Sukta 144

144.1

6 tarkshryah suparnah, yamayana urdhvakrishano va, indrah, gayatri, 2 brihati, 5 satobrihati, 6 vishtarapanktih

अ॒यं हि ते॒ अम॑र्त्य॒ इन्दु॒रत्यो॒ न पत्य॑ते । दक्षो॑ वि॒श्वायु॑र्वे॒धसे॑ ॥१॥

Ayam hi te amartya induratyo na patyate, daksho vishvayurvedhase

अ॒यम॒स्मासु॒ काव्य॑ ऋ॒भुर्वज्रो॒ दास्व॑ते । अ॒यं बि॑भर्त्यू॒र्ध्वकृ॑शनं॒ मद॑मृ॒भुर्न कृत्व्यं॒ मद॑म् ॥२॥

Ayamasmasu kavya ribhurvajro dasvate, ayam bibhartyurdhvakrishanam madamribhurna kritvyam madam

घृषु॑ः श्ये॒नाय॒ कृत्व॑न आ॒सु स्वासु॒ वंस॑गः । अव॑ दीधेदही॒शुव॑ः ॥३॥

Ghrishuh shyenaya kritvana asu svasu vansagah, ava didhedahishuvah

यं सु॑प॒र्णः प॑रा॒वत॑ः श्ये॒नस्य॑ पु॒त्र आभ॑रत् । श॒तच॑क्रं॒ यो॒३ऽह्यो॑ वर्त॒निः ॥४॥

Yam suparnah paravatah shyenasya putra abharat, shatachakram yo3hyo vartanih

यं ते॑ श्ये॒नश्चारु॑मवृ॒कं प॒दाभ॑रदरु॒णं मा॒नमन्ध॑सः ।
ए॒ना वयो॒ वि ता॒र्यायु॑र्जी॒वस॑ ए॒ना जा॑गार ब॒न्धुता॑ ॥५॥

Yam te shyenashcharumavrikam padabharadarunam manamandhasah
Ena vayo vi taryayurjivasa ena jagara bandhuta

ए॒वा तदिन्द्र॒ इन्दु॑ना दे॒वेषु॑ चिद्धारयाते॒ महि॒ त्यज॑ः ।
क्रत्वा॒ वयो॒ वि ता॒र्यायु॑ः सुक्रतो॒ क्रत्वा॒यम॒स्मदा सु॒तः ॥६॥

Eva tadindra induna deveshu chiddharayate mahi tyajah
Kratva vayo vi taryayuh sukrato kratvayamasmada sutah