Sukta 39

39.1

6 vamadevo gautamah, dadhikrah, trishtup, 6 anushtup

आ॒शुं द॑धि॒क्रां तमु॒ नु ष्ट॑वाम दि॒वस्पृ॑थि॒व्या उ॒त च॑र्किराम ।
उ॒च्छन्ती॒र्मामु॒षस॑ः सूदय॒न्त्वति॒ विश्वा॑नि दुरि॒तानि॑ पर्षन् ॥१॥

Ashum dadhikram tamu nu shtavama divasprithivya uta charkirama
Uchchhantirmamushasah sudayantvati vishvani duritani parshan

म॒हश्च॑र्क॒र्म्यर्व॑तः क्रतु॒प्रा द॑धि॒क्राव्ण॑ः पुरु॒वार॑स्य॒ वृष्ण॑ः ।
यं पू॒रुभ्यो॑ दीदि॒वांसं॒ नाग्निं द॒दथु॑र्मित्रावरुणा॒ ततु॑रिम् ॥२॥

Mahashcharkarmyarvatah kratupra dadhikravnah puruvarasya vrishnah
Yam purubhyo didivansam nagnim dadathurmitravaruna taturim

यो अश्व॑स्य दधि॒क्राव्णो॒ अका॑री॒त् समि॑द्धे अ॒ग्ना उ॒षसो॒ व्यु॑ष्टौ ।
अना॑गसं॒ तमदि॑तिः कृणोतु॒ स मि॒त्रेण॒ वरु॑णेना स॒जोषा॑ः ॥३॥

Yo ashvasya dadhikravno akarit samiddhe agna ushaso vyushtau
Anagasam tamaditih krinotu sa mitrena varunena sajoshah

द॒धि॒क्राव्ण॑ इ॒ष ऊ॒र्जो म॒हो यदम॑न्महि म॒रुतां॒ नाम॑ भ॒द्रम् ।
स्व॒स्तये॒ वरु॑णं मि॒त्रम॒ग्निं हवा॑मह॒ इन्द्रं॒ वज्र॑बाहुम् ॥४॥

Dadhikravna isha urjo maho yadamanmahi marutam nama bhadram
Svastaye varunam mitramagnim havamaha indram vajrabahum

इन्द्र॑मि॒वेदु॒भये॒ वि ह्व॑यन्त उ॒दीरा॑णा य॒ज्ञमु॑पप्र॒यन्त॑ः ।
द॒धि॒क्रामु॒ सूद॑नं॒ मर्त्या॑य द॒दथु॑र्मित्रावरुणा नो॒ अश्व॑म् ॥५॥

Indramivedubhaye vi hvayanta udirana yagyamupaprayantah
Dadhikramu sudanam martyaya dadathurmitravaruna no ashvam

द॒धि॒क्राव्णो॑ अकारिषं जि॒ष्णोरश्व॑स्य वा॒जिन॑ः ।
सु॒र॒भि नो॒ मुखा॑ कर॒त् प्र ण॒ आयूं॑षि तारिषत् ॥६॥

Dadhikravno akarisham jishnorashvasya vajinah
Surabhi no mukha karat pra na ayunshi tarishat