UtshovRamcharitmanas 62.1
उहाँ राम लछिमनहिं निहारी। बोले बचन मनुज अनुसारी।।
अर्ध राति गइ कपि नहिं आयउ। राम उठाइ अनुज उर लायउ।।
सकहु न दुखित देखि मोहि काऊ। बंधु सदा तव मृदुल सुभाऊ।।
मम हित लागि तजेहु पितु माता। सहेहु बिपिन हिम आतप बाता।।
सो अनुराग कहाँ अब भाई। उठहु न सुनि मम बच बिकलाई।।
जौं जनतेउँ बन बंधु बिछोहू। पिता बचन मनतेउँ नहिं ओहू।।
सुत बित नारि भवन परिवारा। होहिं जाहिं जग बारहिं बारा।।
अस बिचारि जियँ जागहु ताता। मिलइ न जगत सहोदर भ्राता।।
जथा पंख बिनु खग अति दीना। मनि बिनु फनि करिबर कर हीना।।
अस मम जिवन बंधु बिनु तोही। जौं जड़ दैव जिआवै मोही।।
जैहउँ अवध कवन मुहु लाई। नारि हेतु प्रिय भाइ गँवाई।।
बरु अपजस सहतेउँ जग माहीं। नारि हानि बिसेष छति नाहीं।।
अब अपलोकु सोकु सुत तोरा। सहिहि निठुर कठोर उर मोरा।।
निज जननी के एक कुमारा। तात तासु तुम्ह प्रान अधारा।।
सौंपेसि मोहि तुम्हहि गहि पानी। सब बिधि सुखद परम हित जानी।।
उतरु काह दैहउँ तेहि जाई। उठि किन मोहि सिखावहु भाई।।
बहु बिधि सिचत सोच बिमोचन। स्त्रवत सलिल राजिव दल लोचन।।
उमा एक अखंड रघुराई। नर गति भगत कृपाल देखाई।।
Uhan ram lachhimanahin nihari, bole bachan manuj anusari
Ardha rati gai kapi nahin ayau, ram uthai anuj ur layau
Sakahu na dukhit dekhi mohi kau, bandhu sada tav mridul subhau
Mam hit lagi tajehu pitu mata, sahehu bipin him atap bata
So anurag kahan ab bhai, uthahu na suni mam bach bikalai
Jaun janateum ban bandhu bichhohu, pita bachan manateum nahin ohu
Sut bit nari bhavan parivara, hohin jahin jag barahin bara
As bichari jiyam jagahu tata, milai na jagat sahodar bhrata
Jatha pankh binu khag ati dina, mani binu phani karibar kar hina
As mam jivan bandhu binu tohi, jaun jar daiv jiavai mohi
Jaihaum avadh kavan muhu lai, nari hetu priy bhai ganvai
Baru apajas sahateum jag mahin, nari hani bisesh chhati nahin
Ab apaloku soku sut tora, sahihi nithur kathor ur mora
Nij janani ke ek kumara, tat tasu tumha pran adhara
Saumpesi mohi tumhahi gahi pani, sab bidhi sukhad param hit jani
Utaru kah daihaum tehi jai, uthi kin mohi sikhavahu bhai
Bahu bidhi sichat soch bimochan, stravat salil rajiv dal lochan
Uma ek akhand raghurai, nar gati bhagat kripal dekhai