Sukta 34

34.1

14 kavasha ailushah, aksho maujavan va, 1, 7, 9, 12 akshah, 13 rishih, 2-6, 8, 10, 11, 14 aksha-kitava-ninda, trishtup, 7 jagati

प्रा॒वे॒पा मा॑ बृह॒तो मा॑दयन्ति प्रवाते॒जा इरि॑णे॒ वर्वृ॑तानाः ।
सोम॑स्येव मौजव॒तस्य॑ भ॒क्षो वि॒भीद॑को॒ जागृ॑वि॒र्मह्य॑मच्छान् ॥१॥

Pravepa ma brihato madayanti pravateja irine varvritanah
Somasyeva maujavatasya bhaksho vibhidako jagrivirmahyamachchhan

34.2

न मा॑ मिमेथ॒ न जि॑हीळ ए॒षा शि॒वा सखि॑भ्य उ॒त मह्य॑मासीत् ।
अ॒क्षस्या॒हमे॑कप॒रस्य॑ हे॒तोरनु॑व्रता॒मप॑ जा॒याम॑रोधम् ॥२॥

Na ma mimetha na jihila esha shiva sakhibhya uta mahyamasit
Akshasyahamekaparasya hetoranuvratamapa jayamarodham

34.3

द्वेष्टि॑ श्व॒श्रूरप॑ जा॒या रु॑णद्धि॒ न ना॑थि॒तो वि॑न्दते मर्डि॒तार॑म् ।
अश्व॑स्येव॒ जर॑तो॒ वस्न्य॑स्य॒ नाहं वि॑न्दामि कित॒वस्य॒ भोग॑म् ॥३॥

Dveshti shvashrurapa jaya runaddhi na nathito vindate marditaram
Ashvasyeva jarato vasnyasya naham vindami kitavasya bhogam

34.4

अ॒न्ये जा॒यां परि॑ मृशन्त्यस्य॒ यस्यागृ॑ध॒द्वेद॑ने वा॒ज्य१क्षः ।
पि॒ता मा॒ता भ्रात॑र एनमाहु॒र्न जा॑नीमो॒ नय॑ता ब॒द्धमे॒तम् ॥४॥

Anye jayam pari mrishantyasya yasyagridhadvedane vajya1kshah
Pita mata bhratara enamahurna janimo nayata baddhametam

34.5

यदा॒दीध्ये॒ न द॑विषाण्येभिः परा॒यद्भ्योऽव॑ हीये॒ सखि॑भ्यः ।
न्यु॑प्ताश्च ब॒भ्रवो॒ वाच॒मक्र॑तँ॒ एमीदे॑षां निष्कृ॒तं जा॒रिणी॑व ॥५॥

Yadadidhye na davishanyebhih parayadbhyova hiye sakhibhyah
Nyuptashcha babhravo vachamakratam emidesham nishkritam jariniva

34.6

स॒भामे॑ति कित॒वः पृ॒च्छमा॑नो जे॒ष्यामीति॑ त॒न्वा॒३ शूशु॑जानः ।
अ॒क्षासो॑ अस्य॒ वि ति॑रन्ति॒ कामं॑ प्रति॒दीव्ने॒ दध॑त॒ आ कृ॒तानि॑ ॥६॥

Sabhameti kitavah prichchhamano jeshyamiti tanva3 shushujanah
Akshaso asya vi tiranti kamam pratidivne dadhata a kritani

34.7

अ॒क्षास॒ इद॑ङ्कु॒शिनो॑ नितो॒दिनो॑ नि॒कृत्वा॑न॒स्तप॑नास्तापयि॒ष्णव॑ः ।
कु॒मा॒रदे॑ष्णा॒ जय॑तः पुन॒र्हणो॒ मध्वा॒ सम्पृ॑क्ताः कित॒वस्य॑ ब॒र्हणा॑ ॥७॥

Akshasa idankushino nitodino nikritvanastapanastapayishnavah
Kumaradeshna jayatah punarhano madhva sampriktah kitavasya barhana

34.8

त्रि॒प॒ञ्चा॒शः क्री॑ळति॒ व्रात॑ एषां दे॒व इ॑व सवि॒ता स॒त्यध॑र्मा ।
उ॒ग्रस्य॑ चिन्म॒न्यवे॒ ना न॑मन्ते॒ राजा॑ चिदेभ्यो॒ नम॒ इत्कृ॑णोति ॥८॥

Tripanchashah krilati vrata esham deva iva savita satyadharma
Ugrasya chinmanyave na namante raja chidebhyo nama itkrinoti

34.9

नी॒चा व॑र्तन्त उ॒परि॑ स्फुरन्त्यह॒स्तासो॒ हस्त॑वन्तं सहन्ते ।
दि॒व्या अङ्गा॑रा॒ इरि॑णे॒ न्यु॑प्ताः शी॒ताः सन्तो॒ हृद॑यं॒ निर्द॑हन्ति ॥९॥

Nicha vartanta upari sphurantyahastaso hastavantam sahante
Divya angara irine nyuptah shitah santo hridayam nirdahanti

34.10

जा॒या त॑प्यते कित॒वस्य॑ ही॒ना मा॒ता पु॒त्रस्य॒ चर॑त॒ः क्व॑ स्वित् ।
ऋ॒णा॒वा बिभ्य॒द्धन॑मि॒च्छमा॑नो॒ऽन्येषा॒मस्त॒मुप॒ नक्त॑मेति ॥१०॥

Jaya tapyate kitavasya hina mata putrasya charatah kva svit
Rinava bibhyaddhanamichchhamanonyeshamastamupa naktameti

34.11

स्त्रियं॑ दृ॒ष्ट्वाय॑ कित॒वं त॑तापा॒ऽन्येषां॑ जा॒यां सुकृ॑तं च॒ योनि॑म् ।
पू॒र्वा॒ह्णे अश्वा॑न्युयु॒जे हि ब॒भ्रून्त्सो अ॒ग्नेरन्ते॑ वृष॒लः प॑पाद ॥११॥

Striyam drishtvaya kitavam tatapanyesham jayam sukritam cha yonim
Purvahne ashvanyuyuje hi babhruntso agnerante vrishalah papada

34.12

यो व॑ः सेना॒नीर्म॑ह॒तो ग॒णस्य॒ राजा॒ व्रात॑स्य प्रथ॒मो ब॒भूव॑ ।
तस्मै॑ कृणोमि॒ न धना॑ रुणध्मि॒ दशा॒हं प्राची॒स्तदृ॒तं व॑दामि ॥१२॥

Yo vah senanirmahato ganasya raja vratasya prathamo babhuva
Tasmai krinomi na dhana runadhmi dashaham prachistadritam vadami

34.13

अ॒क्षैर्मा दी॑व्यः कृ॒षिमित्कृ॑षस्व वि॒त्ते र॑मस्व ब॒हु मन्य॑मानः ।
तत्र॒ गाव॑ः कितव॒ तत्र॑ जा॒या तन्मे॒ वि च॑ष्टे सवि॒तायम॒र्यः ॥१३॥

Akshairma divyah krishimitkrishasva vitte ramasva bahu manyamanah
Tatra gavah kitava tatra jaya tanme vi chashte savitayamaryah

34.14

मि॒त्रं कृ॑णुध्वं॒ खलु॑ मृ॒ळता॑ नो॒ मा नो॑ घो॒रेण॑ चरता॒भि धृ॒ष्णु ।
नि वो॒ नु म॒न्युर्वि॑शता॒मरा॑तिर॒न्यो ब॑भ्रू॒णां प्रसि॑तौ॒ न्व॑स्तु ॥१४॥

Mitram krinudhvam khalu mrilata no ma no ghorena charatabhi dhrishnu
Ni vo nu manyurvishatamaratiranyo babhrunam prasitau nvastu