UtshovDoha 110
110.1
Chaupai
एहि कर होइ परम कल्याना। सोइ करहु अब कृपानिधाना।।
बिप्रगिरा सुनि परहित सानी। एवमस्तु इति भइ नभबानी।।
जदपि कीन्ह एहिं दारुन पापा। मैं पुनि दीन्ह कोप करि सापा।।
तदपि तुम्हार साधुता देखी। करिहउँ एहि पर कृपा बिसेषी।।
छमासील जे पर उपकारी। ते द्विज मोहि प्रिय जथा खरारी।।
मोर श्राप द्विज ब्यर्थ न जाइहि। जन्म सहस अवस्य यह पाइहि।।
जनमत मरत दुसह दुख होई। अहि स्वल्पउ नहिं ब्यापिहि सोई।।
कवनेउँ जन्म मिटिहि नहिं ग्याना। सुनहि सूद्र मम बचन प्रवाना।।
रघुपति पुरीं जन्म तब भयऊ। पुनि तैं मम सेवाँ मन दयऊ।।
पुरी प्रभाव अनुग्रह मोरें। राम भगति उपजिहि उर तोरें।।
सुनु मम बचन सत्य अब भाई। हरितोषन ब्रत द्विज सेवकाई।।
अब जनि करहि बिप्र अपमाना। जानेहु संत अनंत समाना।।
इंद्र कुलिस मम सूल बिसाला। कालदंड हरि चक्र कराला।।
जो इन्ह कर मारा नहिं मरई। बिप्रद्रोह पावक सो जरई।।
अस बिबेक राखेहु मन माहीं। तुम्ह कहँ जग दुर्लभ कछु नाहीं।।
औरउ एक आसिषा मोरी। अप्रतिहत गति होइहि तोरी।।
Ehi kar hoi param kalyana, soi karahu ab kripanidhana
Bipragira suni parahit sani, evamastu iti bhai nabhabani
Jadapi kinha ehin darun papa, main puni dinha kop kari sapa
Tadapi tumhar sadhuta dekhi, karihaum ehi par kripa biseshi
Chhamasil je par upakari, te dvij mohi priy jatha kharari
Mor shrap dvij byartha na jaihi, janma sahas avasya yah paihi
Janamat marat dusah dukh hoi, ahi svalpau nahin byapihi soi
Kavaneum janma mitihi nahin gyana, sunahi sudra mam bachan pravana
Raghupati purin janma tab bhayau, puni tain mam sevan man dayau
Puri prabhav anugrah moren, ram bhagati upajihi ur toren
Sunu mam bachan satya ab bhai, haritoshan brat dvij sevakai
Ab jani karahi bipra apamana, janehu sant anant samana
Indra kulis mam sul bisala, kaladand hari chakra karala
Jo inha kar mara nahin marai, bipradroh pavak so jarai
As bibek rakhehu man mahin, tumha kaham jag durlabh kachhu nahin
Aurau ek asisha mori, apratihat gati hoihi tori
110.2
Doha/soratha
सुनि सिव बचन हरषि गुर एवमस्तु इति भाषि।
मोहि प्रबोधि गयउ गृह संभु चरन उर राखि ॥109(क)॥
Suni siv bachan harashi gur evamastu iti bhashi
Mohi prabodhi gayau grih sambhu charan ur rakhi, 109(ka)
110.3
Doha/soratha
प्रेरित काल बिधि गिरि जाइ भयउँ मैं ब्याल।
पुनि प्रयास बिनु सो तनु जजेउँ गएँ कछु काल ॥109(ख)॥
Prerit kal bidhi giri jai bhayaum main byal
Puni prayas binu so tanu jajeum gaem kachhu kal, 109(kh)
110.4
Doha/soratha
जोइ तनु धरउँ तजउँ पुनि अनायास हरिजान।
जिमि नूतन पट पहिरइ नर परिहरइ पुरान ॥109(ग)॥
Joi tanu dharaum tajaum puni anayas harijan
Jimi nutan pat pahirai nar pariharai puran, 109(ga)
110.5
Doha/soratha
सिवँ राखी श्रुति नीति अरु मैं नहिं पावा क्लेस।
एहि बिधि धरेउँ बिबिध तनु ग्यान न गयउ खगेस ॥109(घ)॥
Sivam rakhi shruti niti aru main nahin pava kles
Ehi bidhi dhareum bibidh tanu gyan na gayau khages, 109(gh)