Sukta 38

38.1

Kevalah patih, 1-5 atharva, vanaspatih, anushtup, 3 chatushpada ushnik

इ॒दं ख॑नामि भेष॒जं मां॑प॒श्यम॑भिरोरु॒दम्।
प॒रा॒य॒तो नि॒वर्त॑नमाय॒तः प्र॑ति॒नन्द॑नम् ॥१॥

Idam khanami bheshajam mampashyamabhirorudam
Parayato nivartanamayatah pratinandanam

येना॑ निच॒क्र आ॑सु॒रीन्द्रं॑ दे॒वेभ्य॒स्परि॑ ।
तेना॒ नि कु॑र्वे॒ त्वाम॒हं यथा॒ तेऽसा॑नि॒ सुप्रि॑या ॥२॥

Yena nichakra asurindram devebhyaspari
Tena ni kurve tvamaham yatha tesani supriya

प्र॒तीची॒ सोम॑मसि प्र॒तीच्यु॒त सूर्य॑म्।
प्र॒तीची॒ विश्वा॑न् दे॒वान् तां त्वा॒च्छाव॑दामसि ॥३॥

Pratichi somamasi pratichyuta suryam
Pratichi vishvan devan tam tvachchhavadamasi

अ॒हं व॑दामि॒ नेत् त्वं स॒भाया॒मह॒ त्वं वद॑ ।
ममेदस॒स्त्वं केव॑लो॒ नान्यासां॑ की॒र्तया॑श्च॒न ॥४॥

Aham vadami net tvam sabhayamaha tvam vada
Mamedasastvam kevalo nanyasam kirtayashchana

यदि॒ वासि॑ तिरोज॒नं यदि॑ वा न॒द्यऽस्ति॒रः ।
इ॒यं ह॒ मह्यं॒ त्वामोष॑धिर्ब॒द्ध्वेव॒ न्यान॑यत् ॥५॥

Yadi vasi tirojanam yadi va nadyastirah
Iyam ha mahyam tvamoshadhirbaddhveva nyanayat