Sukta 92

92.1

15 sharyato manavah, vishvedevah, jagati

य॒ज्ञस्य॑ वो र॒थ्यं॑ वि॒श्पतिं॑ वि॒शां होता॑रम॒क्तोरति॑थिं वि॒भाव॑सुम् ।
शोच॒ञ्छुष्का॑सु॒ हरि॑णीषु॒ जर्भु॑र॒द्वृषा॑ के॒तुर्य॑ज॒तो द्याम॑शायत ॥१॥

Yagyasya vo rathyam vishpatim visham hotaramaktoratithim vibhavasum
Shochanchhushkasu harinishu jarbhuradvrisha keturyajato dyamashayata

92.2

इ॒मम॑ञ्ज॒स्पामु॒भये॑ अकृण्वत ध॒र्माण॑म॒ग्निं वि॒दथ॑स्य॒ साध॑नम् ।
अ॒क्तुं न य॒ह्वमु॒षस॑ः पु॒रोहि॑तं॒ तनू॒नपा॑तमरु॒षस्य॑ निंसते ॥२॥

Imamanjaspamubhaye akrinvata dharmanamagnim vidathasya sadhanam
Aktum na yahvamushasah purohitam tanunapatamarushasya ninsate

92.3

बळ॑स्य नी॒था वि प॒णेश्च॑ मन्महे व॒या अ॑स्य॒ प्रहु॑ता आसु॒रत्त॑वे ।
य॒दा घो॒रासो॑ अमृत॒त्वमाश॒तादिज्जन॑स्य॒ दैव्य॑स्य चर्किरन् ॥३॥

Balasya nitha vi paneshcha manmahe vaya asya prahuta asurattave
Yada ghoraso amritatvamashatadijjanasya daivyasya charkiran

92.4

ऋ॒तस्य॒ हि प्रसि॑ति॒र्द्यौरु॒रु व्यचो॒ नमो॑ म॒ह्य१रम॑ति॒ः पनी॑यसी ।
इन्द्रो॑ मि॒त्रो वरु॑ण॒ः सं चि॑कित्रि॒रेऽथो॒ भग॑ः सवि॒ता पू॒तद॑क्षसः ॥४॥

Ritasya hi prasitirdyaururu vyacho namo mahya1ramatih paniyasi
Indro mitro varunah sam chikitriretho bhagah savita putadakshasah

92.5

प्र रु॒द्रेण॑ य॒यिना॑ यन्ति॒ सिन्ध॑वस्ति॒रो म॒हीम॒रम॑तिं दधन्विरे ।
येभि॒ः परि॑ज्मा परि॒यन्नु॒रु ज्रयो॒ वि रोरु॑वज्ज॒ठरे॒ विश्व॑मु॒क्षते॑ ॥५॥

Pra rudrena yayina yanti sindhavastiro mahimaramatim dadhanvire
Yebhih parijma pariyannuru jrayo vi roruvajjathare vishvamukshate

92.6

क्रा॒णा रु॒द्रा म॒रुतो॑ वि॒श्वकृ॑ष्टयो दि॒वः श्ये॒नासो॒ असु॑रस्य नी॒ळय॑ः ।
तेभि॑श्चष्टे॒ वरु॑णो मि॒त्रो अ॑र्य॒मेन्द्रो॑ दे॒वेभि॑रर्व॒शेभि॒रर्व॑शः ॥६॥

Krana rudra maruto vishvakrishtayo divah shyenaso asurasya nilayah
Tebhishchashte varuno mitro aryamendro devebhirarvashebhirarvashah

92.7

इन्द्रे॒ भुजं॑ शशमा॒नास॑ आशत॒ सूरो॒ दृशी॑के॒ वृष॑णश्च॒ पौंस्ये॑ ।
प्र ये न्व॑स्या॒र्हणा॑ ततक्षि॒रे युजं॒ वज्रं॑ नृ॒षद॑नेषु का॒रव॑ः ॥७॥

Indre bhujam shashamanasa ashata suro drishike vrishanashcha paunsye
Pra ye nvasyarhana tatakshire yujam vajram nrishadaneshu karavah

92.8

सूर॑श्चि॒दा ह॒रितो॑ अस्य रीरम॒दिन्द्रा॒दा कश्चि॑द्भयत॒ज तवी॑यसः ।
भी॒मस्य॒ वृष्णो॑ ज॒ठरा॑दभि॒श्वसो॑ दि॒वेदि॑वे॒ सहु॑रिः स्त॒न्नबा॑धितः ॥८॥

Surashchida harito asya riramadindrada kashchidbhayataja taviyasah
Bhimasya vrishno jatharadabhishvaso divedive sahurih stannabadhitah

92.9

स्तोमं॑ वो अ॒द्य रु॒द्राय॒ शिक्व॑से क्ष॒यद्वी॑राय॒ नम॑सा दिदिष्टन ।
येभि॑ः शि॒वः स्ववाँ॑ एव॒याव॑भिर्दि॒वः सिष॑क्ति॒ स्वय॑शा॒ निका॑मभिः ॥९॥

Stomam vo adya rudraya shikvase kshayadviraya namasa didishtana
Yebhih shivah svavam evayavabhirdivah sishakti svayasha nikamabhih

92.10

ते हि प्र॒जाया॒ अभ॑रन्त॒ वि श्रवो॒ बृह॒स्पति॑र्वृष॒भः सोम॑जामयः ।
य॒ज्ञैरथ॑र्वा प्रथ॒मो वि धा॑रयद्दे॒वा दक्षै॒र्भृग॑व॒ः सं चि॑कित्रिरे ॥१०॥

Te hi prajaya abharanta vi shravo brihaspatirvrishabhah somajamayah
Yagyairatharva prathamo vi dharayaddeva dakshairbhrigavah sam chikitrire

92.11

ते हि द्यावा॑पृथि॒वी भूरि॑रेतसा॒ नरा॒शंस॒श्चतु॑रङ्गो य॒मोऽदि॑तिः ।
दे॒वस्त्वष्टा॑ द्रविणो॒दा ऋ॑भु॒क्षण॒ः प्र रो॑द॒सी म॒रुतो॒ विष्णु॑रर्हिरे ॥११॥

Te hi dyavaprithivi bhuriretasa narashansashchaturango yamoditih
Devastvashta dravinoda ribhukshanah pra rodasi maruto vishnurarhire

92.12

उ॒त स्य न॑ उ॒शिजा॑मुर्वि॒या क॒विरहि॑ः शृणोतु बु॒ध्न्यो॒३ हवी॑मनि ।
सूर्या॒मासा॑ वि॒चर॑न्ता दिवि॒क्षिता॑ धि॒या श॑मीनहुषी अ॒स्य बो॑धतम् ॥१२॥

Uta sya na ushijamurviya kavirahih shrinotu budhnyo3 havimani
Suryamasa vicharanta divikshita dhiya shaminahushi asya bodhatam

92.13

प्र न॑ः पू॒षा च॒रथं॑ वि॒श्वदे॑व्यो॒ऽपां नपा॑दवतु वा॒युरि॒ष्टये॑ ।
आ॒त्मानं॒ वस्यो॑ अ॒भि वात॑मर्चत॒ तद॑श्विना सुहवा॒ याम॑नि श्रुतम् ॥१३॥

Pra nah pusha charatham vishvadevyopam napadavatu vayurishtaye
Atmanam vasyo abhi vatamarchata tadashvina suhava yamani shrutam

92.14

वि॒शामा॒सामभ॑यानामधि॒क्षितं॑ गी॒र्भिरु॒ स्वय॑शसं गृणीमसि ।
ग्नाभि॒र्विश्वा॑भि॒रदि॑तिमन॒र्वण॑म॒क्तोर्युवा॑नं नृ॒मणा॒ अधा॒ पति॑म् ॥१४॥

Vishamasamabhayanamadhikshitam girbhiru svayashasam grinimasi
Gnabhirvishvabhiraditimanarvanamaktoryuvanam nrimana adha patim

92.15

रेभ॒दत्र॑ ज॒नुषा॒ पूर्वो॒ अङ्गि॑रा॒ ग्रावा॑ण ऊ॒र्ध्वा अ॒भि च॑क्षुरध्व॒रम् ।
येभि॒र्विहा॑या॒ अभ॑वद्विचक्ष॒णः पाथ॑ः सु॒मेकं॒ स्वधि॑ति॒र्वन॑न्वति ॥१५॥

Rebhadatra janusha purvo angira gravana urdhva abhi chakshuradhvaram
Yebhirvihaya abhavadvichakshanah pathah sumekam svadhitirvananvati