Ramcharitmanas 9.1

आकर चारि लाख चौरासी। जाति जीव जल थल नभ बासी।।
सीय राममय सब जग जानी। करउँ प्रनाम जोरि जुग पानी।।
जानि कृपाकर किंकर मोहू। सब मिलि करहु छाड़ि छल छोहू।।
निज बुधि बल भरोस मोहि नाहीं। तातें बिनय करउँ सब पाही।।
करन चहउँ रघुपति गुन गाहा। लघु मति मोरि चरित अवगाहा।।
सूझ न एकउ अंग उपाऊ। मन मति रंक मनोरथ राऊ।।
मति अति नीच ऊँचि रुचि आछी। चहिअ अमिअ जग जुरइ न छाछी।।
छमिहहिं सज्जन मोरि ढिठाई। सुनिहहिं बालबचन मन लाई।।
जौ बालक कह तोतरि बाता। सुनहिं मुदित मन पितु अरु माता।।
हँसिहहि कूर कुटिल कुबिचारी। जे पर दूषन भूषनधारी।।
निज कवित केहि लाग न नीका। सरस होउ अथवा अति फीका।।
जे पर भनिति सुनत हरषाही। ते बर पुरुष बहुत जग नाहीं।।
जग बहु नर सर सरि सम भाई। जे निज बाढ़ि बढ़हिं जल पाई।।
सज्जन सकृत सिंधु सम कोई। देखि पूर बिधु बाढ़इ जोई।।

Akar chari lakh chaurasi, jati jiv jal thal nabh basi
Siy ramamay sab jag jani, karaum pranam jori jug pani
Jani kripakar kinkar mohu, sab mili karahu chhari chhal chhohu
Nij budhi bal bharos mohi nahin, taten binay karaum sab pahi
Karan chahaum raghupati gun gaha, laghu mati mori charit avagaha
Sujh na ekau ang upau, man mati rank manorath rau
Mati ati nich unchi ruchi achhi, chahia amia jag jurai na chhachhi
Chhamihahin sajjan mori dhithai, sunihahin balabachan man lai
Jau balak kah totari bata, sunahin mudit man pitu aru mata
Hansihahi kur kutil kubichari, je par dushan bhushanadhari
Nij kavit kehi lag na nika, saras hou athava ati phika
Je par bhaniti sunat harashahi, te bar purush bahut jag nahin
Jag bahu nar sar sari sam bhai, je nij barhi barhahin jal pai
Sajjan sakrit sindhu sam koi, dekhi pur bidhu barhai joi

Whole chapter