Sukta 108

108.1

13 kutsa angirasah, indragni, trishtup

य इ॑न्द्राग्नी चि॒त्रत॑मो॒ रथो॑ वाम॒भि विश्वा॑नि॒ भुव॑नानि॒ चष्टे॑ ।
तेना या॑तं स॒रथं॑ तस्थि॒वांसाथा॒ सोम॑स्य पिबतं सु॒तस्य॑ ॥१॥

Ya indragni chitratamo ratho vamabhi vishvani bhuvanani chashte
Tena yatam saratham tasthivansatha somasya pibatam sutasya

याव॑दि॒दं भुव॑नं॒ विश्व॒मस्त्यु॑रु॒व्यचा॑ वरि॒मता॑ गभी॒रम् ।
तावाँ॑ अ॒यं पात॑वे॒ सोमो॑ अ॒स्त्वर॑मिन्द्राग्नी॒ मन॑से यु॒वभ्या॑म् ॥२॥

Yavadidam bhuvanam vishvamastyuruvyacha varimata gabhiram
Tavam ayam patave somo astvaramindragni manase yuvabhyam

च॒क्राथे॒ हि स॒ध्र्य १ ङ्नाम॑ भ॒द्रं स॑ध्रीची॒ना वृ॑त्रहणा उ॒त स्थ॑ः ।
तावि॑न्द्राग्नी स॒ध्र्य॑ञ्चा नि॒षद्या॒ वृष्ण॒ः सोम॑स्य वृष॒णा वृ॑षेथाम् ॥३॥

Chakrathe hi sadhrya 1 nnama bhadram sadhrichina vritrahana uta sthah
Tavindragni sadhryancha nishadya vrishnah somasya vrishana vrishetham

समि॑द्धेष्व॒ग्निष्वा॑नजा॒ना य॒तस्रु॑चा ब॒र्हिरु॑ तिस्तिरा॒णा ।
ती॒व्रैः सोमै॒ः परि॑षिक्तेभिर॒र्वागेन्द्रा॑ग्नी सौमन॒साय॑ यातम् ॥४॥

Samiddheshvagnishvanajana yatasrucha barhiru tistirana
Tivraih somaih parishiktebhirarvagendragni saumanasaya yatam

यानी॑न्द्राग्नी च॒क्रथु॑र्वी॒र्या॑णि॒ यानि॑ रू॒पाण्यु॒त वृष्ण्या॑नि ।
या वां॑ प्र॒त्नानि॑ स॒ख्या शि॒वानि॒ तेभि॒ः सोम॑स्य पिबतं सु॒तस्य॑ ॥५॥

Yanindragni chakrathurviryani yani rupanyuta vrishnyani
Ya vam pratnani sakhya shivani tebhih somasya pibatam sutasya

यदब्र॑वं प्रथ॒मं वां॑ वृणा॒नो॒ ३ ऽयं सोमो॒ असु॑रैर्नो वि॒हव्य॑ः ।
तां स॒त्यां श्र॒द्धाम॒भ्या हि या॒तमथा॒ सोम॑स्य पिबतं सु॒तस्य॑ ॥६॥

Yadabravam prathamam vam vrinano 3 yam somo asurairno vihavyah
Tam satyam shraddhamabhya hi yatamatha somasya pibatam sutasya

यदि॑न्द्राग्नी॒ मद॑थ॒ः स्वे दु॑रो॒णे यद् ब्र॒ह्मणि॒ राज॑नि वा यजत्रा ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥७॥

Yadindragni madathah sve durone yad brahmani rajani va yajatra
Atah pari vrishanava hi yatamatha somasya pibatam sutasya

यदि॑न्द्राग्नी॒ यदु॑षु तु॒र्वशे॑षु॒ यद् द्रु॒ह्युष्वनु॑षु पू॒रुषु॒ स्थः ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥८॥

Yadindragni yadushu turvasheshu yad druhyushvanushu purushu sthah
Atah pari vrishanava hi yatamatha somasya pibatam sutasya

यदि॑न्द्राग्नी अव॒मस्यां॑ पृथि॒व्यां म॑ध्य॒मस्यां॑ पर॒मस्या॑मु॒त स्थः ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥९॥

Yadindragni avamasyam prithivyam madhyamasyam paramasyamuta sthah
Atah pari vrishanava hi yatamatha somasya pibatam sutasya

यदि॑न्द्राग्नी पर॒मस्यां॑ पृथि॒व्यां म॑ध्य॒मस्या॑मव॒मस्या॑मु॒त स्थः ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥१०॥

Yadindragni paramasyam prithivyam madhyamasyamavamasyamuta sthah
Atah pari vrishanava hi yatamatha somasya pibatam sutasya

यदि॑न्द्राग्नी दि॒वि ष्ठो यत् पृ॑थि॒व्यां यत् पर्व॑ते॒ष्वोष॑धीष्व॒प्सु ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥११॥

Yadindragni divi shtho yat prithivyam yat parvateshvoshadhishvapsu
Atah pari vrishanava hi yatamatha somasya pibatam sutasya

यदि॑न्द्राग्नी॒ उदि॑ता॒ सूर्य॑स्य॒ मध्ये॑ दि॒वः स्व॒धया॑ मा॒दये॑थे ।
अत॒ः परि॑ वृषणा॒वा हि या॒तमथा॒ सोम॑स्य पिबतं सु॒तस्य॑ ॥१२॥

Yadindragni udita suryasya madhye divah svadhaya madayethe
Atah pari vrishanava hi yatamatha somasya pibatam sutasya

ए॒वेन्द्रा॑ग्नी पपि॒वांसा॑ सु॒तस्य॒ विश्वा॒स्मभ्यं॒ सं ज॑यतं॒ धना॑नि ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥१३॥

Evendragni papivansa sutasya vishvasmabhyam sam jayatam dhanani
Tanno mitro varuno mamahantamaditih sindhuh prithivi uta dyauh