Sukta 73

73.1

Sammanasyam, 1-3 atharva, sammanasyam, varunasomagnibrihaspativasavah, 3 vastoshpatih, 1, 3 bhurik, 2 trishtup

एह या॑तु॒ वरु॑णः॒ सोमो॑ अ॒ग्निर्बृह॒स्पति॒र्वसु॑भि॒रेह या॑तु ।
अ॒स्य श्रिय॑मुप॒संया॑त॒ सर्व॑ उ॒ग्रस्य॑ चे॒त्तुः संम॑नसः सजाताः ॥१॥

Eha yatu varunah somo agnirbrihaspatirvasubhireha yatu
Asya shriyamupasanyata sarva ugrasya chettuh sammanasah sajatah

यो वः॒ शुष्मो॒ हृद॑येष्व॒न्तराकू॑ति॒र्या वो॒ मन॑सि॒ प्रवि॑ष्टा ।
तान्त्सी॑वयामि ह॒विषा॑ घृ॒तेन॒ मयि॑ सजाता र॒मति॑र्वो अस्तु ॥२॥

Yo vah shushmo hridayeshvantarakutirya vo manasi pravishta
Tantsivayami havisha ghritena mayi sajata ramatirvo astu

इ॒हैव स्त॒ माप॑ या॒ताध्य॒स्मत् पू॒षा प॒रस्ता॒दप॑थं वः कृणोतु ।
वास्तो॒ष्पति॒रनु॑ वो जोहवीतु॒ मयि॑ सजाता र॒मति॑र्वो अस्तु ॥३॥

Ihaiva sta mapa yatadhyasmat pusha parastadapatham vah krinotu
Vastoshpatiranu vo johavitu mayi sajata ramatirvo astu