Sukta 12

12.1

Ritasya yagyah, 1-11 angirah, jatavedah, trishtup, 3 panktih

समि॑द्धो अ॒द्य मनु॑षो दुरो॒णे दे॒वो दे॒वान् य॑जसि जातवेदः ।
आ च॒ वह॑ मित्रमहश्चिकि॒त्वान्त्वं दू॒तः क॒विर॑सि॒ प्रचे॑ताः ॥१॥

Samiddho adya manusho durone devo devan yajasi jatavedah
A cha vaha mitramahashchikitvantvam dutah kavirasi prachetah

तनू॑नपात् प॒थ ऋ॒तस्य॒ याना॒न् मध्वा॑ सम॒ञ्जन्त्स्व॑दया सुजिह्व ।
मन्मा॑नि धी॒भिरु॒त य॒ज्ञमृ॒न्धन् दे॑व॒त्रा च॑ कृणुह्यध्व॒रं नः ॥२॥

Tanunapat patha ritasya yanan madhva samanjantsvadaya sujihva
Manmani dhibhiruta yagyamrindhan devatra cha krinuhyadhvaram nah

आ॒जुह्वा॑न॒ ईड्यो॒ बन्द्य॒श्चा या॑ह्यग्ने॒ वसु॑भिः स॒जोषाः॑ ।
त्वं दे॒वाना॑मसि यह्व॒ होता॒ स ए॑नान् यक्षीषि॒तो यजी॑यान् ॥३॥

Ajuhvana idyo bandyashcha yahyagne vasubhih sajoshah
Tvam devanamasi yahva hota sa enan yakshishito yajiyan

प्रा॒चीनं॑ ब॒र्हिः प्र॒दिशा॑ पृथि॒व्या वस्तो॑र॒स्या वृ॑ज्यते॒ अग्रे॒ अह्ना॑म्।
व्युऽप्रथते वित॒रं वरी॑यो दे॒वेभ्यो॒ अदि॑तये स्यो॒नम् ॥४॥

Prachinam barhih pradisha prithivya vastorasya vrijyate agre ahnam
Vyuprathate vitaram variyo devebhyo aditaye syonam

व्यच॑स्वतीरुर्वि॒या वि श्र॑यन्तां॒ पति॑भ्यो॒ न जन॑यः॒ शुम्भ॑मानाः ।
देवी॑र्द्वारो बृहतीर्विश्वमिन्वा दे॒वेभ्यो॑ भवत सुप्राय॒णाः ॥५॥

Vyachasvatirurviya vi shrayantam patibhyo na janayah shumbhamanah
Devirdvaro brihatirvishvaminva devebhyo bhavata suprayanah

आ सुष्वय॑न्ती यज॒ते उ॒पाके॑ उ॒षासा॒नक्ता॑ सदतां॒ नि योनौ॑ ।
दि॒व्ये योष॑णे बृह॒ती सु॑रु॒क्मे अधि॒ श्रियं॑ शुक्र॒पिशं॒ दधा॑ने ॥६॥

A sushvayanti yajate upake ushasanakta sadatam ni yonau
Divye yoshane brihati surukme adhi shriyam shukrapisham dadhane

दैव्या॒ होता॑रा प्रथ॒मा सुवाचा॒ मिमा॑ना य॒ज्ञं मनु॑षो॒ यज॑ध्यै ।
प्र॒चो॒दय॑न्ता वि॒दथे॑षु का॒रू प्रा॒चीनं॒ ज्योतिः॑ प्र॒दिशा॑ दि॒शन्ता॑ ॥७॥

Daivya hotara prathama suvacha mimana yagyam manusho yajadhyai
Prachodayanta vidatheshu karu prachinam jyotih pradisha dishanta

आ नो॑ यज्ञं भार॑ती॒ तूय॑मे॒त्विडा॑ मनु॒ष्वदि॒ह चे॒तय॑न्ती ।
ति॒स्रो दे॒वीर्ब॒र्हिरेदं स्यो॒नं सर॑स्वतीः॒ स्वप॑सः सदन्ताम् ॥८॥

A no yagyam bharati tuyametvida manushvadiha chetayanti
Tisro devirbarhiredam syonam sarasvatih svapasah sadantam

य इ॒मे द्यावा॑पृथि॒वी जनि॑त्री रू॒पैरपिं॑श॒द् भुव॑नानि॒ विश्वा॑ ।
तम॒द्य हो॑तरिषि॒तो यजी॑यान् दे॒वं त्वष्टा॑रमि॒हय॑क्षि वि॒द्वान् ॥९॥

Ya ime dyavaprithivi janitri rupairapinshad bhuvanani vishva
Tamadya hotarishito yajiyan devam tvashtaramihayakshi vidvan

उ॒पाव॑सृज॒ त्मन्या॑ सम॒ञ्जन् दे॒वानां॒ पाथ॑ ऋतु॒था ह॒वींषि॑ ।
वन॒स्पतिः॑ शमि॒ता दे॒वो अ॒ग्निः स्वद॑न्तु ह॒व्यं मधु॑ना घृ॒तेन॑ ॥१०॥

Upavasrija tmanya samanjan devanam patha ritutha havinshi
Vanaspatih shamita devo agnih svadantu havyam madhuna ghritena

स॒द्यो जा॒तो व्यऽमिमीत य॒ज्ञम॒ग्निर्दे॒वाना॑मभवत् पुरो॒गाः ।
अ॒स्य होतुः॑ प्र॒शिष्यृ॒तस्य॑ वा॒चि स्वाहा॑कृतं ह॒विर॑दन्तु दे॒वाः ॥११॥

Sadyo jato vyamimita yagyamagnirdevanamabhavat purogah
Asya hotuh prashishyritasya vachi svahakritam haviradantu devah