Sukta 133

133.1

Mekhalabandhanam, 1-5 agastyah, mekhala, 1 bhurik 2, 5 anushtup, 3 trishtup, 4 jagati

य इ॒मां दे॒वो मेख॑लामाब॒बन्ध॒ यः सं॑न॒नाह॒ य उ॑ नो यु॒योज॑ ।
यस्य॑ दे॒वस्य॑ प्र॒शिषा॒ चरा॑मः॒ स पा॒रमि॑च्छा॒त् स स उ॑ नो॒ वि मु॑ञ्चात् ॥१॥

Ya imam devo mekhalamababandha yah sannanaha ya u no yuyoja
Yasya devasya prashisha charamah sa paramichchhat sa sa u no vi munchat

आहु॑तास्य॒भिहु॑त॒ ऋषी॑णाम॒स्यायु॑धम्।
पूर्वा॑ व्र॒तस्य॑ प्राश्न॒ती वी॑र॒घ्नी भ॑व मेखले ॥२॥

Ahutasyabhihuta rishinamasyayudham
Purva vratasya prashnati viraghni bhava mekhale

मृ॒त्योर॒हं ब्र॑ह्मचा॒री यदस्मि॑ नि॒र्याच॑न् भू॒तात् पुरु॑षं य॒माय॑ ।
तम॒हं ब्रह्म॑णा॒ तप॑सा॒ श्रमे॑णा॒नयै॑नं॒ मेख॑लया सिनामि ॥३॥

Mrityoraham brahmachari yadasmi niryachan bhutat purusham yamaya
Tamaham brahmana tapasa shramenanayainam mekhalaya sinami

श्र॒द्धाया॑ दुहि॒ता तप॒सोऽधि॑ जा॒ता स्वस॒ ऋषी॑णां भूत॒कृतां॑ ब॒भूव॑ ।
सा नो॑ मेखले म॒तिमा धे॑हि मे॒धामथो॑ नो धेहि॒ तप॑ इन्द्रि॒यं च॑ ॥४॥

Shraddhaya duhita tapasodhi jata svasa rishinam bhutakritam babhuva
Sa no mekhale matima dhehi medhamatho no dhehi tapa indriyam cha

यां त्वा॒ पूर्वे॑ भूत॒कृत॒ ऋष॑यः परिबेधि॒रे।
सा त्वं परि॑ ष्वजस्व॒ मां दी॑र्घायु॒त्वाय॑ मेखले ॥५॥

Yam tva purve bhutakrita rishayah paribedhire
Sa tvam pari shvajasva mam dirghayutvaya mekhale