Sukta 109

109.1

Rashtrabhritah, 1-7 badarayanih, agnih, anushtup, 1 virat purastad brihati, 2, 3, 5-7 trishtup

इ॒दमु॒ग्राय॑ ब॒भ्रवे॒ नमो॒ यो अ॒क्षेषु॑ तनूव॒शी।
घृ॒तेन॒ कलिं॑ शिक्षामि॒ स नो॑ मृडाती॒दृशे॑ ॥१॥

Idamugraya babhrave namo yo aksheshu tanuvashi
Ghritena kalim shikshami sa no mridatidrishe

घृ॒तम॑प्स॒राभ्यो॑ वह॒ त्वम॑ग्ने पां॒सून॒क्षेभ्यः॒ सिक॑ता अ॒पश्च॑ ।
य॒था॒भ॒गं ह॒व्यदा॑तिं जुषा॒णा मद॑न्ति दे॒वा उ॒भया॑नि ह॒व्या ॥२॥

Ghritamapsarabhyo vaha tvamagne pansunakshebhyah sikata apashcha
Yathabhagam havyadatim jushana madanti deva ubhayani havya

अ॒प्स॒रसः॑ सध॒मादं॑ मदन्ति हवि॒र्धान॑मन्त॒रा सूर्यं॑ च ।
ता मे॒ हस्तौ॒ सं सृ॑जन्तु घृ॒तेन॑ स॒पत्नं॑ मे कित॒वं र॑न्धयन्तु ॥३॥

Apsarasah sadhamadam madanti havirdhanamantara suryam cha
Ta me hastau sam srijantu ghritena sapatnam me kitavam randhayantu

आ॒दि॒न॒वं प्र॑ति॒दीव्ने॑ घृ॒तेना॒स्माँ अ॒भि क्ष॑र ।
वृ॒क्षमि॑वा॒शन्या॑ जहि॒ यो अ॒स्मान् प्र॑ति॒दीव्य॑ति ॥४॥

Adinavam pratidivne ghritenasmam abhi kshara
Vrikshamivashanya jahi yo asman pratidivyati

यो नो॑ द्यु॒वे धन॑मि॒दं च॒कार॒ यो अ॒क्षाणां॒ ग्लह॑नं॒ शेष॑णं च ।
स नो॑ दे॒वो ह॒विरि॒दं जु॑षा॒णो ग॑न्ध॒र्वेभिः॑ सध॒मादं॑ मदेम ॥५॥

Yo no dyuve dhanamidam chakara yo akshanam glahanam sheshanam cha
Sa no devo haviridam jushano gandharvebhih sadhamadam madema

संव॑सव॒ इति॑ वो नाम॒धेय॑मुग्रंप॒श्या रा॑ष्ट्रभृतो॒ ह्य॑१क्षाः ।
तेभ्यो॑ व इन्दवो ह॒विषा॑ विधेम व॒यं स्या॑म॒ पत॑यो॒ रयी॒णाम् ॥६॥

Sanvasava iti vo namadheyamugrampashya rashtrabhrito hya1kshah
Tebhyo va indavo havisha vidhema vayam syama patayo rayinam

दे॒वान् यन्ना॑थि॒तो हु॒वे ब्र॑ह्म॒चर्यं॒ यदू॑षि॒म।
अ॒क्षान् यद् ब॒भ्रूना॒लभे॒ ते नो॑ मृडन्त्वी॒दृशे॑ ॥७॥

Devan yannathito huve brahmacharyam yadushima
Akshan yad babhrunalabhe te no mridantvidrishe