UtshovDoha 110
110.1
Chaupai
प्रभु के बचन सीस धरि सीता। बोली मन क्रम बचन पुनीता।।
लछिमन होहु धरम के नेगी। पावक प्रगट करहु तुम्ह बेगी।।
सुनि लछिमन सीता कै बानी। बिरह बिबेक धरम निति सानी।।
लोचन सजल जोरि कर दोऊ। प्रभु सन कछु कहि सकत न ओऊ।।
देखि राम रुख लछिमन धाए। पावक प्रगटि काठ बहु लाए।।
पावक प्रबल देखि बैदेही। हृदयँ हरष नहिं भय कछु तेही।।
जौं मन बच क्रम मम उर माहीं। तजि रघुबीर आन गति नाहीं।।
तौ कृसानु सब कै गति जाना। मो कहुँ होउ श्रीखंड समाना।।
Prabhu ke bachan sis dhari sita, boli man kram bachan punita
Lachhiman hohu dharam ke negi, pavak pragat karahu tumha begi
Suni lachhiman sita kai bani, birah bibek dharam niti sani
Lochan sajal jori kar dou, prabhu san kachhu kahi sakat na ou
Dekhi ram rukh lachhiman dhae, pavak pragati kath bahu lae
Pavak prabal dekhi baidehi, hridayam harash nahin bhay kachhu tehi
Jaun man bach kram mam ur mahin, taji raghubir an gati nahin
Tau krisanu sab kai gati jana, mo kahun hou shrikhand samana
110.2
Chhand
श्रीखंड सम पावक प्रबेस कियो सुमिरि प्रभु मैथिली।
जय कोसलेस महेस बंदित चरन रति अति निर्मली।।
प्रतिबिंब अरु लौकिक कलंक प्रचंड पावक महुँ जरे।
प्रभु चरित काहुँ न लखे नभ सुर सिद्ध मुनि देखहिं खरे ॥1॥
Shrikhand sam pavak prabes kiyo sumiri prabhu maithili
Jay kosales mahes bandit charan rati ati nirmali
Pratibimb aru laukik kalank prachand pavak mahun jare
Prabhu charit kahun na lakhe nabh sur siddha muni dekhahin khare
110.3
Chhand
धरि रूप पावक पानि गहि श्री सत्य श्रुति जग बिदित जो।
जिमि छीरसागर इंदिरा रामहि समर्पी आनि सो।।
सो राम बाम बिभाग राजति रुचिर अति सोभा भली।
नव नील नीरज निकट मानहुँ कनक पंकज की कली ॥2॥
Dhari rup pavak pani gahi shri satya shruti jag bidit jo
Jimi chhirasagar indira ramahi samarpi ani so
So ram bam bibhag rajati ruchir ati sobha bhali
Nav nil niraj nikat manahun kanak pankaj ki kali
110.4
Doha/soratha
बरषहिं सुमन हरषि सुन बाजहिं गगन निसान।
गावहिं किंनर सुरबधू नाचहिं चढ़ीं बिमान ॥109(क)॥
Barashahin suman harashi sun bajahin gagan nisan
Gavahin kinnar surabadhu nachahin charhin biman, 109(ka)
110.5
Doha/soratha
जनकसुता समेत प्रभु सोभा अमित अपार।
देखि भालु कपि हरषे जय रघुपति सुख सार ॥109(ख)॥
Janakasuta samet prabhu sobha amit apar
Dekhi bhalu kapi harashe jay raghupati sukh sar, 109(kh)