॑ ते स्याम वरुण प्रि॒यास॑ः ॥८॥

Kitavaso yad riripurna divi yad va gha satyamuta yanna vidma
Sarva ta vi shya shithireva devadha te syama varuna priyasah