Ramcharitmanas 29.1

खल बधि तुरत फिरे रघुबीरा। सोह चाप कर कटि तूनीरा।।
आरत गिरा सुनी जब सीता। कह लछिमन सन परम सभीता।।
जाहु बेगि संकट अति भ्राता। लछिमन बिहसि कहा सुनु माता।।
भृकुटि बिलास सृष्टि लय होई। सपनेहुँ संकट परइ कि सोई।।
मरम बचन जब सीता बोला। हरि प्रेरित लछिमन मन डोला।।
बन दिसि देव सौंपि सब काहू। चले जहाँ रावन ससि राहू।।
सून बीच दसकंधर देखा। आवा निकट जती कें बेषा।।
जाकें डर सुर असुर डेराहीं। निसि न नीद दिन अन्न न खाहीं।।
सो दससीस स्वान की नाई। इत उत चितइ चला भड़िहाई।।
इमि कुपंथ पग देत खगेसा। रह न तेज बुधि बल लेसा।।
नाना बिधि करि कथा सुहाई। राजनीति भय प्रीति देखाई।।
कह सीता सुनु जती गोसाईं। बोलेहु बचन दुष्ट की नाईं।।
तब रावन निज रूप देखावा। भई सभय जब नाम सुनावा।।
कह सीता धरि धीरजु गाढ़ा। आइ गयउ प्रभु रहु खल ठाढ़ा।।
जिमि हरिबधुहि छुद्र सस चाहा। भएसि कालबस निसिचर नाहा।।
सुनत बचन दससीस रिसाना। मन महुँ चरन बंदि सुख माना।।

Khal badhi turat phire raghubira, soh chap kar kati tunira
Arat gira suni jab sita, kah lachhiman san param sabhita
Jahu begi sankat ati bhrata, lachhiman bihasi kaha sunu mata
Bhrikuti bilas srishti lay hoi, sapanehun sankat parai ki soi
Maram bachan jab sita bola, hari prerit lachhiman man dola
Ban disi dev saumpi sab kahu, chale jahan ravan sasi rahu
Sun bich dasakandhar dekha, ava nikat jati ken besha
Jaken dar sur asur derahin, nisi na nid din anna na khahin
So dasasis svan ki nai, it ut chitai chala bharihai
Imi kupanth pag det khagesa, rah na tej budhi bal lesa
Nana bidhi kari katha suhai, rajaniti bhay priti dekhai
Kah sita sunu jati gosaim, bolehu bachan dushta ki naim
Tab ravan nij rup dekhava, bhai sabhay jab nam sunava
Kah sita dhari dhiraju garha, ai gayau prabhu rahu khal tharha
Jimi haribadhuhi chhudra sas chaha, bhaesi kalabas nisichar naha
Sunat bachan dasasis risana, man mahun charan bandi sukh mana

Whole chapter