Sukta 121

121.1

10 hiranyagarbhah prajapatyah, kah(prajapatih), trishtup

हि॒र॒ण्य॒ग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् ।
स दा॑धार पृथि॒वीं द्यामु॒तेमां कस्मै॑ दे॒वाय॑ ह॒विषा॑ विधेम ॥१॥

Hiranyagarbhah samavartatagre bhutasya jatah patireka asit
Sa dadhara prithivim dyamutemam kasmai devaya havisha vidhema

य आ॑त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒ यस्य॑ दे॒वाः ।
यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ॥२॥

Ya atmada balada yasya vishva upasate prashisham yasya devah
Yasya chhayamritam yasya mrityuh kasmai devaya havisha vidhema

यः प्रा॑ण॒तो नि॑मिष॒तो म॑हि॒त्वैक॒ इद्राजा॒ जग॑तो ब॒भूव॑ ।
य ईशे॑ अ॒स्य द्वि॒पद॒श्चतु॑ष्पद॒ः कस्मै॑ दे॒वाय॑ ह॒विषा॑ विधेम ॥३॥

Yah pranato nimishato mahitvaika idraja jagato babhuva
Ya ishe asya dvipadashchatushpadah kasmai devaya havisha vidhema

यस्ये॒मे हि॒मव॑न्तो महि॒त्वा यस्य॑ समु॒द्रं र॒सया॑ स॒हाहुः ।
यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम ॥४॥

Yasyeme himavanto mahitva yasya samudram rasaya sahahuh
Yasyemah pradisho yasya bahu kasmai devaya havisha vidhema

येन॒ द्यौरु॒ग्रा पृ॑थि॒वी च॑ दृ॒ळ्हा येन॒ स्व॑ स्तभि॒तं येन॒ नाक॑ः ।
यो अ॒न्तरि॑क्षे॒ रज॑सो वि॒मान॒ः कस्मै॑ दे॒वाय॑ ह॒विषा॑ विधेम ॥५॥

Yena dyaurugra prithivi cha drilha yena sva stabhitam yena nakah
Yo antarikshe rajaso vimanah kasmai devaya havisha vidhema

यं क्रन्द॑सी॒ अव॑सा तस्तभा॒ने अ॒भ्यैक्षे॑तां॒ मन॑सा॒ रेज॑माने ।
यत्राधि॒ सूर॒ उदि॑तो वि॒भाति॒ कस्मै॑ दे॒वाय॑ ह॒विषा॑ विधेम ॥६॥

Yam krandasi avasa tastabhane abhyaikshetam manasa rejamane
Yatradhi sura udito vibhati kasmai devaya havisha vidhema

आपो॑ ह॒ यद्बृ॑ह॒तीर्विश्व॒माय॒न्गर्भं॒ दधा॑ना ज॒नय॑न्तीर॒ग्निम् ।
ततो॑ दे॒वानां॒ सम॑वर्त॒तासु॒रेक॒ः कस्मै॑ दे॒वाय॑ ह॒विषा॑ विधेम ॥७॥

Apo ha yadbrihatirvishvamayangarbham dadhana janayantiragnim
Tato devanam samavartatasurekah kasmai devaya havisha vidhema

यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नय॑न्तीर्य॒ज्ञम् ।
यो दे॒वेष्वधि॑ दे॒व एक॒ आसी॒त्कस्मै॑ दे॒वाय॑ ह॒विषा॑ विधेम ॥८॥

Yashchidapo mahina paryapashyaddaksham dadhana janayantiryagyam
Yo deveshvadhi deva eka asitkasmai devaya havisha vidhema

मा नो॑ हिंसीज्जनि॒ता यः पृ॑थि॒व्या यो वा॒ दिवं॑ स॒त्यध॑र्मा ज॒जान॑ ।
यश्चा॒पश्च॒न्द्रा बृ॑ह॒तीर्ज॒जान॒ कस्मै॑ दे॒वाय॑ ह॒विषा॑ विधेम ॥९॥

Ma no hinsijjanita yah prithivya yo va divam satyadharma jajana
Yashchapashchandra brihatirjajana kasmai devaya havisha vidhema

प्रजा॑पते॒ न त्वदे॒तान्य॒न्यो विश्वा॑ जा॒तानि॒ परि॒ ता ब॑भूव ।
यत्का॑मास्ते जुहु॒मस्तन्नो॑ अस्तु व॒यं स्या॑म॒ पत॑यो रयी॒णाम् ॥१०॥

Prajapate na tvadetanyanyo vishva jatani pari ta babhuva
Yatkamaste juhumastanno astu vayam syama patayo rayinam