Sukta 7

7.1

7 trita aptyah, agnih, trishtup

स्व॒स्ति नो॑ दि॒वो अ॑ग्ने पृथि॒व्या वि॒श्वायु॑र्धेहि य॒जथा॑य देव ।
सचे॑महि॒ तव॑ दस्म प्रके॒तैरु॑रु॒ष्या ण॑ उ॒रुभि॑र्देव॒ शंसै॑ः ॥१॥

Svasti no divo agne prithivya vishvayurdhehi yajathaya deva
Sachemahi tava dasma praketairurushya na urubhirdeva shansaih

इ॒मा अ॑ग्ने म॒तय॒स्तुभ्यं॑ जा॒ता गोभि॒रश्वै॑र॒भि गृ॑णन्ति॒ राध॑ः ।
य॒दा ते॒ मर्तो॒ अनु॒ भोग॒मान॒ड्वसो॒ दधा॑नो म॒तिभि॑ः सुजात ॥२॥

Ima agne matayastubhyam jata gobhirashvairabhi grinanti radhah
Yada te marto anu bhogamanadvaso dadhano matibhih sujata

अ॒ग्निं म॑न्ये पि॒तर॑म॒ग्निमा॒पिम॒ग्निं भ्रात॑रं॒ सद॒मित्सखा॑यम् ।
अ॒ग्नेरनी॑कं बृह॒तः स॑पर्यं दि॒वि शु॒क्रं य॑ज॒तं सूर्य॑स्य ॥३॥

Agnim manye pitaramagnimapimagnim bhrataram sadamitsakhayam
Agneranikam brihatah saparyam divi shukram yajatam suryasya

सि॒ध्रा अ॑ग्ने॒ धियो॑ अ॒स्मे सनु॑त्री॒र्यं त्राय॑से॒ दम॒ आ नित्य॑होता ।
ऋ॒तावा॒ स रो॒हिद॑श्वः पुरु॒क्षुर्द्युभि॑रस्मा॒ अह॑भिर्वा॒मम॑स्तु ॥४॥

Sidhra agne dhiyo asme sanutriryam trayase dama a nityahota
Ritava sa rohidashvah purukshurdyubhirasma ahabhirvamamastu

द्युभि॑र्हि॒तं मि॒त्रमि॑व प्र॒योगं॑ प्र॒त्नमृ॒त्विज॑मध्व॒रस्य॑ जा॒रम् ।
बा॒हुभ्या॑म॒ग्निमा॒यवो॑ऽजनन्त वि॒क्षु होता॑रं॒ न्य॑सादयन्त ॥५॥

Dyubhirhitam mitramiva prayogam pratnamritvijamadhvarasya jaram
Bahubhyamagnimayavojananta vikshu hotaram nyasadayanta

स्व॒यं य॑जस्व दि॒वि दे॑व दे॒वान्किं ते॒ पाक॑ः कृणव॒दप्र॑चेताः ।
यथाय॑ज ऋ॒तुभि॑र्देव दे॒वाने॒वा य॑जस्व त॒न्वं॑ सुजात ॥६॥

Svayam yajasva divi deva devankim te pakah krinavadaprachetah
Yathayaja ritubhirdeva devaneva yajasva tanvam sujata

भवा॑ नो अग्नेऽवि॒तोत गो॒पा भवा॑ वय॒स्कृदु॒त नो॑ वयो॒धाः ।
रास्वा॑ च नः सुमहो ह॒व्यदा॑तिं॒ त्रास्वो॒त न॑स्त॒न्वो॒३ अप्र॑युच्छन् ॥७॥

Bhava no agnevitota gopa bhava vayaskriduta no vayodhah
Rasva cha nah sumaho havyadatim trasvota nastanvo3 aprayuchchhan