Sukta 87

87.1

25 payurbharadvajah, rakshohagnih, trishtup, 22-25 anushtup

र॒क्षो॒हणं॑ वा॒जिन॒मा जि॑घर्मि मि॒त्रं प्रथि॑ष्ठ॒मुप॑ यामि॒ शर्म॑ ।
शिशा॑नो अ॒ग्निः क्रतु॑भि॒ः समि॑द्ध॒ः स नो॒ दिवा॒ स रि॒षः पा॑तु॒ नक्त॑म् ॥१॥

Rakshohanam vajinama jigharmi mitram prathishthamupa yami sharma
Shishano agnih kratubhih samiddhah sa no diva sa rishah patu naktam

87.2

अयो॑दंष्ट्रो अ॒र्चिषा॑ यातु॒धाना॒नुप॑ स्पृश जातवेद॒ः समि॑द्धः ।
आ जि॒ह्वया॒ मूर॑देवान्रभस्व क्र॒व्यादो॑ वृ॒क्त्व्यपि॑ धत्स्वा॒सन् ॥२॥

Ayodanshtro archisha yatudhananupa sprisha jatavedah samiddhah
A jihvaya muradevanrabhasva kravyado vriktvyapi dhatsvasan

87.3

उ॒भोभ॑यावि॒न्नुप॑ धेहि॒ दंष्ट्रा॑ हिं॒स्रः शिशा॒नोऽव॑रं॒ परं॑ च ।
उ॒तान्तरि॑क्षे॒ परि॑ याहि राज॒ञ्जम्भै॒ः सं धे॑ह्य॒भि या॑तु॒धाना॑न् ॥३॥

Ubhobhayavinnupa dhehi danshtra hinsrah shishanovaram param cha
Utantarikshe pari yahi rajanjambhaih sam dhehyabhi yatudhanan

87.4

य॒ज्ञैरिषू॑ः सं॒नम॑मानो अग्ने वा॒चा श॒ल्याँ अ॒शनि॑भिर्दिहा॒नः ।
ताभि॑र्विध्य॒ हृद॑ये यातु॒धाना॑न्प्रती॒चो बा॒हून्प्रति॑ भङ्ध्येषाम् ॥४॥

Yagyairishuh sannamamano agne vacha shalyam ashanibhirdihanah
Tabhirvidhya hridaye yatudhananpraticho bahunprati bhandhyesham

87.5

अग्ने॒ त्वचं॑ यातु॒धान॑स्य भिन्धि हिं॒स्राशनि॒र्हर॑सा हन्त्वेनम् ।
प्र पर्वा॑णि जातवेदः शृणीहि क्र॒व्यात्क्र॑वि॒ष्णुर्वि चि॑नोतु वृ॒क्णम् ॥५॥

Agne tvacham yatudhanasya bhindhi hinsrashanirharasa hantvenam
Pra parvani jatavedah shrinihi kravyatkravishnurvi chinotu vriknam

87.6

यत्रे॒दानीं॒ पश्य॑सि जातवेद॒स्तिष्ठ॑न्तमग्न उ॒त वा॒ चर॑न्तम् ।
यद्वा॒न्तरि॑क्षे प॒थिभि॒ः पत॑न्तं॒ तमस्ता॑ विध्य॒ शर्वा॒ शिशा॑नः ॥६॥

Yatredanim pashyasi jatavedastishthantamagna uta va charantam
Yadvantarikshe pathibhih patantam tamasta vidhya sharva shishanah

87.7

उ॒ताल॑ब्धं स्पृणुहि जातवेद आलेभा॒नादृ॒ष्टिभि॑र्यातु॒धाना॑त् ।
अग्ने॒ पूर्वो॒ नि ज॑हि॒ शोशु॑चान आ॒माद॒ः क्ष्विङ्का॒स्तम॑द॒न्त्वेनी॑ः ॥७॥

Utalabdham sprinuhi jataveda alebhanadrishtibhiryatudhanat
Agne purvo ni jahi shoshuchana amadah kshvinkastamadantvenih

87.8

इ॒ह प्र ब्रू॑हि यत॒मः सो अ॑ग्ने॒ यो या॑तु॒धानो॒ य इ॒दं कृ॒णोति॑ ।
तमा र॑भस्व स॒मिधा॑ यविष्ठ नृ॒चक्ष॑स॒श्चक्षु॑षे रन्धयैनम् ॥८॥

Iha pra bruhi yatamah so agne yo yatudhano ya idam krinoti
Tama rabhasva samidha yavishtha nrichakshasashchakshushe randhayainam

87.9

ती॒क्ष्णेना॑ग्ने॒ चक्षु॑षा रक्ष य॒ज्ञं प्राञ्चं॒ वसु॑भ्य॒ः प्र ण॑य प्रचेतः ।
हिं॒स्रं रक्षां॑स्य॒भि शोशु॑चानं॒ मा त्वा॑ दभन्यातु॒धाना॑ नृचक्षः ॥९॥

Tikshnenagne chakshusha raksha yagyam prancham vasubhyah pra naya prachetah
Hinsram rakshansyabhi shoshuchanam ma tva dabhanyatudhana nrichakshah

87.10

नृ॒चक्षा॒ रक्ष॒ः परि॑ पश्य वि॒क्षु तस्य॒ त्रीणि॒ प्रति॑ शृणी॒ह्यग्रा॑ ।
तस्या॑ग्ने पृ॒ष्टीर्हर॑सा शृणीहि त्रे॒धा मूलं॑ यातु॒धान॑स्य वृश्च ॥१०॥

Nrichaksha rakshah pari pashya vikshu tasya trini prati shrinihyagra
Tasyagne prishtirharasa shrinihi tredha mulam yatudhanasya vrishcha

87.11

त्रिर्या॑तु॒धान॒ः प्रसि॑तिं त एत्वृ॒तं यो अ॑ग्ने॒ अनृ॑तेन॒ हन्ति॑ ।
तम॒र्चिषा॑ स्फू॒र्जय॑ञ्जातवेदः सम॒क्षमे॑नं गृण॒ते नि वृ॑ङ्धि ॥११॥

Triryatudhanah prasitim ta etvritam yo agne anritena hanti
Tamarchisha sphurjayanjatavedah samakshamenam grinate ni vrindhi

87.12

तद॑ग्ने॒ चक्षु॒ः प्रति॑ धेहि रे॒भे श॑फा॒रुजं॒ येन॒ पश्य॑सि यातु॒धान॑म् ।
अ॒थ॒र्व॒वज्ज्योति॑षा॒ दैव्ये॑न स॒त्यं धूर्व॑न्तम॒चितं॒ न्यो॑ष ॥१२॥

Tadagne chakshuh prati dhehi rebhe shapharujam yena pashyasi yatudhanam
Atharvavajjyotisha daivyena satyam dhurvantamachitam nyosha

87.13

यद॑ग्ने अ॒द्य मि॑थु॒ना शपा॑तो॒ यद्वा॒चस्तृ॒ष्टं ज॒नय॑न्त रे॒भाः ।
म॒न्योर्मन॑सः शर॒व्या॒३ जाय॑ते॒ या तया॑ विध्य॒ हृद॑ये यातु॒धाना॑न् ॥१३॥

Yadagne adya mithuna shapato yadvachastrishtam janayanta rebhah
Manyormanasah sharavya3 jayate ya taya vidhya hridaye yatudhanan

87.14

परा॑ शृणीहि॒ तप॑सा यातु॒धाना॒न्परा॑ग्ने॒ रक्षो॒ हर॑सा शृणीहि ।
परा॒र्चिषा॒ मूर॑देवाञ्छृणीहि॒ परा॑सु॒तृपो॑ अ॒भि शोशु॑चानः ॥१४॥

Para shrinihi tapasa yatudhananparagne raksho harasa shrinihi
Pararchisha muradevanchhrinihi parasutripo abhi shoshuchanah

87.15

परा॒द्य दे॒वा वृ॑जि॒नं शृ॑णन्तु प्र॒त्यगे॑नं श॒पथा॑ यन्तु तृ॒ष्टाः ।
वा॒चास्ते॑नं॒ शर॑व ऋच्छन्तु॒ मर्म॒न्विश्व॑स्यैतु॒ प्रसि॑तिं यातु॒धान॑ः ॥१५॥

Paradya deva vrijinam shrinantu pratyagenam shapatha yantu trishtah
Vachastenam sharava richchhantu marmanvishvasyaitu prasitim yatudhanah

87.16

यः पौरु॑षेयेण क्र॒विषा॑ सम॒ङ्क्ते यो अश्व्ये॑न प॒शुना॑ यातु॒धान॑ः ।
यो अ॒घ्न्याया॒ भर॑ति क्षी॒रम॑ग्ने॒ तेषां॑ शी॒र्षाणि॒ हर॒सापि॑ वृश्च ॥१६॥

Yah paurusheyena kravisha samankte yo ashvyena pashuna yatudhanah
Yo aghnyaya bharati kshiramagne tesham shirshani harasapi vrishcha

87.17

सं॒व॒त्स॒रीणं॒ पय॑ उ॒स्रिया॑या॒स्तस्य॒ माशी॑द्यातु॒धानो॑ नृचक्षः ।
पी॒यूष॑मग्ने यत॒मस्तितृ॑प्सा॒त्तं प्र॒त्यञ्च॑म॒र्चिषा॑ विध्य॒ मर्म॑न् ॥१७॥

Sanvatsarinam paya usriyayastasya mashidyatudhano nrichakshah
Piyushamagne yatamastitripsattam pratyanchamarchisha vidhya marman

87.18

वि॒षं गवां॑ यातु॒धाना॑ः पिब॒न्त्वा वृ॑श्च्यन्ता॒मदि॑तये दु॒रेवा॑ः ।
परै॑नान्दे॒वः स॑वि॒ता द॑दातु॒ परा॑ भा॒गमोष॑धीनां जयन्ताम् ॥१८॥

Visham gavam yatudhanah pibantva vrishchyantamaditaye durevah
Parainandevah savita dadatu para bhagamoshadhinam jayantam

87.19

स॒नाद॑ग्ने मृणसि यातु॒धाना॒न्न त्वा॒ रक्षां॑सि॒ पृत॑नासु जिग्युः ।
अनु॑ दह स॒हमू॑रान्क्र॒व्यादो॒ मा ते॑ हे॒त्या मु॑क्षत॒ दैव्या॑याः ॥१९॥

Sanadagne mrinasi yatudhananna tva rakshansi pritanasu jigyuh
Anu daha sahamurankravyado ma te hetya mukshata daivyayah

87.20

त्वं नो॑ अग्ने अध॒रादुद॑क्ता॒त्त्वं प॒श्चादु॒त र॑क्षा पु॒रस्ता॑त् ।
प्रति॒ ते ते॑ अ॒जरा॑स॒स्तपि॑ष्ठा अ॒घशं॑सं॒ शोशु॑चतो दहन्तु ॥२०॥

Tvam no agne adharadudaktattvam pashchaduta raksha purastat
Prati te te ajarasastapishtha aghashansam shoshuchato dahantu

87.21

प॒श्चात्पु॒रस्ता॑दध॒रादुद॑क्तात्क॒विः काव्ये॑न॒ परि॑ पाहि राजन् ।
सखे॒ सखा॑यम॒जरो॑ जरि॒म्णेऽग्ने॒ मर्ताँ॒ अम॑र्त्य॒स्त्वं न॑ः ॥२१॥

Pashchatpurastadadharadudaktatkavih kavyena pari pahi rajan
Sakhe sakhayamajaro jarimnegne martam amartyastvam nah

87.22

परि॑ त्वाग्ने॒ पुरं॑ व॒यं विप्रं॑ सहस्य धीमहि । धृ॒षद्व॑र्णं दि॒वेदि॑वे ह॒न्तारं॑ भङ्गु॒राव॑ताम् ॥२२॥

Pari tvagne puram vayam vipram sahasya dhimahi, dhrishadvarnam divedive hantaram bhanguravatam

87.23

वि॒षेण॑ भङ्गु॒राव॑त॒ः प्रति॑ ष्म र॒क्षसो॑ दह । अग्ने॑ ति॒ग्मेन॑ शो॒चिषा॒ तपु॑रग्राभिॠ॒ष्टिभि॑ः ॥२३॥

Vishena bhanguravatah prati shma rakshaso daha, agne tigmena shochisha tapuragrabhirishtibhih

87.24

प्रत्य॑ग्ने मिथु॒ना द॑ह यातु॒धाना॑ किमी॒दिना॑ । सं त्वा॑ शिशामि जागृ॒ह्यद॑ब्धं विप्र॒ मन्म॑भिः ॥२४॥

Pratyagne mithuna daha yatudhana kimidina, sam tva shishami jagrihyadabdham vipra manmabhih

87.25

प्रत्य॑ग्ने॒ हर॑सा॒ हर॑ः शृणी॒हि वि॒श्वत॒ः प्रति॑ । या॒तु॒धान॑स्य र॒क्षसो॒ बलं॒ वि रु॑ज वी॒र्य॑म् ॥२५॥

Pratyagne harasa harah shrinihi vishvatah prati, yatudhanasya rakshaso balam vi ruja viryam