Ramcharitmanas 7.1

नात बालि अरु मैं द्वौ भाई। प्रीति रही कछु बरनि न जाई।।
मय सुत मायावी तेहि नाऊँ। आवा सो प्रभु हमरें गाऊँ।।
अर्ध राति पुर द्वार पुकारा। बाली रिपु बल सहै न पारा।।
धावा बालि देखि सो भागा। मैं पुनि गयउँ बंधु सँग लागा।।
गिरिबर गुहाँ पैठ सो जाई। तब बालीं मोहि कहा बुझाई।।
परिखेसु मोहि एक पखवारा। नहिं आवौं तब जानेसु मारा।।
मास दिवस तहँ रहेउँ खरारी। निसरी रुधिर धार तहँ भारी।।
बालि हतेसि मोहि मारिहि आई। सिला देइ तहँ चलेउँ पराई।।
मंत्रिन्ह पुर देखा बिनु साईं। दीन्हेउ मोहि राज बरिआई।।
बालि ताहि मारि गृह आवा। देखि मोहि जियँ भेद बढ़ावा।।
रिपु सम मोहि मारेसि अति भारी। हरि लीन्हेसि सर्बसु अरु नारी।।
ताकें भय रघुबीर कृपाला। सकल भुवन मैं फिरेउँ बिहाला।।
इहाँ साप बस आवत नाहीं। तदपि सभीत रहउँ मन माहीं।।
सुनि सेवक दुख दीनदयाला। फरकि उठीं द्वै भुजा बिसाला।।

Nat bali aru main dvau bhai, priti rahi kachhu barani na jai
May sut mayavi tehi naum, ava so prabhu hamaren gaum
Ardha rati pur dvar pukara, bali ripu bal sahai na para
Dhava bali dekhi so bhaga, main puni gayaum bandhu sang laga
Giribar guhan paith so jai, tab balin mohi kaha bujhai
Parikhesu mohi ek pakhavara, nahin avaun tab janesu mara
Mas divas taham raheum kharari, nisari rudhir dhar taham bhari
Bali hatesi mohi marihi ai, sila dei taham chaleum parai
Mantrinha pur dekha binu saim, dinheu mohi raj bariai
Bali tahi mari grih ava, dekhi mohi jiyam bhed barhava
Ripu sam mohi maresi ati bhari, hari linhesi sarbasu aru nari
Taken bhay raghubir kripala, sakal bhuvan main phireum bihala
Ihan sap bas avat nahin, tadapi sabhit rahaum man mahin
Suni sevak dukh dinadayala, pharaki uthin dvai bhuja bisala

Whole chapter