Sukta 12

12.1

15 gritsamada (angirasah shaunahotrah pashchad) bhargavah shaunakah, indrah, trishtup

यो जा॒त ए॒व प्र॑थ॒मो मन॑स्वान् दे॒वो दे॒वान् क्रतु॑ना प॒र्यभू॑षत् ।
यस्य॒ शुष्मा॒द् रोद॑सी॒ अभ्य॑सेतां नृ॒म्णस्य॑ म॒ह्ना स ज॑नास॒ इन्द्र॑ः ॥१॥

Yo jata eva prathamo manasvan devo devan kratuna paryabhushat
Yasya shushmad rodasi abhyasetam nrimnasya mahna sa janasa indrah

12.2

यः पृ॑थि॒वीं व्यथ॑माना॒मदृं॑ह॒द् यः पर्व॑ता॒न् प्रकु॑पिताँ॒ अर॑म्णात् ।
यो अ॒न्तरि॑क्षं विम॒मे वरी॑यो॒ यो द्यामस्त॑भ्ना॒त् स ज॑नास॒ इन्द्र॑ः ॥२॥

Yah prithivim vyathamanamadrinhad yah parvatan prakupitam aramnat
Yo antariksham vimame variyo yo dyamastabhnat sa janasa indrah

12.3

यो ह॒त्वाहि॒मरि॑णात् स॒प्त सिन्धू॒न् यो गा उ॒दाज॑दप॒धा व॒लस्य॑ ।
यो अश्म॑नोर॒न्तर॒ग्निं ज॒जान॑ सं॒वृक् स॒मत्सु॒ स ज॑नास॒ इन्द्र॑ः ॥३॥

Yo hatvahimarinat sapta sindhun yo ga udajadapadha valasya
Yo ashmanorantaragnim jajana sanvrik samatsu sa janasa indrah

12.4

येने॒मा विश्वा॒ च्यव॑ना कृ॒तानि॒ यो दासं॒ वर्ण॒मध॑रं॒ गुहाक॑ः ।
श्व॒घ्नीव॒ यो जि॑गी॒वाँ ल॒क्षमाद॑द॒र्यः पु॒ष्टानि॒ स ज॑नास॒ इन्द्र॑ः ॥४॥

Yenema vishva chyavana kritani yo dasam varnamadharam guhakah
Shvaghniva yo jigivam lakshamadadaryah pushtani sa janasa indrah

12.5

यं स्मा॑ पृ॒च्छन्ति॒ कुह॒ सेति॑ घो॒रमु॒तेमा॑हु॒र्नैषो अ॒स्तीत्ये॑नम् ।
सो अ॒र्यः पु॒ष्टीर्विज॑ इ॒वा मि॑नाति॒ श्रद॑स्मै धत्त॒ स ज॑नास॒ इन्द्र॑ः ॥५॥

Yam sma prichchhanti kuha seti ghoramutemahurnaisho astityenam
So aryah pushtirvija iva minati shradasmai dhatta sa janasa indrah

12.6

यो र॒ध्रस्य॑ चोदि॒ता यः कृ॒शस्य॒ यो ब्र॒ह्मणो॒ नाध॑मानस्य की॒रेः ।
यु॒क्तग्रा॑व्णो॒ योऽवि॒ता सु॑शि॒प्रः सु॒तसो॑मस्य॒ स ज॑नास॒ इन्द्र॑ः ॥६॥

Yo radhrasya chodita yah krishasya yo brahmano nadhamanasya kireh
Yuktagravno yovita sushiprah sutasomasya sa janasa indrah

12.7

यस्याश्वा॑सः प्र॒दिशि॒ यस्य॒ गावो॒ यस्य॒ ग्रामा॒ यस्य॒ विश्वे॒ रथा॑सः ।
यः सूर्यं॒ य उ॒षसं॑ ज॒जान॒ यो अ॒पां ने॒ता स ज॑नास॒ इन्द्र॑ः ॥७॥

Yasyashvasah pradishi yasya gavo yasya grama yasya vishve rathasah
Yah suryam ya ushasam jajana yo apam neta sa janasa indrah

12.8

यं क्रन्द॑सी संय॒ती वि॒ह्वये॑ते॒ परेऽव॑र उ॒भया॑ अ॒मित्रा॑ः ।
स॒मा॒नं चि॒द् रथ॑मातस्थि॒वांसा॒ नाना॑ हवेते॒ स ज॑नास॒ इन्द्र॑ः ॥८॥

Yam krandasi sanyati vihvayete parevara ubhaya amitrah
Samanam chid rathamatasthivansa nana havete sa janasa indrah

12.9

यस्मा॒न्न ऋ॒ते वि॒जय॑न्ते॒ जना॑सो॒ यं युध्य॑माना॒ अव॑से॒ हव॑न्ते ।
यो विश्व॑स्य प्रति॒मानं॑ ब॒भूव॒ यो अ॑च्युत॒च्युत् स ज॑नास॒ इन्द्र॑ः ॥९॥

Yasmanna rite vijayante janaso yam yudhyamana avase havante
Yo vishvasya pratimanam babhuva yo achyutachyut sa janasa indrah

12.10

यः शश्व॑तो॒ मह्येनो॒ दधा॑ना॒नम॑न्यमाना॒ञ्छर्वा॑ ज॒घान॑ ।
यः शर्ध॑ते॒ नानु॒ददा॑ति शृ॒ध्यां यो दस्यो॑र्ह॒न्ता स ज॑नास॒ इन्द्र॑ः ॥१०॥

Yah shashvato mahyeno dadhananamanyamananchharva jaghana
Yah shardhate nanudadati shridhyam yo dasyorhanta sa janasa indrah

12.11

यः शम्ब॑रं॒ पर्व॑तेषु क्षि॒यन्तं॑ चत्वारिं॒श्यां श॒रद्य॒न्ववि॑न्दत् ।
ओ॒जा॒यमा॑नं॒ यो अहिं॑ ज॒घान॒ दानुं॒ शया॑नं॒ स ज॑नास॒ इन्द्र॑ः ॥११॥

Yah shambaram parvateshu kshiyantam chatvarinshyam sharadyanvavindat
Ojayamanam yo ahim jaghana danum shayanam sa janasa indrah

12.12

यः स॒प्तर॑श्मिर्वृष॒भस्तुवि॑ष्मान॒वासृ॑ज॒त् सर्त॑वे स॒प्त सिन्धू॑न् ।
यो रौ॑हि॒णमस्फु॑र॒द् वज्र॑बाहु॒र्द्यामा॒रोह॑न्तं॒ स ज॑नास॒ इन्द्र॑ः ॥१२॥

Yah saptarashmirvrishabhastuvishmanavasrijat sartave sapta sindhun
Yo rauhinamasphurad vajrabahurdyamarohantam sa janasa indrah

12.13

द्यावा॑ चिदस्मै पृथि॒वी न॑मेते॒ शुष्मा॑च्चिदस्य॒ पर्व॑ता भयन्ते ।
यः सो॑म॒पा नि॑चि॒तो वज्र॑बाहु॒र्यो वज्र॑हस्त॒ः स ज॑नास॒ इन्द्र॑ः ॥१३॥

Dyava chidasmai prithivi namete shushmachchidasya parvata bhayante
Yah somapa nichito vajrabahuryo vajrahastah sa janasa indrah

12.14

यः सु॒न्वन्त॒मव॑ति॒ यः पच॑न्तं॒ यः शंस॑न्तं॒ यः श॑शमा॒नमू॒ती ।
यस्य॒ ब्रह्म॒ वर्ध॑नं॒ यस्य॒ सोमो॒ यस्ये॒दं राध॒ः स ज॑नास॒ इन्द्र॑ः ॥१४॥

Yah sunvantamavati yah pachantam yah shansantam yah shashamanamuti
Yasya brahma vardhanam yasya somo yasyedam radhah sa janasa indrah

12.15

यः सु॑न्व॒ते पच॑ते दु॒ध्र आ चि॒द् वाजं॒ दर्द॑र्षि॒ स किला॑सि स॒त्यः ।
व॒यं त॑ इन्द्र वि॒श्वह॑ प्रि॒यास॑ः सु॒वीरा॑सो वि॒दथ॒मा व॑देम ॥१५॥

Yah sunvate pachate dudhra a chid vajam dardarshi sa kilasi satyah
Vayam ta indra vishvaha priyasah suviraso vidathama vadema