Ramcharitmanas 30.1

हा जग एक बीर रघुराया। केहिं अपराध बिसारेहु दाया।।
आरति हरन सरन सुखदायक। हा रघुकुल सरोज दिननायक।।
हा लछिमन तुम्हार नहिं दोसा। सो फलु पायउँ कीन्हेउँ रोसा।।
बिबिध बिलाप करति बैदेही। भूरि कृपा प्रभु दूरि सनेही।।
बिपति मोरि को प्रभुहि सुनावा। पुरोडास चह रासभ खावा।।
सीता कै बिलाप सुनि भारी। भए चराचर जीव दुखारी।।
गीधराज सुनि आरत बानी। रघुकुलतिलक नारि पहिचानी।।
अधम निसाचर लीन्हे जाई। जिमि मलेछ बस कपिला गाई।।
सीते पुत्रि करसि जनि त्रासा। करिहउँ जातुधान कर नासा।।
धावा क्रोधवंत खग कैसें। छूटइ पबि परबत कहुँ जैसे।।
रे रे दुष्ट ठाढ़ किन होही। निर्भय चलेसि न जानेहि मोही।।
आवत देखि कृतांत समाना। फिरि दसकंधर कर अनुमाना।।
की मैनाक कि खगपति होई। मम बल जान सहित पति सोई।।
जाना जरठ जटायू एहा। मम कर तीरथ छाँड़िहि देहा।।
सुनत गीध क्रोधातुर धावा। कह सुनु रावन मोर सिखावा।।
तजि जानकिहि कुसल गृह जाहू। नाहिं त अस होइहि बहुबाहू।।
राम रोष पावक अति घोरा। होइहि सकल सलभ कुल तोरा।।
उतरु न देत दसानन जोधा। तबहिं गीध धावा करि क्रोधा।।
धरि कच बिरथ कीन्ह महि गिरा। सीतहि राखि गीध पुनि फिरा।।
चौचन्ह मारि बिदारेसि देही। दंड एक भइ मुरुछा तेही।।
तब सक्रोध निसिचर खिसिआना। काढ़ेसि परम कराल कृपाना।।
काटेसि पंख परा खग धरनी। सुमिरि राम करि अदभुत करनी।।
सीतहि जानि चढ़ाइ बहोरी। चला उताइल त्रास न थोरी।।
करति बिलाप जाति नभ सीता। ब्याध बिबस जनु मृगी सभीता।।
गिरि पर बैठे कपिन्ह निहारी। कहि हरि नाम दीन्ह पट डारी।।
एहि बिधि सीतहि सो लै गयऊ। बन असोक महँ राखत भयऊ।।

Ha jag ek bir raghuraya, kehin aparadh bisarehu daya
Arati haran saran sukhadayak, ha raghukul saroj dinanayak
Ha lachhiman tumhar nahin dosa, so phalu payaum kinheum rosa
Bibidh bilap karati baidehi, bhuri kripa prabhu duri sanehi
Bipati mori ko prabhuhi sunava, purodas chah rasabh khava
Sita kai bilap suni bhari, bhae charachar jiv dukhari
Gidharaj suni arat bani, raghukulatilak nari pahichani
Adham nisachar linhe jai, jimi malechh bas kapila gai
Site putri karasi jani trasa, karihaum jatudhan kar nasa
Dhava krodhavant khag kaisen, chhutai pabi parabat kahun jaise
Re re dushta tharh kin hohi, nirbhay chalesi na janehi mohi
Avat dekhi kritant samana, phiri dasakandhar kar anumana
Ki mainak ki khagapati hoi, mam bal jan sahit pati soi
Jana jarath jatayu eha, mam kar tirath chhanrihi deha
Sunat gidh krodhatur dhava, kah sunu ravan mor sikhava
Taji janakihi kusal grih jahu, nahin ta as hoihi bahubahu
Ram rosh pavak ati ghora, hoihi sakal salabh kul tora
Utaru na det dasanan jodha, tabahin gidh dhava kari krodha
Dhari kach birath kinha mahi gira, sitahi rakhi gidh puni phira
Chauchanha mari bidaresi dehi, dand ek bhai muruchha tehi
Tab sakrodh nisichar khisiana, karhesi param karal kripana
Katesi pankh para khag dharani, sumiri ram kari adabhut karani
Sitahi jani charhai bahori, chala utail tras na thori
Karati bilap jati nabh sita, byadh bibas janu mrigi sabhita
Giri par baithe kapinha nihari, kahi hari nam dinha pat dari
Ehi bidhi sitahi so lai gayau, ban asok maham rakhat bhayau

Whole chapter