Sukta 47

47.1

8 saptagurangirasah, vaikuntha indrah, trishtup

ज॒गृ॒भ्मा ते॒ दक्षि॑णमिन्द्र॒ हस्तं॑ वसू॒यवो॑ वसुपते॒ वसू॑नाम् ।
वि॒द्मा हि त्वा॒ गोप॑तिं शूर॒ गोना॑म॒स्मभ्यं॑ चि॒त्रं वृष॑णं र॒यिं दा॑ः ॥१॥

Jagribhma te dakshinamindra hastam vasuyavo vasupate vasunam
Vidma hi tva gopatim shura gonamasmabhyam chitram vrishanam rayim dah

47.2

स्वा॒यु॒धं स्वव॑सं सुनी॒थं चतु॑ःसमुद्रं ध॒रुणं॑ रयी॒णाम् ।
च॒र्कृत्यं॒ शंस्यं॒ भूरि॑वारम॒स्मभ्यं॑ चि॒त्रं वृष॑णं र॒यिं दा॑ः ॥२॥

Svayudham svavasam sunitham chatuhsamudram dharunam rayinam
Charkrityam shansyam bhurivaramasmabhyam chitram vrishanam rayim dah

47.3

सु॒ब्रह्मा॑णं दे॒वव॑न्तं बृ॒हन्त॑मु॒रुं ग॑भी॒रं पृ॒थुबु॑ध्नमिन्द्र ।
श्रु॒तऋ॑षिमु॒ग्रम॑भिमाति॒षाह॑म॒स्मभ्यं॑ चि॒त्रं वृष॑णं र॒यिं दा॑ः ॥३॥

Subrahmanam devavantam brihantamurum gabhiram prithubudhnamindra
Shrutarishimugramabhimatishahamasmabhyam chitram vrishanam rayim dah

47.4

स॒नद्वा॑जं॒ विप्र॑वीरं॒ तरु॑त्रं धन॒स्पृतं॑ शूशु॒वांसं॑ सु॒दक्ष॑म् ।
द॒स्यु॒हनं॑ पू॒र्भिद॑मिन्द्र स॒त्यम॒स्मभ्यं॑ चि॒त्रं वृष॑णं र॒यिं दा॑ः ॥४॥

Sanadvajam vipraviram tarutram dhanaspritam shushuvansam sudaksham
Dasyuhanam purbhidamindra satyamasmabhyam chitram vrishanam rayim dah

47.5

अश्वा॑वन्तं र॒थिनं॑ वी॒रव॑न्तं सह॒स्रिणं॑ श॒तिनं॒ वाज॑मिन्द्र ।
भ॒द्रव्रा॑तं॒ विप्र॑वीरं स्व॒र्षाम॒स्मभ्यं॑ चि॒त्रं वृष॑णं र॒यिं दा॑ः ॥५॥

Ashvavantam rathinam viravantam sahasrinam shatinam vajamindra
Bhadravratam vipraviram svarshamasmabhyam chitram vrishanam rayim dah

47.6

प्र स॒प्तगु॑मृ॒तधी॑तिं सुमे॒धां बृह॒स्पतिं॑ म॒तिरच्छा॑ जिगाति ।
य आ॑ङ्गिर॒सो नम॑सोप॒सद्यो॒ऽस्मभ्यं॑ चि॒त्रं वृष॑णं र॒यिं दा॑ः ॥६॥

Pra saptagumritadhitim sumedham brihaspatim matirachchha jigati
Ya angiraso namasopasadyosmabhyam chitram vrishanam rayim dah

47.7

वनी॑वानो॒ मम॑ दू॒तास॒ इन्द्रं॒ स्तोमा॑श्चरन्ति सुम॒तीरि॑या॒नाः ।
हृ॒दि॒स्पृशो॒ मन॑सा व॒च्यमा॑ना अ॒स्मभ्यं॑ चि॒त्रं वृष॑णं र॒यिं दा॑ः ॥७॥

Vanivano mama dutasa indram stomashcharanti sumatiriyanah
Hridisprisho manasa vachyamana asmabhyam chitram vrishanam rayim dah

47.8

यत्त्वा॒ यामि॑ द॒द्धि तन्न॑ इन्द्र बृ॒हन्तं॒ क्षय॒मस॑मं॒ जना॑नाम् ।
अ॒भि तद्द्यावा॑पृथि॒वी गृ॑णीताम॒स्मभ्यं॑ चि॒त्रं वृष॑णं र॒यिं दा॑ः ॥८॥

Yattva yami daddhi tanna indra brihantam kshayamasamam jananam
Abhi taddyavaprithivi grinitamasmabhyam chitram vrishanam rayim dah