Ramcharitmanas 28.1

तेहि बन निकट दसानन गयऊ। तब मारीच कपटमृग भयऊ।।
अति बिचित्र कछु बरनि न जाई। कनक देह मनि रचित बनाई।।
सीता परम रुचिर मृग देखा। अंग अंग सुमनोहर बेषा।।
सुनहु देव रघुबीर कृपाला। एहि मृग कर अति सुंदर छाला।।
सत्यसंध प्रभु बधि करि एही। आनहु चर्म कहति बैदेही।।
तब रघुपति जानत सब कारन। उठे हरषि सुर काजु सँवारन।।
मृग बिलोकि कटि परिकर बाँधा। करतल चाप रुचिर सर साँधा।।
प्रभु लछिमनिहि कहा समुझाई। फिरत बिपिन निसिचर बहु भाई।।
सीता केरि करेहु रखवारी। बुधि बिबेक बल समय बिचारी।।
प्रभुहि बिलोकि चला मृग भाजी। धाए रामु सरासन साजी।।
निगम नेति सिव ध्यान न पावा। मायामृग पाछें सो धावा।।
कबहुँ निकट पुनि दूरि पराई। कबहुँक प्रगटइ कबहुँ छपाई।।
प्रगटत दुरत करत छल भूरी। एहि बिधि प्रभुहि गयउ लै दूरी।।
तब तकि राम कठिन सर मारा। धरनि परेउ करि घोर पुकारा।।
लछिमन कर प्रथमहिं लै नामा। पाछें सुमिरेसि मन महुँ रामा।।
प्रान तजत प्रगटेसि निज देहा। सुमिरेसि रामु समेत सनेहा।।
अंतर प्रेम तासु पहिचाना। मुनि दुर्लभ गति दीन्हि सुजाना।।

Tehi ban nikat dasanan gayau, tab marich kapatamrig bhayau
Ati bichitra kachhu barani na jai, kanak deh mani rachit banai
Sita param ruchir mrig dekha, ang ang sumanohar besha
Sunahu dev raghubir kripala, ehi mrig kar ati sundar chhala
Satyasandh prabhu badhi kari ehi, anahu charma kahati baidehi
Tab raghupati janat sab karan, uthe harashi sur kaju sanvaran
Mrig biloki kati parikar bandha, karatal chap ruchir sar sandha
Prabhu lachhimanihi kaha samujhai, phirat bipin nisichar bahu bhai
Sita keri karehu rakhavari, budhi bibek bal samay bichari
Prabhuhi biloki chala mrig bhaji, dhae ramu sarasan saji
Nigam neti siv dhyan na pava, mayamrig pachhen so dhava
Kabahun nikat puni duri parai, kabahunk pragatai kabahun chhapai
Pragatat durat karat chhal bhuri, ehi bidhi prabhuhi gayau lai duri
Tab taki ram kathin sar mara, dharani pareu kari ghor pukara
Lachhiman kar prathamahin lai nama, pachhen sumiresi man mahun rama
Pran tajat pragatesi nij deha, sumiresi ramu samet saneha
Antar prem tasu pahichana, muni durlabh gati dinhi sujana

Whole chapter