Sukta 34

34.1

Brahmaudanam, 1-8 atharva, brahmaudanam, trishtup, 4 uttama bhurik, 5 vyavasana saptapada …………

ब्रह्मा॑स्य शी॒र्षं बृ॒हद॑स्य पृ॒ष्ठं वा॑मदे॒व्यमु॒दर॑मोद॒नस्य॑ ।
छन्दां॑सि प॒क्षौ मुख॑मस्य स॒त्यं वि॑ष्टा॒री जा॒तस्तप॒सोऽधि॑ य॒ज्ञः ॥१॥

Brahmasya shirsham brihadasya prishtham vamadevyamudaramodanasya
Chhandansi pakshau mukhamasya satyam vishtari jatastapasodhi yagyah

34.2

अ॒न॒स्थाः पू॒ताः पव॑नेन शु॒द्धाः शुच॑यः॒ शुचि॒मपि॑ यन्ति लो॒कम्।
नैषां शि॒श्नं प्र द॑हति जा॒तवे॑दाः स्व॒र्गे लो॒के ब॒हु स्त्रैण॑मेषाम् ॥२॥

Anasthah putah pavanena shuddhah shuchayah shuchimapi yanti lokam
Naisham shishnam pra dahati jatavedah svarge loke bahu strainamesham

34.3

वि॒ष्टा॒रिण॑मोद॒नं ये पच॑न्ति॒ नैना॒नव॑र्तिः सचते क॒दा च॒न।
आस्ते॑ य॒म उप॑ याति दे॒वान्त्सं ग॑न्ध॒र्वैर्मदते सो॒म्येभिः॑ ॥३॥

Vishtarinamodanam ye pachanti nainanavartih sachate kada chana
Aste yama upa yati devantsam gandharvairmadate somyebhih

34.4

वि॒ष्टा॒रिण॑मोद॒नं ये पच॑न्ति॒ नैना॑न् य॒मः परि॑ मुष्णाति॒ रेतः॑ ।
र॒थी ह॑ भू॒त्वा र॑थ॒यान॑ ईयते प॒क्षी ह॑ भू॒त्वाति॒ दिवः॒ समे॑ति ॥४॥

Vishtarinamodanam ye pachanti nainan yamah pari mushnati retah
Rathi ha bhutva rathayana iyate pakshi ha bhutvati divah sameti

34.5

ष॒ य॒ज्ञानां॒ वित॑तो॒ वहि॑ष्ठो विष्टा॒रिणं॑ प॒क्त्वा दि॒वमा विवे॑श ।
आ॒ण्डीकं॑ कुमु॑दं॒ सं त॑नोति॒ बिसं॑ शा॒लूकं॒ शफ॑को मुला॒ली।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥५॥

Sha yagyanam vitato vahishtho vishtarinam paktva divama vivesha
Andikam kumudam sam tanoti bisam shalukam shaphako mulali
Etastva dhara upa yantu sarvah svarge loke madhumat pinvamana upa tva tishthantu pushkarinih samantah

34.6

घृ॒तह्र॑दा॒ मधु॑कूलाः॒ सुरो॑दकाः क्षी॒रेण॑ पू॒र्णा उ॑द॒केन॑ द॒ध्ना।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥६॥

Ghritahrada madhukulah surodakah kshirena purna udakena dadhna
Etastva dhara upa yantu sarvah svarge loke madhumat pinvamana upa tva tishthantu pushkarinih samantah

34.7

च॒तुरः॑ कु॒म्भांश्च॑तु॒र्धा द॑दामि क्षी॒रेण॑ पू॒र्नाँ उ॑द॒केन॑ द॒ध्ना।
ए॒तास्त्वा॒ धारा॒ उप॑ यन्तु॒ सर्वाः॑ स्व॒र्गे लो॒के मधु॑म॒त् पिन्व॑माना॒ उप॑ त्वा तिष्ठन्तु पुष्क॒रिणीः॒ सम॑न्ताः ॥७॥

Chaturah kumbhanshchaturdha dadami kshirena purnam udakena dadhna
Etastva dhara upa yantu sarvah svarge loke madhumat pinvamana upa tva tishthantu pushkarinih samantah

34.8

इ॒ममो॑द॒नं नि द॑धे ब्राह्म॒णेषु॑ विष्टा॒रिणं॑ लोक॒जितं॑ स्व॒र्ग॑म्।
स मे॒ मा क्षे॑ष्ट स्व॒धया॒ पिन्व॑मानो वि॒श्वरू॑पा धे॒नुः का॑म॒दुघा॑ मे अस्तु ॥८॥

Imamodanam ni dadhe brahmaneshu vishtarinam lokajitam svargam
Sa me ma ksheshta svadhaya pinvamano vishvarupa dhenuh kamadugha me astu