Sukta 164

164.1

52 dirghatama auchathyah, 1-41 vishve devah, 42 adyardharchasya vak, dvitiyasya apah, 43 adyardharchasya shakadhumah, dvitiyasya somah, 44 keshinah (agnih suryo vayushcha, ) 45 vak, 46-47 suryah, 48 sanvatsara kalachakram, 49 sarasvati, 50 sadhyah, 51 suryah, parjanyagnayo va, 52 sarasvan, suryo va, trishtup 12, 15, 23, 29, 36, 41 jagati, 42 prastara panktih, 51 anushtap

अ॒स्य वा॒मस्य॑ पलि॒तस्य॒ होतु॒स्तस्य॒ भ्राता॑ मध्य॒मो अ॒स्त्यश्न॑ः ।
तृ॒तीयो॒ भ्राता॑ घृ॒तपृ॑ष्ठो अ॒स्यात्रा॑पश्यं वि॒श्पतिं॑ स॒प्तपु॑त्रम् ॥१॥

Asya vamasya palitasya hotustasya bhrata madhyamo astyashnah
Tritiyo bhrata ghritaprishtho asyatrapashyam vishpatim saptaputram

164.2

स॒प्त यु॑ञ्जन्ति॒ रथ॒मेक॑चक्र॒मेको॒ अश्वो॑ वहति स॒प्तना॑मा ।
त्रि॒नाभि॑ च॒क्रम॒जर॑मन॒र्वं यत्रे॒मा विश्वा॒ भुव॒नाधि॑ त॒स्थुः ॥२॥

Sapta yunjanti rathamekachakrameko ashvo vahati saptanama
Trinabhi chakramajaramanarvam yatrema vishva bhuvanadhi tasthuh

164.3

इ॒मं रथ॒मधि॒ ये स॒प्त त॒स्थुः स॒प्तच॑क्रं स॒प्त व॑ह॒न्त्यश्वा॑ः ।
स॒प्त स्वसा॑रो अ॒भि सं न॑वन्ते॒ यत्र॒ गवां॒ निहि॑ता स॒प्त नाम॑ ॥३॥

Imam rathamadhi ye sapta tasthuh saptachakram sapta vahantyashvah
Sapta svasaro abhi sam navante yatra gavam nihita sapta nama

164.4

को द॑दर्श प्रथ॒मं जाय॑मानमस्थ॒न्वन्तं॒ यद॑न॒स्था बिभ॑र्ति ।
भूम्या॒ असु॒रसृ॑गा॒त्मा क्व॑ स्वि॒त् को वि॒द्वांस॒मुप॑ गा॒त् प्रष्टु॑मे॒तत् ॥४॥

Ko dadarsha prathamam jayamanamasthanvantam yadanastha bibharti
Bhumya asurasrigatma kva svit ko vidvansamupa gat prashtumetat

164.5

पाक॑ः पृच्छामि॒ मन॒सावि॑जानन् दे॒वाना॑मे॒ना निहि॑ता प॒दानि॑ ।
व॒त्से ब॒ष्कयेऽधि॑ स॒प्त तन्तू॒न् वि त॑त्निरे क॒वय॒ ओत॒वा उ॑ ॥५॥

Pakah prichchhami manasavijanan devanamena nihita padani
Vatse bashkayedhi sapta tantun vi tatnire kavaya otava u

164.6

अचि॑कित्वाञ्चिकि॒तुष॑श्चि॒दत्र॑ क॒वीन् पृ॑च्छामि वि॒द्मने॒ न वि॒द्वान् ।
वि यस्त॒स्तम्भ॒ षळि॒मा रजां॑स्य॒जस्य॑ रू॒पे किमपि॑ स्वि॒देक॑म् ॥६॥

Achikitvanchikitushashchidatra kavin prichchhami vidmane na vidvan
Vi yastastambha shalima rajansyajasya rupe kimapi svidekam

164.7

इ॒ह ब्र॑वीतु॒ य ई॑म॒ङ्ग वेदा॒स्य वा॒मस्य॒ निहि॑तं प॒दं वेः ।
शी॒र्ष्णः क्षी॒रं दु॑ह्रते॒ गावो॑ अस्य व॒व्रिं वसा॑ना उद॒कं प॒दापु॑ः ॥७॥

Iha bravitu ya imanga vedasya vamasya nihitam padam veh
Shirshnah kshiram duhrate gavo asya vavrim vasana udakam padapuh

164.8

मा॒ता पि॒तर॑मृ॒त आ ब॑भाज धी॒त्यग्रे॒ मन॑सा॒ सं हि ज॒ग्मे ।
सा बी॑भ॒त्सुर्गर्भ॑रसा॒ निवि॑द्धा॒ नम॑स्वन्त॒ इदु॑पवा॒कमी॑युः ॥८॥

Mata pitaramrita a babhaja dhityagre manasa sam hi jagme
Sa bibhatsurgarbharasa nividdha namasvanta idupavakamiyuh

164.9

यु॒क्ता मा॒तासी॑द् धु॒रि दक्षि॑णाया॒ अति॑ष्ठ॒द् गर्भो॑ वृज॒नीष्व॒न्तः ।
अमी॑मेद् व॒त्सो अनु॒ गाम॑पश्यद् विश्वरू॒प्यं॑ त्रि॒षु योज॑नेषु ॥९॥

Yukta matasid dhuri dakshinaya atishthad garbho vrijanishvantah
Amimed vatso anu gamapashyad vishvarupyam trishu yojaneshu

164.10

ति॒स्रो मा॒तॄस्त्रीन् पितॄन् बिभ्र॒देक॑ ऊ॒र्ध्वस्त॑स्थौ॒ नेमव॑ ग्लापयन्ति ।
म॒न्त्रय॑न्ते दि॒वो अ॒मुष्य॑ पृ॒ष्ठे वि॑श्व॒विदं॒ वाच॒मवि॑श्वमिन्वाम् ॥१०॥

Tisro matristrin pitrin bibhradeka urdhvastasthau nemava glapayanti
Mantrayante divo amushya prishthe vishvavidam vachamavishvaminvam

164.11

द्वाद॑शारं न॒हि तज्जरा॑य॒ वर्व॑र्ति च॒क्रं परि॒ द्यामृ॒तस्य॑ ।
आ पु॒त्रा अ॑ग्ने मिथु॒नासो॒ अत्र॑ स॒प्त श॒तानि॑ विंश॒तिश्च॑ तस्थुः ॥११॥

Dvadasharam nahi tajjaraya varvarti chakram pari dyamritasya
A putra agne mithunaso atra sapta shatani vinshatishcha tasthuh

164.12

पञ्च॑पादं पि॒तरं॒ द्वाद॑शाकृतिं दि॒व आ॑हु॒ः परे॒ अर्धे॑ पुरी॒षिण॑म् ।
अथे॒मे अ॒न्य उप॑रे विचक्ष॒णं स॒प्तच॑क्रे॒ षळ॑र आहु॒रर्पि॑तम् ॥१२॥

Panchapadam pitaram dvadashakritim diva ahuh pare ardhe purishinam
Atheme anya upare vichakshanam saptachakre shalara ahurarpitam

164.13

पञ्चा॑रे च॒क्रे प॑रि॒वर्त॑माने॒ तस्मि॒न्ना त॑स्थु॒र्भुव॑नानि॒ विश्वा॑ ।
तस्य॒ नाक्ष॑स्तप्यते॒ भूरि॑भारः स॒नादे॒व न शी॑र्यते॒ सना॑भिः ॥१३॥

Panchare chakre parivartamane tasminna tasthurbhuvanani vishva
Tasya nakshastapyate bhuribharah sanadeva na shiryate sanabhih

164.14

सने॑मि च॒क्रम॒जरं॒ वि वा॑वृत उत्ता॒नायां॒ दश॑ यु॒क्ता व॑हन्ति ।
सूर्य॑स्य॒ चक्षू॒ रज॑सै॒त्यावृ॑तं॒ तस्मि॒न्नार्पि॑ता॒ भुव॑नानि॒ विश्वा॑ ॥१४॥

Sanemi chakramajaram vi vavrita uttanayam dasha yukta vahanti
Suryasya chakshu rajasaityavritam tasminnarpita bhuvanani vishva

164.15

सा॒कं॒जानां॑ स॒प्तथ॑माहुरेक॒जं षळिद् य॒मा ऋष॑यो देव॒जा इति॑ ।
तेषा॑मि॒ष्टानि॒ विहि॑तानि धाम॒शः स्था॒त्रे रे॑जन्ते॒ विकृ॑तानि रूप॒शः ॥१५॥

Sakanjanam saptathamahurekajam shalid yama rishayo devaja iti
Teshamishtani vihitani dhamashah sthatre rejante vikritani rupashah

164.16

स्त्रिय॑ः स॒तीस्ताँ उ॑ मे पुं॒स आ॑हु॒ः पश्य॑दक्ष॒ण्वान्न वि चे॑तद॒न्धः ।
क॒विर्यः पु॒त्रः स ई॒मा चि॑केत॒ यस्ता वि॑जा॒नात् स पि॒तुष्पि॒तास॑त् ॥१६॥

Striyah satistam u me punsa ahuh pashyadakshanvanna vi chetadandhah
Kaviryah putrah sa ima chiketa yasta vijanat sa pitushpitasat

164.17

अ॒वः परे॑ण प॒र ए॒नाव॑रेण प॒दा व॒त्सं बिभ्र॑ती॒ गौरुद॑स्थात् ।
सा क॒द्रीची॒ कं स्वि॒दर्धं॒ परा॑गा॒त् क्व॑ स्वित् सूते न॒हि यू॒थे अ॒न्तः ॥१७॥

Avah parena para enavarena pada vatsam bibhrati gaurudasthat
Sa kadrichi kam svidardham paragat kva svit sute nahi yuthe antah

164.18

अ॒वः परे॑ण पि॒तरं॒ यो अ॑स्यानु॒वेद॑ प॒र ए॒नाव॑रेण ।
क॒वी॒यमा॑न॒ः क इ॒ह प्र वो॑चद् दे॒वं मन॒ः कुतो॒ अधि॒ प्रजा॑तम् ॥१८॥

Avah parena pitaram yo asyanuveda para enavarena
Kaviyamanah ka iha pra vochad devam manah kuto adhi prajatam

164.19

ये अ॒र्वाञ्च॒स्ताँ उ॒ परा॑च आहु॒र्ये परा॑ञ्च॒स्ताँ उ॑ अ॒र्वाच॑ आहुः ।
इन्द्र॑श्च॒ या च॒क्रथु॑ः सोम॒ तानि॑ धु॒रा न यु॒क्ता रज॑सो वहन्ति ॥१९॥

Ye arvanchastam u paracha ahurye paranchastam u arvacha ahuh
Indrashcha ya chakrathuh soma tani dhura na yukta rajaso vahanti

164.20

द्वा सु॑प॒र्णा स॒युजा॒ सखा॑या समा॒नं वृ॒क्षं परि॑ षस्वजाते ।
तयो॑र॒न्यः पिप्प॑लं स्वा॒द्वत्त्यन॑श्नन्न॒न्यो अ॒भि चा॑कशीति ॥२०॥

Dva suparna sayuja sakhaya samanam vriksham pari shasvajate
Tayoranyah pippalam svadvattyanashnannanyo abhi chakashiti

164.21

यत्रा॑ सुप॒र्णा अ॒मृत॑स्य भा॒गमनि॑मेषं वि॒दथा॑भि॒स्वर॑न्ति ।
इ॒नो विश्व॑स्य॒ भुव॑नस्य गो॒पाः स मा॒ धीर॒ः पाक॒मत्रा वि॑वेश ॥२१॥

Yatra suparna amritasya bhagamanimesham vidathabhisvaranti
Ino vishvasya bhuvanasya gopah sa ma dhirah pakamatra vivesha

164.22

यस्मि॑न् वृ॒क्षे म॒ध्वद॑ः सुप॒र्णा नि॑वि॒शन्ते॒ सुव॑ते॒ चाधि॒ विश्वे॑ ।
तस्येदा॑हु॒ः पिप्प॑लं स्वा॒द्वग्रे॒ तन्नोन्न॑श॒द्यः पि॒तरं॒ न वेद॑ ॥२२॥

Yasmin vrikshe madhvadah suparna nivishante suvate chadhi vishve
Tasyedahuh pippalam svadvagre tannonnashadyah pitaram na veda

164.23

यद् गा॑य॒त्रे अधि॑ गाय॒त्रमाहि॑तं॒ त्रैष्टु॑भाद् वा॒ त्रैष्टु॑भं नि॒रत॑क्षत ।
यद् वा॒ जग॒ज्जग॒त्याहि॑तं प॒दं य इत् तद् वि॒दुस्ते अ॑मृत॒त्वमा॑नशुः ॥२३॥

Yad gayatre adhi gayatramahitam traishtubhad va traishtubham niratakshata
Yad va jagajjagatyahitam padam ya it tad viduste amritatvamanashuh

164.24

गा॒य॒त्रेण॒ प्रति॑ मिमीते अ॒र्कम॒र्केण॒ साम॒ त्रैष्टु॑भेन वा॒कम् ।
वा॒केन॑ वा॒कं द्वि॒पदा॒ चतु॑ष्पदा॒ ऽक्षरे॑ण मिमते स॒प्त वाणी॑ः ॥२४॥

Gayatrena prati mimite arkamarkena sama traishtubhena vakam
Vakena vakam dvipada chatushpada ksharena mimate sapta vanih

164.25

जग॑ता॒ सिन्धुं॑ दि॒व्य॑स्तभायद् रथंत॒रे सूर्यं॒ पर्य॑पश्यत् ।
गा॒य॒त्रस्य॑ स॒मिध॑स्ति॒स्र आ॑हु॒स्ततो॑ म॒ह्ना प्र रि॑रिचे महि॒त्वा ॥२५॥

Jagata sindhum divyastabhayad rathantare suryam paryapashyat
Gayatrasya samidhastisra ahustato mahna pra ririche mahitva

164.26

उप॑ ह्वये सु॒दुघां॑ धे॒नुमे॒तां सु॒हस्तो॑ गो॒धुगु॒त दो॑हदेनाम् ।
श्रेष्ठं॑ स॒वं स॑वि॒ता सा॑विषन्नो॒ ऽभी॑द्धो घ॒र्मस्तदु॒ षु प्र वो॑चम् ॥२६॥

Upa hvaye sudugham dhenumetam suhasto godhuguta dohadenam
Shreshtham savam savita savishanno bhiddho gharmastadu shu pra vocham

164.27

हि॒ङ्कृ॒ण्व॒ती व॑सु॒पत्नी॒ वसू॑नां व॒त्समि॒च्छन्ती॒ मन॑सा॒भ्यागा॑त् ।
दु॒हाम॒श्विभ्यां॒ पयो॑ अ॒घ्न्येयं सा व॑र्धतां मह॒ते सौभ॑गाय ॥२७॥

Hinkrinvati vasupatni vasunam vatsamichchhanti manasabhyagat
Duhamashvibhyam payo aghnyeyam sa vardhatam mahate saubhagaya

164.28

गौर॑मीमे॒दनु॑ व॒त्सं मि॒षन्तं॑ मू॒र्धानं॒ हिङ्ङ॑कृणो॒न्मात॒वा उ॑ ।
सृक्वा॑णं घ॒र्मम॒भि वा॑वशा॒ना मिमा॑ति मा॒युं पय॑ते॒ पयो॑भिः ॥२८॥

Gauramimedanu vatsam mishantam murdhanam hinngakrinonmatava u
Srikvanam gharmamabhi vavashana mimati mayum payate payobhih

164.29

अ॒यं स शि॑ङ्क्ते॒ येन॒ गौर॒भीवृ॑ता॒ मिमा॑ति मा॒युं ध्व॒सना॒वधि॑ श्रि॒ता ।
सा चि॒त्तिभि॒र्नि हि च॒कार॒ मर्त्यं॑ वि॒द्युद् भव॑न्ती॒ प्रति॑ व॒व्रिमौ॑हत ॥२९॥

Ayam sa shinkte yena gaurabhivrita mimati mayum dhvasanavadhi shrita
Sa chittibhirni hi chakara martyam vidyud bhavanti prati vavrimauhata

164.30

अ॒नच्छ॑ये तु॒रगा॑तु जी॒वमेज॑द्ध्रु॒वं मध्य॒ आ प॒स्त्या॑नाम् ।
जी॒वो मृ॒तस्य॑ चरति स्व॒धाभि॒रम॑र्त्यो॒ मर्त्ये॑ना॒ सयो॑निः ॥३०॥

Anachchhaye turagatu jivamejaddhruvam madhya a pastyanam
Jivo mritasya charati svadhabhiramartyo martyena sayonih

164.31

अप॑श्यं गो॒पामनि॑पद्यमान॒मा च॒ परा॑ च प॒थिभि॒श्चर॑न्तम् ।
स स॒ध्रीची॒ः स विषू॑ची॒र्वसा॑न॒ आ व॑रीवर्ति॒ भुव॑नेष्व॒न्तः ॥३१॥

Apashyam gopamanipadyamanama cha para cha pathibhishcharantam
Sa sadhrichih sa vishuchirvasana a varivarti bhuvaneshvantah

164.32

य ईं॑ च॒कार॒ न सो अ॒स्य वे॑द॒ य ईं॑ द॒दर्श॒ हिरु॒गिन्नु तस्मा॑त् ।
स मा॒तुर्योना॒ परि॑वीतो अ॒न्तर्ब॑हुप्र॒जा निर्ऋ॑ति॒मा वि॑वेश ॥३२॥

Ya im chakara na so asya veda ya im dadarsha hiruginnu tasmat
Sa maturyona parivito antarbahupraja nirritima vivesha

164.33

द्यौर्मे॑ पि॒ता ज॑नि॒ता नाभि॒रत्र॒ बन्धु॑र्मे मा॒ता पृ॑थि॒वी म॒हीयम् ।
उ॒त्ता॒नयो॑श्च॒म्वो॒३र्योनि॑र॒न्तरत्रा॑ पि॒ता दु॑हि॒तुर्गर्भ॒माधा॑त् ॥३३॥

Dyaurme pita janita nabhiratra bandhurme mata prithivi mahiyam
Uttanayoshchamvo3ryonirantaratra pita duhiturgarbhamadhat

164.34

पृ॒च्छामि॑ त्वा॒ पर॒मन्तं॑ पृथि॒व्याः पृ॒च्छामि॒ यत्र॒ भुव॑नस्य॒ नाभि॑ः ।
पृ॒च्छामि॑ त्वा॒ वृष्णो॒ अश्व॑स्य॒ रेत॑ः पृ॒च्छामि॑ वा॒चः प॑र॒मं व्यो॑म ॥३४॥

Prichchhami tva paramantam prithivyah prichchhami yatra bhuvanasya nabhih
Prichchhami tva vrishno ashvasya retah prichchhami vachah paramam vyoma

164.35

इ॒यं वेदि॒ः परो॒ अन्त॑ः पृथि॒व्या अ॒यं य॒ज्ञो भुव॑नस्य॒ नाभि॑ः ।
अ॒यं सोमो॒ वृष्णो॒ अश्व॑स्य॒ रेतो॑ ब्र॒ह्मायं वा॒चः प॑र॒मं व्यो॑म ॥३॥

Iyam vedih paro antah prithivya ayam yagyo bhuvanasya nabhih
Ayam somo vrishno ashvasya reto brahmayam vachah paramam vyoma

164.36

५॥
स॒प्तार्ध॑ग॒र्भा भुव॑नस्य॒ रेतो॒ विष्णो॑स्तिष्ठन्ति प्र॒दिशा॒ विध॑र्मणि ।
ते धी॒तिभि॒र्मन॑सा॒ ते वि॑प॒श्चित॑ः परि॒भुव॒ः परि॑ भवन्ति वि॒श्वत॑ः ॥३॥

5
Saptardhagarbha bhuvanasya reto vishnostishthanti pradisha vidharmani
Te dhitibhirmanasa te vipashchitah paribhuvah pari bhavanti vishvatah

164.37

६॥
न वि जा॑नामि॒ यदि॑वे॒दमस्मि॑ नि॒ण्यः संन॑द्धो॒ मन॑सा चरामि ।
य॒दा माग॑न् प्रथम॒जा ऋ॒तस्यादिद् वा॒चो अ॑श्नुवे भा॒गम॒स्याः ॥३॥

6
Na vi janami yadivedamasmi ninyah sannaddho manasa charami
Yada magan prathamaja ritasyadid vacho ashnuve bhagamasyah

164.38

७॥
अपा॒ङ् प्राङे॑ति स्व॒धया॑ गृभी॒तो ऽम॑र्त्यो॒ मर्त्ये॑ना॒ सयो॑निः ।
ता शश्व॑न्ता विषू॒चीना॑ वि॒यन्ता॒ न्य१न्यं चि॒क्युर्न नि चि॑क्युर॒न्यम् ॥३॥

7
Apang prangeti svadhaya gribhito martyo martyena sayonih
Ta shashvanta vishuchina viyanta nya1nyam chikyurna ni chikyuranyam

164.39

८॥
ऋ॒चो अ॒क्षरे॑ पर॒मे व्यो॑म॒न् यस्मि॑न् दे॒वा अधि॒ विश्वे॑ निषे॒दुः ।
यस्तन्न वेद॒ किमृ॒चा क॑रिष्यति॒ य इत् तद् वि॒दुस्त इ॒मे समा॑सते ॥३॥

8
Richo akshare parame vyoman yasmin deva adhi vishve nisheduh
Yastanna veda kimricha karishyati ya it tad vidusta ime samasate

164.40

९॥
सू॒य॒व॒साद् भग॑वती॒ हि भू॒या अथो॑ व॒यं भग॑वन्तः स्याम ।
अ॒द्धि तृण॑मघ्न्ये विश्व॒दानीं॒ पिब॑ शु॒द्धमु॑द॒कमा॒चर॑न्ती ॥४॥

9
Suyavasad bhagavati hi bhuya atho vayam bhagavantah syama
Addhi trinamaghnye vishvadanim piba shuddhamudakamacharanti

164.41

गौ॒रीर्मि॑माय सलि॒लानि॒ तक्ष॒त्येक॑पदी द्वि॒पदी॒ सा चतु॑ष्पदी ।
अ॒ष्टाप॑दी॒ नव॑पदी बभू॒वुषी॑ स॒हस्रा॑क्षरा पर॒मे व्यो॑मन् ॥४॥

Gaurirmimaya salilani takshatyekapadi dvipadi sa chatushpadi
Ashtapadi navapadi babhuvushi sahasrakshara parame vyoman

164.42

तस्या॑ः समु॒द्रा अधि॒ वि क्ष॑रन्ति॒ तेन॑ जीवन्ति प्र॒दिश॒श्चत॑स्रः ।
तत॑ः क्षरत्य॒क्षरं॒ तद् विश्व॒मुप॑ जीवति ॥४॥

Tasyah samudra adhi vi ksharanti tena jivanti pradishashchatasrah
Tatah ksharatyaksharam tad vishvamupa jivati

164.43

श॒क॒मयं॑ धू॒ममा॒राद॑पश्यं विषू॒वता॑ प॒र ए॒नाव॑रेण ।
उ॒क्षाणं॒ पृश्नि॑मपचन्त वी॒रास्तानि॒ धर्मा॑णि प्रथ॒मान्या॑सन् ॥४॥

Shakamayam dhumamaradapashyam vishuvata para enavarena
Ukshanam prishnimapachanta virastani dharmani prathamanyasan

164.44

त्रय॑ः के॒शिन॑ ऋतु॒था वि च॑क्षते संवत्स॒रे व॑पत॒ एक॑ एषाम् ।
विश्व॒मेको॑ अ॒भि च॑ष्टे॒ शची॑भि॒र्ध्राजि॒रेक॑स्य ददृशे॒ न रू॒पम् ॥४॥

Trayah keshina ritutha vi chakshate sanvatsare vapata eka esham
Vishvameko abhi chashte shachibhirdhrajirekasya dadrishe na rupam

164.45

च॒त्वारि॒ वाक् परि॑मिता प॒दानि॒ तानि॑ विदुर्ब्राह्म॒णा ये म॑नी॒षिण॑ः ।
गुहा॒ त्रीणि॒ निहि॑ता॒ नेङ्ग॑यन्ति तु॒रीयं॑ वा॒चो म॑नु॒ष्या॑ वदन्ति ॥४॥

Chatvari vak parimita padani tani vidurbrahmana ye manishinah
Guha trini nihita nengayanti turiyam vacho manushya vadanti

164.46

५॥
इन्द्रं॑ मि॒त्रं वरु॑णम॒ग्निमा॑हु॒रथो॑ दि॒व्यः स सु॑प॒र्णो ग॒रुत्मा॑न् ।
एकं॒ सद् विप्रा॑ बहु॒धा व॑दन्त्य॒ग्निं य॒मं मा॑त॒रिश्वा॑नमाहुः ॥४॥

5
Indram mitram varunamagnimahuratho divyah sa suparno garutman
Ekam sad vipra bahudha vadantyagnim yamam matarishvanamahuh

164.47

६॥
कृ॒ष्णं नि॒यानं॒ हर॑यः सुप॒र्णा अ॒पो वसा॑ना॒ दिव॒मुत्प॑तन्ति ।
त आव॑वृत्र॒न् त्सद॑नादृ॒तस्यादिद् घृ॒तेन॑ पृथि॒वी व्यु॑द्यते ॥४॥

6
Krishnam niyanam harayah suparna apo vasana divamutpatanti
Ta avavritran tsadanadritasyadid ghritena prithivi vyudyate

164.48

७॥
द्वाद॑श प्र॒धय॑श्च॒क्रमेकं॒ त्रीणि॒ नभ्या॑नि॒ क उ॒ तच्चि॑केत ।
तस्मि॑न्त्सा॒ त्सा॒कं त्रि॑श॒ता न श॒ङ्कवो॑ ऽर्पि॒ताः ष॒ष्टिर्न च॑लाच॒लास॑ः ॥४॥

7
Dvadasha pradhayashchakramekam trini nabhyani ka u tachchiketa
Tasmintsa tsakam trishata na shankavo rpitah shashtirna chalachalasah

164.49

८॥
यस्ते॒ स्तन॑ः शश॒यो यो म॑यो॒भूर्येन॒ विश्वा॒ पुष्य॑सि॒ वार्या॑णि ।
यो र॑त्न॒धा व॑सु॒विद् यः सु॒दत्र॒ः सर॑स्वति॒ तमि॒ह धात॑वे कः ॥४॥

8
Yaste stanah shashayo yo mayobhuryena vishva pushyasi varyani
Yo ratnadha vasuvid yah sudatrah sarasvati tamiha dhatave kah

164.50

९॥
य॒ज्ञेन॑ य॒ज्ञम॑यजन्त दे॒वास्तानि॒ धर्मा॑णि प्रथ॒मान्या॑सन् ।
ते ह॒ नाकं॑ महि॒मान॑ः सचन्त॒ यत्र॒ पूर्वे॑ सा॒ध्याः सन्ति॑ दे॒वाः ॥५॥

9
Yagyena yagyamayajanta devastani dharmani prathamanyasan
Te ha nakam mahimanah sachanta yatra purve sadhyah santi devah

164.51

स॒मा॒नमे॒तदु॑द॒कमुच्चैत्यव॒ चाह॑भिः ।
भूमिं॑ प॒र्जन्या॒ जिन्व॑न्ति॒ दिवं॑ जिन्वन्त्य॒ग्नय॑ः ॥५॥

Samanametadudakamuchchaityava chahabhih
Bhumim parjanya jinvanti divam jinvantyagnayah

164.52

दि॒व्यं सु॑प॒र्णं वा॑य॒सं बृ॒हन्त॑म॒पां गर्भं॑ दर्श॒तमोष॑धीनाम् ।
अ॒भी॒प॒तो वृ॒ष्टिभि॑स्त॒र्पय॑न्तं॒ सर॑स्वन्त॒मव॑से जोहवीमि ॥५॥

Divyam suparnam vayasam brihantamapam garbham darshatamoshadhinam
Abhipato vrishtibhistarpayantam sarasvantamavase johavimi