Ramcharitmanas 121.1

कहेउँ ग्यान सिद्धांत बुझाई। सुनहु भगति मनि कै प्रभुताई।।
राम भगति चिंतामनि सुंदर। बसइ गरुड़ जाके उर अंतर।।
परम प्रकास रूप दिन राती। नहिं कछु चहिअ दिआ घृत बाती।।
मोह दरिद्र निकट नहिं आवा। लोभ बात नहिं ताहि बुझावा।।
प्रबल अबिद्या तम मिटि जाई। हारहिं सकल सलभ समुदाई।।
खल कामादि निकट नहिं जाहीं। बसइ भगति जाके उर माहीं।।
गरल सुधासम अरि हित होई। तेहि मनि बिनु सुख पाव न कोई।।
ब्यापहिं मानस रोग न भारी। जिन्ह के बस सब जीव दुखारी।।
राम भगति मनि उर बस जाकें। दुख लवलेस न सपनेहुँ ताकें।।
चतुर सिरोमनि तेइ जग माहीं। जे मनि लागि सुजतन कराहीं।।
सो मनि जदपि प्रगट जग अहई। राम कृपा बिनु नहिं कोउ लहई।।
सुगम उपाय पाइबे केरे। नर हतभाग्य देहिं भटमेरे।।
पावन पर्बत बेद पुराना। राम कथा रुचिराकर नाना।।
मर्मी सज्जन सुमति कुदारी। ग्यान बिराग नयन उरगारी।।
भाव सहित खोजइ जो प्रानी। पाव भगति मनि सब सुख खानी।।
मोरें मन प्रभु अस बिस्वासा। राम ते अधिक राम कर दासा।।
राम सिंधु घन सज्जन धीरा। चंदन तरु हरि संत समीरा।।
सब कर फल हरि भगति सुहाई। सो बिनु संत न काहूँ पाई।।
अस बिचारि जोइ कर सतसंगा। राम भगति तेहि सुलभ बिहंगा।।

Kaheum gyan siddhant bujhai, sunahu bhagati mani kai prabhutai
Ram bhagati chintamani sundar, basai garur jake ur antar
Param prakas rup din rati, nahin kachhu chahia dia ghrit bati
Moh daridra nikat nahin ava, lobh bat nahin tahi bujhava
Prabal abidya tam miti jai, harahin sakal salabh samudai
Khal kamadi nikat nahin jahin, basai bhagati jake ur mahin
Garal sudhasam ari hit hoi, tehi mani binu sukh pav na koi
Byapahin manas rog na bhari, jinha ke bas sab jiv dukhari
Ram bhagati mani ur bas jaken, dukh lavales na sapanehun taken
Chatur siromani tei jag mahin, je mani lagi sujatan karahin
So mani jadapi pragat jag ahai, ram kripa binu nahin kou lahai
Sugam upaya paibe kere, nar hatabhagya dehin bhatamere
Pavan parbat bed purana, ram katha ruchirakar nana
Marmi sajjan sumati kudari, gyan birag nayan uragari
Bhav sahit khojai jo prani, pav bhagati mani sab sukh khani
Moren man prabhu as bisvasa, ram te adhik ram kar dasa
Ram sindhu ghan sajjan dhira, chandan taru hari sant samira
Sab kar phal hari bhagati suhai, so binu sant na kahun pai
As bichari joi kar satasanga, ram bhagati tehi sulabh bihanga

Whole chapter