UtshovDoha 56
56.1
Chaupai
राम तेज बल बुधि बिपुलाई। सेष सहस सत सकहिं न गाई।।
सक सर एक सोषि सत सागर। तब भ्रातहि पूँछेउ नय नागर।।
तासु बचन सुनि सागर पाहीं। मागत पंथ कृपा मन माहीं।।
सुनत बचन बिहसा दससीसा। जौं असि मति सहाय कृत कीसा।।
सहज भीरु कर बचन दृढ़ाई। सागर सन ठानी मचलाई।।
मूढ़ मृषा का करसि बड़ाई। रिपु बल बुद्धि थाह मैं पाई।।
सचिव सभीत बिभीषन जाकें। बिजय बिभूति कहाँ जग ताकें।।
सुनि खल बचन दूत रिस बाढ़ी। समय बिचारि पत्रिका काढ़ी।।
रामानुज दीन्ही यह पाती। नाथ बचाइ जुड़ावहु छाती।।
बिहसि बाम कर लीन्ही रावन। सचिव बोलि सठ लाग बचावन।।
Ram tej bal budhi bipulai, sesh sahas sat sakahin na gai
Sak sar ek soshi sat sagar, tab bhratahi punchheu nay nagar
Tasu bachan suni sagar pahin, magat panth kripa man mahin
Sunat bachan bihasa dasasisa, jaun asi mati sahaya krit kisa
Sahaj bhiru kar bachan drirhai, sagar san thani machalai
Murh mrisha ka karasi barai, ripu bal buddhi thah main pai
Sachiv sabhit bibhishan jaken, bijay bibhuti kahan jag taken
Suni khal bachan dut ris barhi, samay bichari patrika karhi
Ramanuj dinhi yah pati, nath bachai juravahu chhati
Bihasi bam kar linhi ravan, sachiv boli sath lag bachavan
56.2
Doha/soratha
बातन्ह मनहि रिझाइ सठ जनि घालसि कुल खीस।
राम बिरोध न उबरसि सरन बिष्नु अज ईस ॥56(क)॥
Batanha manahi rijhai sath jani ghalasi kul khis
Ram birodh na ubarasi saran bishnu aj is, 56(ka)
56.3
Doha/soratha
की तजि मान अनुज इव प्रभु पद पंकज भृंग।
होहि कि राम सरानल खल कुल सहित पतंग ॥56(ख)॥
Ki taji man anuj iv prabhu pad pankaj bhring
Hohi ki ram saranal khal kul sahit patang, 56(kh)