Sukta 110

110.1

11 jamadagnirbhargavah, jamadagnyo ramo va, aprisuktam = (1 idhmah samiddhognirva, 2 tanunapat, 3 ilah, 4 barhih, 5 devirdvarah, 6 ushasanakta, 7 daivyau hotarau prachetasau, 8 trisro devyah sarasvatilabharatyah, 9 tvashta, 10 vanaspatih, 11 svahakritayah), trishtup

समि॑द्धो अ॒द्य मनु॑षो दुरो॒णे दे॒वो दे॒वान्य॑जसि जातवेदः ।
आ च॒ वह॑ मित्रमहश्चिकि॒त्वान्त्वं दू॒तः क॒विर॑सि॒ प्रचे॑ताः ॥१॥

Samiddho adya manusho durone devo devanyajasi jatavedah
A cha vaha mitramahashchikitvantvam dutah kavirasi prachetah

110.2

तनू॑नपात्प॒थ ऋ॒तस्य॒ याना॒न्मध्वा॑ सम॒ञ्जन्त्स्व॑दया सुजिह्व ।
मन्मा॑नि धी॒भिरु॒त य॒ज्ञमृ॒न्धन्दे॑व॒त्रा च॑ कृणुह्यध्व॒रं न॑ः ॥२॥

Tanunapatpatha ritasya yananmadhva samanjantsvadaya sujihva
Manmani dhibhiruta yagyamrindhandevatra cha krinuhyadhvaram nah

110.3

आ॒जुह्वा॑न॒ ईड्यो॒ वन्द्य॒श्चा ऽऽया॑ह्यग्ने॒ वसु॑भिः स॒जोषा॑ः ।
त्वं दे॒वाना॑मसि यह्व॒ होता॒ स ए॑नान्यक्षीषि॒तो यजी॑यान् ॥३॥

Ajuhvana idyo vandyashcha yahyagne vasubhih sajoshah
Tvam devanamasi yahva hota sa enanyakshishito yajiyan

110.4

प्रा॒चीनं॑ ब॒र्हिः प्र॒दिशा॑ पृथि॒व्या वस्तो॑र॒स्या वृ॑ज्यत॒र अग्रे॒ अह्ना॑म् ।
व्यु॑ प्रथते वित॒रं वरी॑यो दे॒वेभ्यो॒ अदि॑तये स्यो॒नम् ॥४॥

Prachinam barhih pradisha prithivya vastorasya vrijyatara agre ahnam
Vyu prathate vitaram variyo devebhyo aditaye syonam

110.5

व्यच॑स्वतीरुर्वि॒या वि श्र॑यन्तां॒ पति॑भ्यो॒ न जन॑य॒ः शुम्भ॑मानाः ।
देवी॑र्द्वारो बृहतीर्विश्वमिन्वा दे॒वेभ्यो॑ भवत सुप्राय॒णाः ॥५॥

Vyachasvatirurviya vi shrayantam patibhyo na janayah shumbhamanah
Devirdvaro brihatirvishvaminva devebhyo bhavata suprayanah

110.6

आ सु॒ष्वय॑न्ती यज॒ते उपा॑के उ॒षासा॒नक्ता॑ सदतां॒ नि योनौ॑ ।
दि॒व्ये योष॑णे बृह॒ती सु॑रु॒क्मे अधि॒ श्रियं॑ शुक्र॒पिशं॒ दधा॑ने ॥६॥

A sushvayanti yajate upake ushasanakta sadatam ni yonau
Divye yoshane brihati surukme adhi shriyam shukrapisham dadhane

110.7

दैव्या॒ होता॑रा प्रथ॒मा सु॒वाचा॒ मिमा॑ना य॒ज्ञं मनु॑षो॒ यज॑ध्यै ।
प्र॒चो॒दय॑न्ता वि॒दथे॑षु का॒रू प्रा॒चीनं॒ ज्योति॑ः प्र॒दिशा॑ दि॒शन्ता॑ ॥७॥

Daivya hotara prathama suvacha mimana yagyam manusho yajadhyai
Prachodayanta vidatheshu karu prachinam jyotih pradisha dishanta

110.8

आ नो॑ य॒ज्ञं भार॑ती॒ तूय॑मे॒त्विळा॑ मनु॒ष्वदि॒ह चे॒तय॑न्ती ।
ति॒स्रो दे॒वीर्ब॒र्हिरेदं स्यो॒नं सर॑स्वती॒ स्वप॑सः सदन्तु ॥८॥

A no yagyam bharati tuyametvila manushvadiha chetayanti
Tisro devirbarhiredam syonam sarasvati svapasah sadantu

110.9

य इ॒मे द्यावा॑पृथि॒वी जनि॑त्री रू॒पैरपिं॑श॒द्भुव॑नानि॒ विश्वा॑ ।
तम॒द्य हो॑तरिषि॒तो यजी॑यान्दे॒वं त्वष्टा॑रमि॒ह य॑क्षि वि॒द्वान् ॥९॥

Ya ime dyavaprithivi janitri rupairapinshadbhuvanani vishva
Tamadya hotarishito yajiyandevam tvashtaramiha yakshi vidvan

110.10

उ॒पाव॑सृज॒ त्मन्या॑ सम॒ञ्जन्दे॒वानां॒ पाथ॑ ऋतु॒था ह॒वींषि॑ ।
वन॒स्पति॑ः शमि॒ता दे॒वो अ॒ग्निः स्वद॑न्तु ह॒व्यं मधु॑ना घृ॒तेन॑ ॥१०॥

Upavasrija tmanya samanjandevanam patha ritutha havinshi
Vanaspatih shamita devo agnih svadantu havyam madhuna ghritena

110.11

स॒द्यो जा॒तो व्य॑मिमीत य॒ज्ञम॒ग्निर्दे॒वाना॑मभवत्पुरो॒गाः ।
अ॒स्य होतु॑ः प्र॒दिश्यृ॒तस्य॑ वा॒चि स्वाहा॑कृतं ह॒विर॑दन्तु दे॒वाः ॥११॥

Sadyo jato vyamimita yagyamagnirdevanamabhavatpurogah
Asya hotuh pradishyritasya vachi svahakritam haviradantu devah