Sukta 63

63.1

7 archanana atreyah, mitravarunau, jagati

ऋत॑स्य गोपा॒वधि॑ तिष्ठथो॒ रथं॒ सत्य॑धर्माणा पर॒मे व्यो॑मनि ।
यमत्र॑ मित्रावरु॒णाव॑थो यु॒वं तस्मै॑ वृ॒ष्टिर्मधु॑मत् पिन्वते दि॒वः ॥१॥

Ritasya gopavadhi tishthatho ratham satyadharmana parame vyomani
Yamatra mitravarunavatho yuvam tasmai vrishtirmadhumat pinvate divah

63.2

स॒म्राजा॑व॒स्य भुव॑नस्य राजथो॒ मित्रा॑वरुणा वि॒दथे॑ स्व॒र्दृशा॑ ।
वृ॒ष्टिं वां॒ राधो॑ अमृत॒त्वमी॑महे॒ द्यावा॑पृथि॒वी वि च॑रन्ति त॒न्यव॑ः ॥२॥

Samrajavasya bhuvanasya rajatho mitravaruna vidathe svardrisha
Vrishtim vam radho amritatvamimahe dyavaprithivi vi charanti tanyavah

63.3

स॒म्राजा॑ उ॒ग्रा वृ॑ष॒भा दि॒वस्पती॑ पृथि॒व्या मि॒त्रावरु॑णा॒ विच॑र्षणी ।
चि॒त्रेभि॑र॒भ्रैरुप॑ तिष्ठथो॒ रवं॒ द्यां व॑र्षयथो॒ असु॑रस्य मा॒यया॑ ॥३॥

Samraja ugra vrishabha divaspati prithivya mitravaruna vicharshani
Chitrebhirabhrairupa tishthatho ravam dyam varshayatho asurasya mayaya

63.4

मा॒या वां॑ मित्रावरुणा दि॒वि श्रि॒ता सूर्यो॒ ज्योति॑श्चरति चि॒त्रमायु॑धम् ।
तम॒भ्रेण॑ वृ॒ष्ट्या गू॑हथो दि॒वि पर्ज॑न्य द्र॒प्सा मधु॑मन्त ईरते ॥४॥

Maya vam mitravaruna divi shrita suryo jyotishcharati chitramayudham
Tamabhrena vrishtya guhatho divi parjanya drapsa madhumanta irate

63.5

रथं॑ युञ्जते म॒रुत॑ः शु॒भे सु॒खं शूरो॒ न मि॑त्रावरुणा॒ गवि॑ष्टिषु ।
रजां॑सि चि॒त्रा वि च॑रन्ति त॒न्यवो॑ दि॒वः स॑म्राजा॒ पय॑सा न उक्षतम् ॥५॥

Ratham yunjate marutah shubhe sukham shuro na mitravaruna gavishtishu
Rajansi chitra vi charanti tanyavo divah samraja payasa na ukshatam

63.6

वाचं॒ सु मि॑त्रावरुणा॒विरा॑वतीं प॒र्जन्य॑श्चि॒त्रां व॑दति॒ त्विषी॑मतीम् ।
अ॒भ्रा व॑सत म॒रुत॒ः सु मा॒यया॒ द्यां व॑र्षयतमरु॒णाम॑रे॒पस॑म् ॥६॥

Vacham su mitravarunaviravatim parjanyashchitram vadati tvishimatim
Abhra vasata marutah su mayaya dyam varshayatamarunamarepasam

63.7

धर्म॑णा मित्रावरुणा विपश्चिता व्र॒ता र॑क्षेथे॒ असु॑रस्य मा॒यया॑ ।
ऋ॒तेन॒ विश्वं॒ भुव॑नं॒ वि रा॑जथ॒ः सूर्य॒मा ध॑त्थो दि॒वि चित्र्यं॒ रथ॑म् ॥७॥

Dharmana mitravaruna vipashchita vrata rakshethe asurasya mayaya
Ritena vishvam bhuvanam vi rajathah suryama dhattho divi chitryam ratham