Ramcharitmanas 8.1

जे न मित्र दुख होहिं दुखारी। तिन्हहि बिलोकत पातक भारी।।
निज दुख गिरि सम रज करि जाना। मित्रक दुख रज मेरु समाना।।
जिन्ह कें असि मति सहज न आई। ते सठ कत हठि करत मिताई।।
कुपथ निवारि सुपंथ चलावा। गुन प्रगटे अवगुनन्हि दुरावा।।
देत लेत मन संक न धरई। बल अनुमान सदा हित करई।।
बिपति काल कर सतगुन नेहा। श्रुति कह संत मित्र गुन एहा।।
आगें कह मृदु बचन बनाई। पाछें अनहित मन कुटिलाई।।
जा कर चित अहि गति सम भाई। अस कुमित्र परिहरेहि भलाई।।
सेवक सठ नृप कृपन कुनारी। कपटी मित्र सूल सम चारी।।
सखा सोच त्यागहु बल मोरें। सब बिधि घटब काज मैं तोरें।।
कह सुग्रीव सुनहु रघुबीरा। बालि महाबल अति रनधीरा।।
दुंदुभी अस्थि ताल देखराए। बिनु प्रयास रघुनाथ ढहाए।।
देखि अमित बल बाढ़ी प्रीती। बालि बधब इन्ह भइ परतीती।।
बार बार नावइ पद सीसा। प्रभुहि जानि मन हरष कपीसा।।
उपजा ग्यान बचन तब बोला। नाथ कृपाँ मन भयउ अलोला।।
सुख संपति परिवार बड़ाई। सब परिहरि करिहउँ सेवकाई।।
ए सब रामभगति के बाधक। कहहिं संत तब पद अवराधक।।
सत्रु मित्र सुख दुख जग माहीं। माया कृत परमारथ नाहीं।।
बालि परम हित जासु प्रसादा। मिलेहु राम तुम्ह समन बिषादा।।
सपनें जेहि सन होइ लराई। जागें समुझत मन सकुचाई।।
अब प्रभु कृपा करहु एहि भाँती। सब तजि भजनु करौं दिन राती।।
सुनि बिराग संजुत कपि बानी। बोले बिहँसि रामु धनुपानी।।
जो कछु कहेहु सत्य सब सोई। सखा बचन मम मृषा न होई।।
नट मरकट इव सबहि नचावत। रामु खगेस बेद अस गावत।।
लै सुग्रीव संग रघुनाथा। चले चाप सायक गहि हाथा।।
तब रघुपति सुग्रीव पठावा। गर्जेसि जाइ निकट बल पावा।।
सुनत बालि क्रोधातुर धावा। गहि कर चरन नारि समुझावा।।
सुनु पति जिन्हहि मिलेउ सुग्रीवा। ते द्वौ बंधु तेज बल सींवा।।
कोसलेस सुत लछिमन रामा। कालहु जीति सकहिं संग्रामा।।

Je na mitra dukh hohin dukhari, tinhahi bilokat patak bhari
Nij dukh giri sam raj kari jana, mitrak dukh raj meru samana
Jinha ken asi mati sahaj na ai, te sath kat hathi karat mitai
Kupath nivari supanth chalava, gun pragate avagunanhi durava
Det let man sank na dharai, bal anuman sada hit karai
Bipati kal kar satagun neha, shruti kah sant mitra gun eha
Agen kah mridu bachan banai, pachhen anahit man kutilai
Ja kar chit ahi gati sam bhai, as kumitra pariharehi bhalai
Sevak sath nrip kripan kunari, kapati mitra sul sam chari
Sakha soch tyagahu bal moren, sab bidhi ghatab kaj main toren
Kah sugriv sunahu raghubira, bali mahabal ati ranadhira
Dundubhi asthi tal dekharae, binu prayas raghunath dhahae
Dekhi amit bal barhi priti, bali badhab inha bhai paratiti
Bar bar navai pad sisa, prabhuhi jani man harash kapisa
Upaja gyan bachan tab bola, nath kripan man bhayau alola
Sukh sampati parivar barai, sab parihari karihaum sevakai
E sab ramabhagati ke badhak, kahahin sant tab pad avaradhak
Satru mitra sukh dukh jag mahin, maya krit paramarath nahin
Bali param hit jasu prasada, milehu ram tumha saman bishada
Sapanen jehi san hoi larai, jagen samujhat man sakuchai
Ab prabhu kripa karahu ehi bhanti, sab taji bhajanu karaun din rati
Suni birag sanjut kapi bani, bole bihansi ramu dhanupani
Jo kachhu kahehu satya sab soi, sakha bachan mam mrisha na hoi
Nat marakat iv sabahi nachavat, ramu khages bed as gavat
Lai sugriv sang raghunatha, chale chap sayak gahi hatha
Tab raghupati sugriv pathava, garjesi jai nikat bal pava
Sunat bali krodhatur dhava, gahi kar charan nari samujhava
Sunu pati jinhahi mileu sugriva, te dvau bandhu tej bal sinva
Kosales sut lachhiman rama, kalahu jiti sakahin sangrama

Whole chapter